Kadto maoy boxing!
In fairness ni Pambansang Kamao Manny Pacquiao iyang gipakita ang iyang katakos ug abilidad pagpakigharong kang Mexican boxer Juan Manuel Marquez kagahapon oras dinhi sa Pilipinas.
Bisan natumba si Pacman sa 3rd round apan nakabawos siya pagpatumba kang Marquez sa 5th round.
Sa unang bahin sa 6th round midominar si Pacman apan nataymingan siya sa kusog kaayo nga right uppercut ni Marquez nga maoy naka-igo sa iyang wala nga apapangeg ug nakapatog kaniya.
Mao toy duwa nga akong gipaabot nga way daghang istorya nga di matikasan sa mga judges.
Naproyba gyud ni Marquez ang iyang katakos.
Bisan napildi si Pacman apan dili kini isipon nga mao nay katapusan sa iyang boxing career.
Mas nindot nga nakatilaw siya ug pildi nga knockout gyud kay aron makatimbang-timbang na si Pacquiao sa hukom sa Ginoo nga dili mapakyaw sa tawo ang tanang mga butang sa kalibotan.
Karon gud nga iya nang gisudlan ang laing relihiyon, negosyo, showbiz ug politika nawala na ang iyang focus sa pamoksing.
Kun gusto si Pacman nga maangkon ang iyang dungog nga mas gamhanan pa siya kay ni Marquez undangan niya ang iyang bisyo nga nahisgotan sa unahan ug mga laing “bisyo.”
Daghang mga text nga akong nadawat nga nagkondenar ni Pacman ug mibasol kun nganong wa kini mo-retire niadtong sikat pa siya. Usa ra gyud ang rason niini. Tungod sa pangwarta sa boksing.
Akong naobserbahan nga mas preparado gyud si Marquez sa ilang away.
Maglaum ko nga luwas ang ulo ug utok ni Manny samtang anaa pa siya sa ospital sa pagsuwat ning akong lindog.
* * *
Naglibog ko kun nganong minus kaayo ang taga Department of Trade and Industry (DTI) pag-confiscate niining mga substandard ug low quality nga mga produkto sama sa mga series lights.
Sila si “Inday Tikay,” Jun Posas, Alex Sandal ug Minda Ocliasa sa CREW kon Consumers Right For Economic Welfare miinsister atol sa among programa’ng “Dialogue on the Air” sa dySS Super Radyo niadtong Sabado nga alarming na gyud kaayo ang mga “uncertified” nga mga produkto sa mga tindahan.
Sila si Zaide Bation, chief, Consumer Welfare and Business Regulation Division ug Engr. Dario Cabarrubias Standard Officer sa DTI Cebu Province miingon nga anaa man tuod ang problema apan dili gyud “alarming.”
Ilang gipasabot nga sa ilang seryosong kampanya duna na silay 10 ka cartoon sa mga Christmas lights nga nasakmit gikan sa usa ka negosyante.
Andam ang taga DTI nga makig-abag sa taga Bureau of Fire paghimo og joint operation batok sa mga establisimento.
Samtang mitambag sila si SFO2 Ramero Amantiad ug mga kaubanan nga ibton lang gyud ang mga series lights kun way tawo nga magbantay aron paglikay sa disgrasya.
* * *
Unsay Pasko sa taga-Mindanao? Puwerteng luoya sa mga biktima sa bagyong “Pablo” nga namatyan ug wa nay desenteng panimay.
Sa pinaka-uwahing talaan dul-an 500 ang kompirmadong patay ug sobra sa 500 ang padayong missing.
With all due respect kang Presidente Noynoy Aquino morag nasayop siya sa iyang kamandoan nga iyang paimbestigahan ang klaseng pagpangandam sa mga lokal nga opisyal sa Compostela Valley ug Davao Oriental.
Dili kaha mapasanginlan ang presidente nga pamolitika ning iyang lakang?
Pananglitan karon kun kaalyado sa presidente sa Liberal Party ang mga nangapalpak nga mga opisyal, iya kahang silotan? O ba kaha iyang taktakon sa partido?
Mas mosuporta pa ko kun moimbestigar siya kun nganong sukad pa kaniadto inutil ang national government ug mga frontline agencies pagpakgang sa grabeng illegal logging ug illegal mining sa Mindanao.
Wa pa gyud matagbaw ang presidente sa testimoniya sa mga survivors nga miingon nga wa magsilbe ang ilang sayo nga pagpangandam ug pagbalhin sa gitagana nga evacuation centers tungod kay didto na gyud hinuon nag-una ang grabeng bul-og sa tubig baha?
Di gyud madala og imbestigar kun mobawos na ang kinaiyahan sa abuso sa tawo ug ang kainutil sa gobyerno.
* * *
Unsa may nakabati kun hatagan og higayon nga maka-operate ug balik ang pilot project nga Regional Court Administrator’s Office (RCAO) nga anaa diha sa dakbayan sa Lapu-lapu?
Unsa kahay maayo nga ibalhin ning maong buhatan dinhi sa Palace of Justice dakbayan sa Sugbo aron matutokan gyud kun unsay problema niini?
Kaniadto napalpak ang pagdumala sa RCAO kay daghan kaayong mga reklamo nga wa gyud mahatagi ug pagtagad pun-an pa nga way pamatasan ang mga manubag sa telepono.
Gawas niini, gitukod ang RCAO sa tinguha nga mapaspas pag-abot ang mga office supplies apan nainutil gihapon tungod kay atua gihapon sa Manila ang public bidding.
Makapaduda ni kun nganong interesado ang taga Manila nga adto ang subasta sa mga office supplies? Interesado ang mga mahistrado aron magpabilin ang tradisyon sa centralized corruption?
Laing mga reklamo nga akong nadawat mao nga nagkasayop na hinuon ang spelling ug mga pangan sa mga kawani ilabina niadtong hapit na mang-retire.
Maglaum ko nga niining ubos nga liderato ni Regional Trial Court Judge Geraldine Faith Econg sa RCAO makahatag na og mas epektibo nga serbisyo ang buhatan alang sa operation sa korte dinhi sa Visayas area.
