Mga Classmate ni Calungsud

Kagahapong adlawa may dakong panagtapuk sa South Reclamation Coastal Road diri duol sa amo sa Mambaling kay didto man ang us aka nasudnong pagsaulog sa Pagka santos ni Pedro Calungsod.

Gi-ingong taga Ginatilan kining atong unang santo ning atong lalawigan. Apan lagi tingod sa kakuwang sa record magpabilin kining lalisunon. Gani duna nay lain nga mga probinsya nga miangkon nga lumad nga tagaila ang ikaduhang santo ning atong nasud.

Gahapon sa udto miabot ang among silingan nga bata sa una nga karon pari na. Gidala niya ang youth sector sa ilang congregation nga Franciscans of the Immaculate, Philippine Mission. Mga taga Talamban, Consolacion ug Lapulapu ang mga teens nga iyang gidala uban sa iyang pipila ka pare ug brothers. Mikalit og ka sadya ang among tugkaran ug wa lang damha nga naka apil mis nasudnong pagsaulog alang kang San Pedro Calungsod. Napuno sa kanta ug katawa ang among lugar.

Matud pa ni Padre Harry, gibanabana nga moabot ug usa ka milyon ang mosaulog sa misa sa 27 hectarya nga luna sa South Reclamation area.

Ang atong santo usa lamang sa pito ka mga bag-ong santo nga gi-canonize sa simbahang katoliko karong tuiga. Ang mga classmate ni Calungsod sa pagka santo mao sila ni: Kateri Tekakwitha, Jacques Berthieu, Anna Schaeffer, Maria Anne Cope, Giovanni Battista Piamarta ug, Maria del Carmen.

Upat sa ka batch sa atong Santo mga babaye. Ang ato rang santo maoy taga Asia. Taga Europe ug America ang uban.Kasagaran kanila nalambigit sa missionary work. Si Calungsud ug si Berthieu mao may mga martyr nga gipatay tungod sa ilang trabaho.

Ambot kon nahibawo si Padre Harry niani apan usa mga bag-ong santos usa ka Franciscan. Si Santa Maria Anne Cope usa ka Americana nga kaliwat og German misulod sa Francisan order ug tibuok kinabuhi niya iyang gisilbi sa Leprosarium sa Hawaii.

Ang laing Americana nga Santa nga si Santa Kateri Tekakwitha mao ra ang susama kang Calungsod nga dili Caucasian. Si San Pedro Calungsod, tungod sa iyang ubos nga pangidaron gihimo sa simbahan nga patron sa mga batan-on. Apan ang Italyano nga si San Giovanni nga maoy tigtabang sa mga batan-ong nagkalisud gihimo sa simbahan nga patron sa mga nangitag trabaho.

Maayo tingali nga sampiton ninyo kining pito ka santos karong gabii kay higunhugon nga nagpadung na ngari si Pablo. Dili si San Pablo kon di Bagyong Pablo. Mamasin lang kita nga way dakong kadaut nga ma dala kini si Pablo. Pangayuon ta kini ni San Pedro Calingsod ug sa iyang mga batchmates.