Lab-as pa sa akong panumdoman kadtong makabungog nga isyu sa Kapitolyo sa mga 1990s sa administrasyon ni kanhi Gov. Vicente Dela Serna ug kanhi board member ug karon Acting Gov. Agnes Magpale nga maoy naghupot sa komitiba sa panglawas (health committee) kaniadto.
Niadtong panahona si then Provincial Board member Winston Garcia igsoon ni suspended governor Gwendolyn Garcia maoy vocal ug fiscalizer batok sa Dela Serna administration ug nilang Magpale.
Usa sa mga bug-at nga gipabuto nga isyu ni Winston mao ang giingong anomalosong transaksiyon nilang Dela Serna ug Magpale sa pagsud og kontrata ngadto sa United Laboratories.
Sa expose ni Winston gipasanginlan nila si Magpale kaniadto nga namalit og mga tambal sa Unilab nga giingong tayobong ang gisagol. Buot ipasabot nga substandard ang mga tambal.
Apan ang nakaporke kay wa itaral sila si Dela Serna, Magpale ug mga kaalyado sa giingong transaksiyon.
Unya mikalit lang og katunaw ang isyu ug nawala sa limelight dihang nagkaduol na ang eleksiyon ug mitapon ang mga Durano, Almendras ug Magpale sa Lakas-NUCD diin si Noy Pabling Garcia, amahan ni Gwen, maoy gubernatorial bet batok kang Tingting kaniadto.
Way kaso nga gi-file batok nilang Magpale ug nadaut pa ang Unilab kay way formal investigation kun tinuod ba ang alegasyon.
Ang punto nako niini mao nga hilas ug hugaw gyud kaayo kining kagaw sa pulitika. Mawala ang kawsa pakigbatok sa corruption kun mahimo nang kaalyado.
Sukad nahimong suod ug nakauban sa mga Garcia si Magpale gigukod pa ba siya sa isyu sa Unilab?
Pananglitan karon kun motapon ang mga Garcia sa Liberal Party (LP) sa mosunod nga mga katuigan, seryoso pa kaha ning taga-LP mogukod ni Gwen sa mga transaksiyon? Balo lamang kun taga-amo pay pasulti-on.
Mokisaw lang ang mga dautang isyu sa panahon sa eleksiyon.
Labing tinuod wa ko makasabot sa LP dinhi sa Sugbo tungod kay samtang nagpasiatab sila sa pagpakigbatok sa corruption apan nanguha sila og mga politiko nga gipangtaral sa kasong anti-graft. Ambot! Asa dinhi ang dalang matuwid?
Unya na ko motuo ug mobilib niining atong mga politiko kun hangtud sa ilang lubnganan barugan gyud ang kawsa batok sa pangurakot sa gobyerno.
Mao nga bisan unsaon nako ug analisar, bunga gyud sa demonyo sa pulitika kining suspension ni Gwen ug klarong power grabbing.
Apan sama sa akong giingon nga legal kining maong suspension apan migitib gyud ang motibo sa pulitika.
Mas maayo pa nga ceasefire una sila si Gwen Garcia ug Agnes Magpale samtang atong giselebrar ang Kapistahan ni Señor Santo Niño. Panayaw mong duha! Ug Pit Señor na lang!
* * *
In fairness ni Cebu City Councilor Augustus Pe Jr., iyang giklaro nga dili gyud tinuod kadtong alegasyon nga buot niyang ipapatay ang iyang kanhi driver nga si Roldan Surela human gitribukar ang mga sekretong negosyo sa konsehal diha sa New Cebu City Jail, barangay Kalunasan.
Andam siyang magpaimbestigar sa mga isyu sama sa pag-supply og bugas ug ubang mga gamit sa mga piniriso.
Gikuwestiyon usab ang konsehal sa iyang kapakyas pagsumpo sa illegal nga drugas sulod sa jail.
Miingon si Pe nga tiggamitan og drugas si Surela mao nga iyang gitaktak ug nagtuo siya nga ang “Team Rama” maoy nagpaluyo niining tanan tungod kay duol na ang piniliay.
Mao nga manawagan ko ni Surela ug ubang saksi ilabina sa mga kadagkuan sa Bureau of Jail Management and Penology nga motug-an sa tinuuod aron maklaro kining tanan.
Unsa ka tinuod nga higalang babaye ni Jun Pe ang gipadala sa negosyo?
* * *
Kinahanglang taktakon kun tinuod man kining mga alegasyon batok sa walo ka mga pulis nga mga sakop sa Mobile Patrol Group nga nangilkil sa operator ug peryahan sa Busay.
Wa silay luna diha sa Philippine National Police (PNP) organization.
Pero in fairness sa mga pulis, nanghimakak niining mga pasangil.
Gipangimbestigahan na kining mga pulisa ug ang uban kanila gipatubag na sa maong kontrobersiya.
Alang nako medyo sayop kining tinguha ni Police Regional Office in Central Visayas Chief Gen. Marcelo Garbo nga ibalhin kining maong mga pulis sa lalawigan sa Siquijor samtang gipangimbestigahan pa.
Unya na ibalhin kun kahatagan sila og substantive due process.
Maglaum ko nga dunay mga testigo nga andam mobarug aron way kulba ang ilang mga labaw pagtaktak niining mga “scalawags in uniform” sa PNP.