Nganong niwang ang model?
Nyor Gamay (NG): Nyor, di ba duna may survey ning atong pamantalaan kabahin sa mga inilang fashion model sa dakbayan inig human sa tuig.
Nyor Daku (ND): O Nyor.
NG: Unsa may description nimo ani nila Nyor?
ND: Sa mga babaye lang?
NG: O.
ND: Kasagaran tag-as, niwang, mid-teens to early 20s ang pangidaron, dili kinahanglang guapa kay duna may mga make-up artist nga maoy moatiman sa ilang panagway pero kinahanglang maayo sila mulakaw ug di mauwaw nga motutok sa ilang gika atubang, camera man o audience.
NG: Naa ni silay mga grupo.
ND: Ang inila sa ato mao ang MAC, AD models ug Wafer models. Duna say mga bag-o sama ning Stacy’s Exclusive. Pero time pa Nyor. Nganong na interesado man ka aning mga model nga deadma man kaayo ka ani sa una?
NG: Gahisgot man gud ang BBC Nyor kabahin ning “Picture Me” nga usa ka documentary nga hinimo ra pud sa mga model kabahin sa ilang kinabuhi nga gawas sa gasadya duna sad diay mga exploitation, sexual ug phychological. Pero ang akong nahibugngan nga duna diay ubang agency nga ingnan gyud ang model nga di na pakan-on para mo niwang pagbalik.
ND: Wa hinuon na sa ato kay murag part time ra man ang modeling diri. Ang kasagarang mahitabo nga kon manambuk ang model di na tagaan og assignment.
NG: Pero nganong niwang man gyud ang model, Nyor?
ND: Aw dinhis ato suonsuon ra man gud ta. Kon unsay uso sa gawas mao say atong buhaton diri.
NG: Pero gawas man o local nganong niwang man gyuy kinahanglan.
ND: Kon wa ka magdali tagaan tikag lima ka rason.
NG: Yatis ra? Hala fire!
ND: Una, para way kas tila.
NG: Binuang man na Nyor. Pero unsa pay lain?
ND: Para way hilas. Kon ang model nindut og dughan, mamurds og paa unya igwad og lubot, basig ang lawas na hinuon sa model maoy tan-awon sa mga tao imbis nga ang sinena. Kinahanglan mura silag hanger ug dili murag sexy dancer. Ug kon mahimo dili sad sila paguapahon og maayo kay beauty pageant na unya ang salida ug dili na fashion show.
NG: Bitaw sad. Unsa pa, Nyor?
ND: Kasagaran sa mga designer gay. Ang model maoy ilang alter-ego, ilang avatar. Di ba daghan sa mga model medyo androgynous ang dating? Flat silag dughan para dili kaayo sila babaye tan-awon. Gi project sa mga model kon unsa ang perfection sa hunahuna sa mga designer.
NG: Sa ato pa Nyor extension sa mga bayot nga designer ang mga model? Unsa pa kahay laing rason Nyor?
ND: Market forces. Parehas og major target ang couture ug RTW: ang batan-on ug ang gustong mabatan-on pag-usab. Kinahanglang niwang ang model pero tag-as para mahimo na nilang sul-ubon ang sapot sa mga hamtong. Mao nga teen ang majority sa mga model. Ang mga teen wa pay bilbil ug buy-on. Apan tag-as sila para hamtong sila tan-awon ug dili murag batang gagmay.
NG: Sa ato pa mura silag symbol sa “fountain of youth?” mao nang dunay tindahan nga “Forver 21.” Ug nga kon mo-aksyon na silag burot di na sila batan-on tan-awon.
ND: Korek ka dyan! Ug in relation to that, mao ang ilang age bracket. Gikan sa 14 anyos paingon ngadto sa 21 ang active career sa model. Murag 25 man ang edad sa babaye nga moyatyat na ang bukton, molapad na ang bag-ang ug buy-unon na. Unya tagsa naman lay mag model aning edara kay kasagaran nila manganak na, maminyo na o manarbaho para may mas regular ang sweldo. Ingnon ta lang nga ang modeling phenomenon rebellion against nature and aging. As with all rebellion –it’s not the winning but the spirit of fighting that matters.
