Connecticut mirrors movie
Pagkabasa ko sa detalye niadtong mass shooting sa Aurora Colorado milutaw sa akong hunhuna ang eksena sa “Inglorious Basterds” diin gipamusil ang mga nanan-aw sa usa ka premiere showing sa usa ka pelikula.
Ang gipang rakrakan ni James Eagan Holmes sa Colorado mao ang mga audience sa premiere sa pinakabag-ong Batman movie nga “The Dark Knight Rises.” Ug susama sa eksena sa pelikula duna usay tear gas nga gigamit sa Aurora mass shooting.
Karong tuiga may nakit-an usab akong pelikula nga matud pas akong mga higala, depressing kuno kaayo. Kini mao ang “We need to Talk About Kevin” nga kabahin sa usa ka inahan nga dunay teenage son nga sociopath nga mipatay og daghang estudyante sa iyang eskwelahan.
Pagabot sa mga detalye kabahin sa suspected killer sa eskwelahang Sandy Hook sa Newtown, Connecticut, nga mipatay og 20 ga gagmay nga mga bata ug pito ka mga hamtong sa wa pa kini maghikog, misulod dayon sa akong hunahuna ang pelikula nga “We Need to Talk About Kevin.” Ug namatikdan ko nga daw reverse o mirror image ang hitabo sa Connecticut sa pelikula sa England.
Nianing tungora daghan sigurong mosugyot sa cliché nga “life imitates art.” Ania i-juxtapose ko ang pelikula ug ang taho.
Movie (M): Usa ka teenage sociopath nga gihinganlag Kevin mipatay og mga bata ug ingon man mga kaedad niya sa ilang tulonghaan.
News (N): Gipamatay sa usa ka 20 anyos nga Adam Lanza ang principal sa iyang eskwelahan sa una ug ingon man ang pipila ka mga maestra ug 20 ka mga bata nga nagpanuigon pa og 5 to 6 years old.
M: Pana sa archery ang weapon of choice ni Kevin ug iya usang gipatay ang iyang amahan ug ang iyang manghud nga babaye sa wa pa siya moatake sa eskwelahan.
N: Gipatay una ni Adam ang iyang inahan nga si Nancy (gipusil niya sa ulo) sa wa pa siya moadto sa Sandy Hook. Ang armas ni Adam—usa ka .223-caliber Bushmaster rifle ug duha ka handguns, usa ka Glock ug usa ka Sig Sauer. Puros kini lisensyado sa ngan sa iyang inahan.
M: Buhi ra ang inahan ni Kevin nga si Eva kay wa man kini pagpamana niya sa iyang amahan ug igsuong babaye.
N: Divorced na ang ginkanan ni Adam ug maong mitipon na ang iyang amahan sa bag-o niini nga pamilya ug ang iyang maguwang nga lalake wa na magpuyo sa ila kay nanarbaho na kini ug naglain. Sa ato pa wala sila atol sa pagpusil niya sa iyang inahan.
M: Mitahan sa iyang kaugalingon sa mga awtoridad si Kevin ug natanggong kini sa bilanguan.
N: Naghikog si Adam dihang miabot na ang mga pulis.
Tingali, makapangutana kita kun nakakita ba si Adam ning pelikula kabahin ni Kevin. Ang “We Need to Talk About Kevin” gi-produce sa BBC ug si Tilda Swinton maoy nidala sa mama ni Kevin. Gikan kini sa libro ni Lionel Shriver nga nakadaug og Orange Prize niadtong 2005.
