Happy New Year

Pipila na lang ka oras hingpit na gyud natong biyaan ang tuig 2012 ug atong hangpon ang bag-ong tuig 2013 nga puno sa pangaliya sa Kahitas-an alang sa mas himsog, masanagon, malamboon, mahigugma-on, ug hiniusa nga pamilya.

Way laing butang nga mas lanog pa sa mga pabuto ang pagyukbo sa altar karong tunga-tungang gabii aron ipa-abot Kaniya kining maong mga pangaliya.

Way kumo sa pakig-uban sa Labawng Makagagahum niining paghangop sa tuig 2013. Mag-unsa ang atong mga palihi kun magpalayo kita Kaniya?

Sa makausa pa mo-apelar ko sa tanang kasundalohan, kapolisan, tanang law enforcers, mga guwardiya, mga tanod ug mga sibilyan nga dunay mga armas nga unta di gyud gamiton sa pagpabuto sa pagsugat sa New Year.

Makonsensiya baya mo nga dunay mangaigo sa bala nga inyong usik-usikan. Posible pa gani nga inyo rang kabanay ang maigo sa stray bullet.

Niadtong Sabado atol sa among programang “Dialogue on the Air” sa dySS Super Radyo mipasalig ang atong kapulisan ug kabomberohan sa Metro Cebu nga hugtan gyud nila ang kampanya sa pagdakop ug pagsakmit sa mga illegal nga pabuto ug mga pyrotechnic.

Maglaum ko nga way maputlan og kumagko ug way sunog nga mosugat nato sa bag-ong tuig 2013.

Again, Happy New Year!

* * *

With all due respect, wa ko makasabot kang Acting Gov. Agnes Magpale nga moingon nga nabangkaruta na ang panudlanan sa Kapitolyo.

Kun wa nay kuwarta ang Kapitolyo nganong nagpatuga-tuga man siya og anonsiyo sa dagkung Christmas bonus alang sa mga kawani ug nilang mga opisyales?

Kun napordoy ang atong panudlanan nganong makabayad pa man ta pinaagi sa tagi-tagi ngadto sa ubang mga obligasyon?

In fairness, tingali insakto si suspended governor Gwen Garcia nga moingon nga duna pay daghang kolektahonon ug maoy magamit sa pagbayad sa mga obligasyon.

Alang nako premature pa kaayo kining conclusion ni Magpale tungod kay wa pay klarong kuwentada.

Ang labing maayo nga himoon mao gyud ang pagpahigayon og komprehensibo nga audit sa atong panudlanan.

Dili kini madala og tira pasagad Ma’am Agnes ug dili sab ni masulbad pinaagi sa debate Madam governor!

Alang nako sayop sab gyud nang moingon ta nga way utang ang Kapitolyo o “debt free” kay samtang magpadayon ang operation ug serbisyo sa Kagamhanang Probinsiyal anaa gyud kanang mga bayranan sa suga, sa tubig, mga tambal, pagkaon, office supplies, sweldo sa mga tawo, bayad sa mga proyekto ug uban pa.

Ang ako lang ayaw intawon mo palabi sa pamolitika nga makaguba ug samot sa atong pinangga nga lalawigan.

Palihug pagbaton kamo og delicadeza, gugma ug kalinaw!

* * *

Wa koy supak nga ipatuman na ang dinakpanay niadtong magsul-ob og helmet nga way tatak “ICC” ug “PS” aron matestingan gyud kun unsa ka epektibo kining balauda.

Maglaum ko nga way exempted sa balaud ma-pulis, ma-Citom personnel ug ubang anaa sa gobyerno.

Kun seryoso gyud sila si Director Raul Aguilos sa Land Transportation Office (LTO) kinahanglang unahon nila ang dakbayan sa Dumaguete nga puwera buyag ang mga tawo didto supak gyud sa standard helmet law.

Di sab maayo nga moderetso og balibad ang atong mga kadagkuan sa Department of Trade and Industry (DTI) sa hangyo sa kinabag-an nga mohatag og lugway sa pagpatapot ug mga stickers sa mga helmet ilabina intawon niadtong taga-lagyong lugar.

Kun seryoso ang taga-gobyerno nga makakuha og suporta sa publiko sa implementasyon kinahanglang dili nila putlon ang serbisyo sa pag-inspection sa mga helmet ug pataptan og sticker kun makapasar.

* * *

Wa pa gyud maleksiyon kining ubang mga pribadong tambalanan nga gidili gyud sa balaud ang pagtanggong sa mga pasyente nga naayo na bisan wa pa makabayad sa hospital bill.

Karong bag-o midangop sa among sibyaanan si Annabelle Cumpa nga taga Duljo Fatima ug iyang gireklamo ang management sa Saint Vincent Hospital kay ang iyang anak nga iyang gihimugso niadtong Dec. 8 dili gyud ipa-discharge tungod kay duna silay bayranan nga P86,000.

Misaad si Cumpa nga dili nila biyaan kining maong obligasyon apan nabalaka sila nga mas mosamot kadaku ang ilang bayranan kun magpadayon sa tambalanan ang ilang anak nga wa nay kakulian sa panglawas.

Gawas pa, nabalaka sila nga simbako matakbuyan og laing sakit ang ilang anak sa ospital nga mosamot ang ilang problema.

Sigun sa inahan nga bisan giunsa nila paghangyo apan di gyud mosugot kun way ika-collateral nga property.

Magpasalamat ko ni manlalaban Ma. G-Ree Calinawan, Director sa Public Attorney’s Office (PAO) kay ilang giabagan ang inahan sa punto legal aron ipa-release ang anghel pinaagi sa hangyo lubo.

Apan kun magmakuli gyud ang taga ospital pag-discharge sa bata mapugos ang taga PAO pagkiha sa korte og petition for writ of habeas corpus batok sa maong ospital.

Kini aron ang korte nay momando sa taga-ospital nga i-discharge ang bata ug i-uban sa inahan nga unang gi-discharge.