Transparency lang unta sa Balili property

Ngan nga gipanag-iya sa kagamhanang probinsyal ang kontrobersiyal nga Balili  property haum  lang sab siguro nga abli kini sa tanang Sugbuanon nga gustong  manukidoki.

Dili na kinahanglang mananghid pa sa Kapitolyo o ba kaha ni Provincial Administrator Eduardo Habin kadtong intresado nga mosulod ug mo-obserbar sa gihimong pagpalambo.

Kun seryoso ang Garcia administration sa tumong nga palambuon gyud ug nindoton ang napalit nga lote samtang wa pay court order  pagpahunong kinahanglang transparent lang unta sila aron mawagtang ang mga pagduda.

Insakto si Kongresista Pablo John Garcia nga way probisyon sa balaod nga nagpugong sa  usa  ka  local government  unit nga  mopalambo  sa napalit nga luna ilabina sa Balili property nga duna nay ocular  inspection report ang taga-Ombudsman Visayas kaniadto nga maoy nagpahigayon  og  fact-finding  investigation.

Sa laktod nga pagkaistorya wa mawala ang “corpus delicti” o “body of the crime” sa kaso kay anaa ang mga kwestyonableng dokumento ug ang “field inspection report.”

Ang sayop niini mao ang taga-Sandiganbayan nga wa gyud  mopagawas  og kamandoan nga  i-preserbar  ang Balili property samtang  pending ang mga kaso batok nilang Gov. Gwen Garcia ug mga  kaubang  akusado.

Apan in fairness, wa koy nakitang dautan niadtong inspection nilang Vice Gov. Agnes Magpale ug Board Member Arleigh Sitoy sa Balili  property  uban  sa  mga militanteng grupo.

Wa sab ko kasabot kun nganong mahug kadtong trespassing nga sa  unang  bahin  iya  man  sa gobyerno ang lote.

Ang labing nindot nga isyu karon nga angayng tutokan ni Deputy Ombudsman Pelagio Apostol mao ang paggahin og P27 milyones sa Kapitolyo nga giingong way specific approval sa Cebu Provincial Board pagtambak ug mga filling materials sa mga parte sa 24.- hectare property.

Laing issue niini mao kun angay bang hinganlan ug “reclamation project” kining gihimo sa taga Kapitolyo o ba  kaha “restoration” lang.

Kun moingon tag reclamation nagpasabot nga dako ang area sa  hunasan ug baybayon nga tambakan og mga filling materials. Pero sa arguments sa mga Garcia dili gyud kini mahug nga reclamation kay  titulado naman ang propiyedad.

Ang prinsipyo man gud sa balaod kun reclamation mao nga mananghid ug mangayo pa og approval ang usa  ka local government  unit  sa Public Estate Authority una makasugod ang reclamation project unya inig kahuman mao pay pagpa-titulo sa lugar sama diha sa North Reclamation ug sa Cebu South Road Property.

Kun moingon tag “restoration” sa simpleng Binisaya with all due respect, mao nga ipauli ang karaang  estado  o porma  sa  propiyedad.

Atong sakyan ang gigamit nga termino nga “restoration,” nagpasabot  ba nga dunay ebidensya ang Kapitolyo nga kaniadto dili gyud lubog sa tubig dagat unya  gikawotan lang sa mga Balili aron makaabot ang tubig dagat sa ilang luna?

Kun naa man, mas maayo tingali nga ila kining ipresentar sa  publiko.

Kung naa man haskang ngilngiga gyud sa pamilyang Balili kaniadto kay sa tibuok Pilipinas sila ray nakahimo og dagat nga miabot sa ilang tugkaran.

Sa isyu ni Deputy Ombudsman Pelagio Apostol sa iyang wa pagtagad sa mga bag-ong isyu bahin sa Balili property alang nako mas  maayong hingusgan ni Liberal Party gubernatorial bet Junjun Davide ang pagpalayas  ni Apostol.

Suweto si Junjun Davide sa patakaran sa Ombudsman kay gikan siya sa maong opisina ug diha siya na-abogado.

Sa panahon ni Davide sa Ombudsman, si Deputy Ombudsman Arturo Mojica pa maoy ilang opisyal ug pwera buyag kadto maoy panahon nga haskang sikata sa Ombudsman Visayas kay apilon pag-imbestigar     bisag ang isyu sa pagdala og “Viagra” ni kanhi Cebu City mayor Alvin Garcia.

Nawala ang eagerness pag-conduct og “motu propio” investigation pagsugod og lingkod ni Deputy Ombudsman Primo Miro ug hangtud  karon magpili na kun kinsay imbestigahon.

Mitagam na sab ning opisinaha nga gamiton lang sila sa pamolitika, pagpang-harass ug panimawos sa ubang tawo.

Pero alang nako, bisag unsa pa unta ang motibo apan ngan nga dunay igong sukaranan kinahanglang tumanon nila ni Apostol ang ilang constitutional  duty pag-proteher sa kwarta sa  katawhan.

* * *

Subo gyud kaayong  palandungon  nga dunay usa  ka sakop sa Task Force Alpha ang nadakpan sa pagpangilkil unya dunay laing reklamo ang gipaabot sa pundok sa mga drivers batok sa task force didto sa Land Transportation Office Manila.

Tungod sa maong salawayong binuhatan dili malikayan ang mga  pagduda sa publiko nga daghan pa sa ilang sakop ang miabuso ug  mipahimulos sa ilang pagka-deputized agents sa LTO.

Gani akong nahibaw-an nga dunay pipila ka mga personnel  sa Task  Force Alpha ang nang-resign tungod kay na-demoralize sa nahitabo ug naulawan.

Apan giklaro sa presidente sa task force nga si Yolando Solibio atol sa among programang “Dialogue on the Air” sa dySS Super Radyo  niadtong  Sabado nga pabiling intact ilang grupo ug way  mi-resign.

Miingon si Solibio nga ila nang gitaktak sa task force ang  nagpabadlong nga personnel.

Samtang si LTO Central Visayas Assistant Director Arnel Tancinco  miingon nga automatic nilang gi-revoke ang pagka-deputized agent sa maong myembro agig pagpaabot  sa mensahe  nga di sila mo-tolerate.

Ang presidente sa task force miingon nga wa silay gisanto sa ilang pagpanakop.

Gikorehian usab niya ang alegasyon nga gigamit lang ilang grupo sa  mga negosyante.

Pero ngan nga nag-atubang pa og imbestigasyon ang Task Force Alpha mas maayo tingali nga dili una sila mo-conduct og mga operations aron dili sila  maapeke ug maalanganin.