Pasko na gyud! Maayong Pasko!”

Unsay Pasko alang sa mga tawong naghambin og grabeng sakit ug niadtong dunay mga dagkung problema nga giatubang?

Mag-unsa ang kuwarta alang sa paglipay-lipay kun dehado na ang lawas sa tag-iya sa kuwarta?

Unsay Pasko alang niadtong mga igsoon nato nga wa gyud makasabot kun unsay tinuod nga mensahe sa Ginoo nga ultimong  pagtabang sa  mga nagkinahanglan sulod sa bay, dili gani makatunol?

Alang nako ang labing bililhon nga butang nga akong pangayoon sa Ginoo mao ang grasya sa maayong panglawas ug pagkamapahiubsanon sa tanan.

Kay sa pagkamapahiubsanon anhi kita makabaton og gugma ug katagbawan sa kuwarta ug butang nga atong maangkon niining mga  panahona.

Ang pagkamahiubsanon sa tawo maoy tinubdan pagpapas sa mga tag-as kaayo og garbo nga ang pagkagarboso sa tawo maoy sinugdanan sa iyang pagkamangtas ug pagkamapahitas-on nga kini  maoy sangputan sa  kagubot.

Busa atong hangpon kining dakung kasaulogan nga puno sa gugma ug pagmaya. Merry Christmas natong tanan!

* * *

Niining nagkaduol na ang Pasko, daghan na kaayong mga impormasyon nga akong nadawat bahin niining pagkatap sa mga substandard ug mga low quality nga mga produkto ilabina sa mga Christmas decorations ug Christmas lights nga anaa sa mga bay patigayon.

Di lang mga Christmas  décor  lakip  na ang mga appliances  nga de bateriya ug de kuryente ug mga charger  sa cellular phone nga delikado sa sunog.

Si Fire Chief Inspector William Tacaldo kinsa  maoy Cebu City Fire Marshal miingon nga dili ilang trabaho ang pag-confiscate niining mga substandard  nga mga  produkto kay  trabaho  kini sa taga Department of Trade and Industry (DTI).

Andam silang motabang kang DTI Director Asteria Caberte kun mag-umol kini ug task force aron seryosohon ang kampanya nilang anaa sa  gobyerno.

Maglaum ko nga dili lang ang taga  DTI ug BFP ang magtinabangay  niining maong kampanya kun dili moapil unta niini ang taga Bureau of Customs kay makapaisa kini sa kilay kun nganong nakalusot kining mga  produkto nga mga substandard.

* * *

Gipasabot ni Department of Labor and Employment in Central Visayas Regional Director Ma. Gloria Tango nga ang deadline sa mga kompaniya nga mohatag sa ilang mga trabahante sa 13th month pay karong Disyembre 24.

Gituyo kini nga mandatory gyud ang 13th month pay sa labor law aron  dunay pang-noche buena ang pamilya sa mga trabahante nga salo-salohan sa pagsugat sa Pasko.

Pero parte sa Christmas bonus discretion na sa mga kompaniya kun  mohatag  ba o  dili.

Pero ang presidente sa Mandaue Chamber of Commerce and Industry nga si Philip Tan kinsa mahigugma-on sa iyang mga trabahante ug nagtuman sa labor laws nanawagan sa iyang mga kaubang  negosyante  nga mohatag gyud sa  mga  kaakohan  sa  mga kawani.

Iyang gipasabot sa among programang “Dialogue on The Air”  niadtong Sabado sa dySS Super  Radyo  nga ang  paghatag og maayong suweldo ug benipisyo sa mga kawani suklian kini og maayong performance.

Pagkanindot kun ang tanang mga negosyante susama pa unta og  panglantaw.

Samtang  gipasabot  ni Director Tango,  Grace Carreon ug manalalaban Glen Tabon sa Regional Tripartite Wages and Productivity Board (RTWPB) nga andam na silang mopatuman karong Biyernes, Disyembre  7 sa wage order no. 17 nga mag-usbaw  og P22 sa  suholan  sa mga trabahante  dinhi sa Central  Visayas.

Basi  sa records ni RTWPB Board Secretary Carreon nga duna  nay  usa ka kompaniya ang nangayo og exemption sa implementasyon sa bag-ong minimum wage.

Sila si Winnie Badayos ug Elpedio Caterbas Chairman ug Secretary General sa Ama Sugbo KMU mipadayag nga kuwang gyud kaayo ang increase sa suweldo.

Gani matud nila nga ang P22 pesos nga usbaw dili makapalit og usa ka kilong bugas.

Matud ni Badayos nga ang tukmang income sa usa ka kawani mao  ang pagdawat og P900 kapin nga  suweldo matag adlaw aron makapakaon og insakto ug makapa-edukar ug tarong sa mga  anak.

Gisaway usab ni Badayos ang ubang mga kompaniya kay puwerte  kaayong makadaug-daug sa mga trabahante bisag maayo ang performance.

Wa sab nila palabya ang pagpadayag ug kahi-ubos sa taga DOLE kay dili gyud  makahatag ug proteksiyon sa  mga trabahante nga  taktakon dayon kun mangreklamo  sa benepisyo ug suweldo.

* * *

Gubot pas lukot ang kahimtang sa pulitika sa mga kaalyado ni Presidente  Noynoy Aquino dinhi sa Sugbo taliwa nga mi-anonsyo ang Presidente nga way mahitabong “free zones” sa  mga  local candidates.

Makaingon ko nga wa pay klaro kining tanan ug wa pay  kasigurohan ilabina nga ang Liberal Party (LP) nga iya sa Presidente pabiling nagpalandong sa National Unity Party (NUP)  diin ang One Cebu Party nga iya sa mga Garcia sakop sa NUP nga gilangkuban sa mga dagkung  partido sa  nasud.

Unya na ko motuo sa Presidente kun mobuwag boluntaryo ang Liberal Party sa NUP o ba kaha makig-gubat siya sa hierarchy sa NUP nga taktakon ang One Cebu.

Karon gud makalibog kaayo kay ang One Cebu nga  mga  kandidato  nakakuha  ug party nomination sa NUP unya gidawat kini sa taga-Commission on Elections.

Sama sa akong giingon kaniadto nga advantageous kaayo sa mga  milansar pagka-senador ubos sa NUP-Liberal Party ang “free zones” sa mga local candidates kay makuha nila ang “back-to-back support” gikan sa mga local political party.