Asa naman dinhi ang pagka-independente sa media?
Sama sa akong giingon sa akong programa sa dySS Super Radyo nga usa gyud ka dakung sayop ang gihimo sa management sa Sun Star Cebu ug sa pamilyang Garcia sa ilang desisyon nga gipaundang na og suwat si Sir Bobby Nalzaro sa iyang mga columns sa Sun Star ug Super Balita.
Mosugot ug sa dili ang pamilyang Garcia, makaapektar kini ug daku sa integrity sa Sun Star.
Klaro kaayo kining curtailment sa press freedom. Kinahanglan kini og martsa sa kadalanan.
Asa naman dinhi ang pagka-independente sa Sun Star? Asa naman karon ang mga panghambug nga way pagpanggawong sa mga opinion sa mga kolumnista?
Abi ba nako nga namatay na ang martial law ug mipatigbabaw na ang kagawasan sa prensa.
Tungod ba lang kay critical si Sir Bob sa liderato ni suspended governor Gwendolyn ug kini na maoy resulta?
Article continues after this advertisementAng labing sayop sa management mao nga wa gyud sila mopatawag ni Sir Bob aron unta hatagan og warning sa mga write-ups nga wa na ikahimuot sa pamilya.
Article continues after this advertisementKun ingon ani ang mentalidad sa mga politiko nga nanag-iya og print media ug broadcast networks mas maayong moundang sila niining matang sa patigayon kay kini maoy sukaranan sa ilang pagkaalaut.
Bisan unsaon dili sila makahurot sa pagpatak-om namong mga sakop sa media.
Magpasalamat lang ko sa akong gipang-alagaran nga mga kompaniya sa GMA-7/dySS Cebu ug dinhi sa CEBU DAILY NEWS isip usa ka sakop sa prensa kay way mga politiko nga makagawong sa akong mga baruganan sa mga isyu karon.
Sama sa akong giingon nga kun di na gyud pasuwaton si Sir Bob sa mga Garcia diha sa Sun.star, ako na lang hangyoon si Ma’am Eileen Mangubat, among publisher nga akong isakripisyo kining akong space sa opinion page dinhi sa CDN aron makapadayon si Sir Bob sa iyang krusada.
* * *
Medyo delayed kining reaction ni kanhi Capitol consultant Byron Garcia sa iyang pagpanghagit og sinugmagay kang Police Regional Office in Central Visayas Chief Gen. Marcelo Garbo.
Asa man siya niadtong Disyembre 19 dihang gikalitan pagguba sa mga pulis ang mga tent diha sa ground floor sa Kapitolyo?
Asa man si Byron niadtong paingon sa pagsugat sa Bag-ong tuig nga giataki ang Kapitolyo og mga sakop sa SWAT?
Akong nahibaw-an nga wa mag-ayo ang relasyon nilang Gwen ug Byron kaniadto.
Apan karon migitib na gyud ang tinuod nga panultihon nga “blood is thicker than water.”
Pero ambot lang kunsuklan si Byron ni Garbo.
Akong sublion nga kinahanglang kalma lang unta ug mopatigbabaw ang kalinaw.
Alang nako wa nay rason nga mangisog si Byron kay gipatuman ang “maximum tolerance.”
Paabot na lang unta ta kun may restraining order ba gyud!
* * *
Mitiyabaw intawon si Director Emmanuel Gimarino sa buhatan sa Register of Deeds kagahapon kay sukad pa niadtong Nobyembre wa sila mapadalhi og judicial forms gikan sa Land Registration Authority.
Matud pa niya nga kini maoy hinungdan nga miabot og 3,000 ka mga transaksiyon nga na-backlog sa ilang buhatan.
Ang hinungdan kay medyo langay ang printing didto sa Central Bank of the Philippines.
Maglaum ko nga mahatagan kini og pagtagad sa mga kadagkuan.
Pero ang labing maayo nga balita ni Director Gimarino mao nga wa nay mga fixers nga nag-operate sa ilang buhatan. Kun duna man dili na gyud makaduol sa ilang opisina.
