Salamat nga dali kaayo tang nakabangon sa natad sa boxing human gipakatug ni Nonito Donaire ang Mexican boxer nga si Jorge Arce sa 3rd round.
Wa magsilbe ang hambog ni Arce nga nagsigeg hagit kang Donaire nga ipaigo gyud ang iyang apapangeg bisan natumba na siya sa second round.
Makatulo natumba si Arce. Kausa sa second round ug kaduha sa 3rd round hangtud nga wa na gyud siya makabangon sa katapusang tumba nga 1 second na lang ang nahibiling oras sa 3rd round.
Congrats, Nonito! Alang nako, kun way away silang People’s Champ Manny Pacquiao ug Juan Manuel Marquez mas maayo tingaling tun-an ang Donaire – Marquez fight.
* * *
Pagkanindot gyung pamation sa Pasko nga subhan ug sugdan sa mga sakop sa pamilya ang pagsimba sa unang “Misa De Gallo”.
Kagahapon sa kadlawon taliwa sa kakuwang og oras sa katulog akong gipang-pukaw ang akong mga sakop sa pamilya aron gyud makasimba.
Akong gi-grab ang opportunity nga makasimba kami kay gawas nga unang “Misa De Gallo” natayming pa gyud nga adlawng Domingo.
Puwerteng bagaa gyud sa tawo sa St. Therese Parish Church sa Lahug.
Ang homily ni Father Jun nagsentro sa mensahe ngadto sa mga politiko, abogado, mga amahan ug sa tanang mga nanimba nga ipaambit ang gihuptan nga “kalayo, kahayag ug ang dan-ag” niini ngadto sa mga tawo nga nagkinahanglan ug mga tabangonon.
Iyang giigo ang mga politiko ug abogado paghatag sa tinud-anay nga serbisyo publiko.
Hangtud nga misambingay siya sa kontrobersiyal nga isyu sa Reproductive Health Bill nga gipasar sa 2nd reading sa Kongreso taliwa nga grabe ang pagsupak sa Simbahan.
Iyang gikondenar ang paggamit sa magtiayon ug condom og ubang contraceptive method ug artificial birth control nga nakasupak sa kabubut-on sa Diyos.
Moingon na lang ko ni Father Jun nga “AMEN”. Alang nako nga konsensiya na lang gyud sa magtiayon ang paggamit niining mga butanga.
Kay alang nako ang disiplina sa magtiayon ug ang insaktong kaalam sa natural method maoy labing epektibo nga paagi pagkontrolar sa gidaghanon sa pamilya.
* * *
In fairness intawon sa taga Pag-Ibig Fund nga maoy nanghatag namo og ham niadtong miaging simana, way tuyo nga hiloan kaming mga sakop sa media.
Ang sipyat lang kay wa tan-awa ang gisudlan nga pangregalo nga nakataktak didto nga June 2012 ang expiration date.
Full force intawon ang taga Pag-Ibig Fund ug ang manufacturer sa ham nga mao ang Sunpride nga nagpasabot nga luwas gyung kan-on ang ilang gipanghatag.
Bisan si Director Romeo Capa sa National Meat Inspection Service (NMIS) sa Central Visayas mipasabot nga konbinsido sila sa esplikasyon sa management sa Sunpride nga wa gyud mamaligya og expired nga mga produkto ilabina nga estrikto kaayo ang kompaniya.
Gipasabot nila ni Director Capa ug Dr. Alvin Leal sa NMIS nga bugtong ang taga-Sunpride ra maoy nakaangkon og triple A nga accreditation sa ilang slaughter house nga kun buot sabton puwede’ng maka-import ang taga Sunpride sa ilang mga produkto.
Si Director Capa miingon nga kun intresado gyud ang mga tigbalita nga ipahiling ug ipaeksamen ang produkto andam silang mohimo sa ilang trabaho.
Pero sa akong kabahin nga usa sa mga recipient di na lang ko maglangan-langan kay sama sa akong gibalik-balik sa akong programa sa dySS Super Radyo konbinsido ko sa kaligdong sa taga Sunpride.
Mohangyo lang sab ko sa taga Sunpride nga dili nalang taktakon o suspensohon ang ilang mga trabahante nga nasipyat og putos nga migamit sa karaan nga karton nga pang-regalo.
Sipyat lang gyud to tungod sa ka busy ilabina sa volume sa order sa ilang kliyente subay sa nagkaduol na nga Pasko.
In fairness sab sa taga Pag-Ibig Fund nilang Van Pepito nalipat lang gyud sila pagdawat sa mga ham nga gikan sa tindahan nga ilang gipalitan kay daghan sab kaayo silang obligasyon.
Salamat Pag-Ibig Fund sa sayong regalo!
* * *
Gikinahanglan gyud nato karon nga limpiyo ang tanang matang sa karne, isda ug ubang pagkaon unya way pagpanikas sa mga timbangan diha sa Carbon ug sa ubang mga tindahan.
Gawas niini sigurohon gyud nga de kalidad ang mga produkto nga pang-regalo ug mga Christmas décor.
Karong mga panahuna nga nagkaduol na ang Pasko importante kaayo ang pagtinabangay sa pagpakabana sa tanang mga sector uban sa mga ahensiya sa gobyerno.
Gawas sa taga Department of Trade and Industry nga modoble sa ilang kampanya mao sab ang himoon sa taga-NMIS nila ni Capa ug Dr. Leal.
Mipasalig usab sila si Dr. Alice Utlang, Cebu City veterinarian ug Dr. Dr. Maria Daisy Penetrante, Mandaue City veterinarian atol sa among programang “Dialogue on the Air” sa dySS Super Radyo nga mohimo sab sila og seryosong kampanya.
Gipasalig sa mga opisyal nga way “double dead” ug mga “hot meat” nga mga karne nga makalusot sa atong mga merkado.
Si Arnel Quijano sa Cebu City Market Operations Division mikompirmar sa pasangil ni Jun Posas sa CREW pundok sa mga konsumidor nga daghan gyud kaayong mga tikasan nga timbangan.
Sagad sa mga mihimo niini kadtong mga ambulant vendor nga way permit sa pagpamaligya.
Bisan ang pundok sa mga meat vendors sa Unit 1 Carbon Market sama nila ni Jose Remus Manuel , Marichu Belcones ug mga kaubanan mipasangil gyud sa mga ambulant vendors nga maoy mga responsable bisan niining palusot sa mga karne nga dili “fit for human consumption” ug sinagolan.
* * *
Naglibog ko kun nganong nakasayon-sayon ug sulod sa panimay ang mipusil patay kang Infanta, Pangasinan Mayor Ruperto Martinez niadtong Sabado sa hapon.
Asa man diay ang ubang mga kabanay sa mayor? Ug asa man diay ang iyang mga escorts ug ubang mga sinaligan?
Kun politika man maoy hinungdan niining tanan, pagka wa gyuy ayo sa politika sa nasud.