Unsay mahimo sa KBP sa mga radio block-timers?
Maduhig ang way labot niining ubang taga radyo ilabina sa mga radio block-timers nga makapalit ug oras alang sa ilang mga programa sa radyo nga way laing tumong nga mao ang pagpangomentaryo nga lahap kaayo batok sa mga tawo nga kontra sa ilang amo nga nagbayad sa ilang oras ug pag-endorso sa mga tambal ug ubang advertisements nga ug nila pa makabuhi ug patay.
Maayo tingali nga imbestigahon sa mga opisyales sa Kapisanan ng mga Brodkaster ng Pilipinas (KBP) ang nahitabong eskandalo human nasikop si Arman Cuban usa ka radio block-timer tungod sa iyang pangwarta ug P45,000 sa usa ka reklamante.
In fairness wa ko maka-ila ni Arman Cuban nga magsisibya sa radio dyLA sa matag adlaw’ng Domingo. Pagkatinuud lang basta Domingo pawong gyud akong radio monitor kay kini ray adlaw nga akong i-relax uban sa akong pamilya mao nga wa ko maka-ila kaniya.
Na-shock nalang ko sa akong mga nabasahan kagahapon sa atong mga local dailies sama dinhi sa Cebu Daily News nga namantala ang maka-uuwaw kaayo nga binuhatan ni Cuban nga nagpatoo nga makasulbad sa problema sa magtiayon.
Nanghambog sab siya’ng makamao mobarang ug mamaktolay. Ang nakaporke lang sab kay duna gihapoy mga tawo nga motoo ni’ng mga klaseha nga patoo-too.
Kining klase’ng racket way kalainan sa ubang mga radio block-timers nga nagsibya ug mga numero sa masiao operations nga klarong pangilad ngadto sa listening public.
Ang ako ba, nganong makasayon-sayon ra man ni’ng mga tawhana nga makahupot ug mga programa sa radyo ug makamantala sa mga pahayagan?
Ayaw ko’g ingna nga ingon ani gyud ka intuil ang mga radio stations ug mga tagdumala sa mga local dailies nga motugot nalang sa mga kabuang ni’ng mga klaseng personalidad?
Alang nako usa ka daku’ng binuang sa broadcast industry kini’ng mga disclaimer sa radio station matag human sa programa nga mo-ingon dayon nga “ang huna-huna ug opinyon iya ra kadto sa magsisibya ug way labot ang sibya-anan.”
Panahon na seguro nga istriktohon sa KBP ug sa mga radio stations kini’ng mga radio block-timers kay maoy nagdala’g dang an ni’ng atong profession nga dugay na natong gi-ampingan.
* * *
Subo gyud kaayong palandungon nga nag-positibo sa E. coli bacteria ang mga water samples nga gipangkuha sa mga tinubdan sa tubig sa mga dapit sa lungsud sa Alegria nga didto mi-grabe ang sakit nga tipos.
Nagpasabot lang kini nga ang hinungdan sa typhoid fever mao ang kagaw sa tubig nga gigamit sa pag-inom.
Kini maoy klarong timailhan nga wa gyud magpakabana ug wa gyud magtagad ang mga opisyales sa Alegria ug taga Kapitolyo gikan niadtong unang pagkahitabo.
Kay kun nanarbaho pa’g tarong ni sila, wa nay kagaw sa tubig diha sa Alegria.
* * *
Wa ko masayod unsay hinungdan sa pagka-ospital ni kanhi presidente Gloria Macapagal-Arroyo.
Mao bay gumikan sa pag-ininom sa mahalon nga kape gikan sa Pagcor nga matud pa ni presidente Noynoy Aquino nga gigahinan kini ug P1 bilyon sa mga kanhi namuno-an.
Kagahapon, miingon kanako si Deputy Ombudsman Pelagio Apostol nga andam nila’ng imbestigahon kining maong isyu kun napiksan man sa anomaliya ang mga nagdumala sa mga Pagcor-Casino dinhi sa Kabisay-an.
Pagkatinuud lang sukad na sukad wa pa gyud ko makasulod bisan usa ka higayon sa atong mga Casino dinhi sa Sugbu nga gikabu-angan sa uban.
Mao nga ang akong natilawan nga kape mao ra gyud ang bugas nga gisangag (sinunog nga kape) nga nakuha nako gikan sa akong pinanggang amahan ug kadtong marka dragon ug kini’ng mga commercial nga kape nga makaya sa bulsa.
Puwerte’ng grabeha gyud diay naka-wari-wari sa kuwarta ang kanhi nga liderato ni PGMA.
Tagpila man diay ang matag baso niadtong maong matang sa kape? Kinsa may mga nakapahimolos kaniadtu?
Unsa ka tinuud kini’ng mga naggawas nga impormasyon nga si kanhi First Gentleman Mike Arroyo ang responsable sa maong anomaliya?
* * *
Usa ko sa mga natagbaw sa ikaduhang State of the Nation Address (Sona) ni presidente Noynoy Aquino niadtong Lunes sa hapon.
Samtang konbinsido ko nga wa pa siya’y dagkung mga accomplishments sa iyang pagdumala apan nakita nako nga seryoso ug sinsiro ang Presidente pag-gukod sa mga anomaliya sa miaging pamunuan ug sa ubang mga ahensiya sa gobyerno nga natakdan.
Kinahanglan gyud nga tutukan ni Aquino ang mga ahensiya sa gobyerno nga nag-una sa corruption sama sa Department of Public Works and Highways (DPWH), Bureau of Customs ug uban pa.
Ang grabeng corruption maoy nag-unang hinungdan kun nganong wa gyud kita molambo.
