Misamot karon kadaghan ang mga adik sa mga ahensya sa gobyerno lakip na sa mga nagkalain-laing mga local government units.
Wa nay mapili kay sigun sa pinakauwahing report sa Philippine Drug Enforcement Agency nga daghan sab karon sa atong mga opisyales sa gobyerno ang nalambigit sa negosyo sa drugas.
Kuyaw kun moabot ang punto nga “druglord” nay molingkod sa Malacañang.
Dinhi sa Central Visayas, dunay mga pulis ug mga bombero nga nag-positibo sa paggamit og ginadiling drugas.
Akong kasaligang tinubdan nagbutyag nga napun-an ug laing 10 ka mga sakop sa Bureau of Fire Protection (BFP) ang nagpositibo sa drug test.
Sa 10, pulos sila mga lalake unya duha ang gikan sa Negros Oriental samtang ang walo gikan dinhi sa Sugbo.
Ang akong tinubdan midugang nga kadtong unang nagpositibo sa drug test nga opisyal nga babaye nga nahimong deputy fire marshal ug laing tulo ka mga sakop, pulos sila positibo sa gihimong confirmatory test.
Gani gipaubos na karon sila sa summary dismissal proceedings human nanag-atubang og mga kasong administratiba.
Maglaum ko nga hugtanong ipatuman sa tanang mga ahensya sa gobyerno ang “one-strike policy” batok niining mga adik.
* * *
Dugay na ko nakasabot sa akong amigo nga si manlalaban Noel Archival nga atua siya midapig sa kampo ni kanhi kongresista ug Philippine Benevolent Missionaries Association Supreme Master Ruben Ecleo Jr.
Niadtong wa pa gikonbikto ni Regional Trial Court Judge Soliver Peras si Ecleo sa kasong parricide pagpatay sa iyang asawa nga si Alona, si Archival nga makigtabi kanako mahilig siya nga mopagawas sa iyang opinion nga maabswelto gyud si Ecleo.
Namatud-an na gyud ang pagka-biased sa akong amigo kay niadtong Lunes sa buntag, miduso si Ecleo og manifestation sa korte nga iyang kuhaong abogado si Archival isip dugang pwersa sa iyang mga abogado nga nagbase sa Manila ug isip hulip kang manlalaban Orlando Salatandre.
Sa samang manifestation gipasabot ni Ecleo nga ang iyang address anaa ra sa Forest Hills Banawa Guadalupe ning dakbayan.
Pero sa akong basa ug panuki-duki sa pirma sa ibabaw sa pangan ni Ruben Ecleo akong naobserbahan nga di gyud iyang signature kay lahi sa mga unang pirma niya sa mga dokumento nga anaa sa korte.
Gawas pa maklaro sa stroke sa maong pirma nga daw ang tawo nga nagpirma nagpangurog ug nagduha-duha kun mao ba gyud ang pirma sa pinangita nga magbabalaod.
Sa habig sa prosecution panel pinaagi kang manlalaban Alfredo Sipalay mihulagway sa manifestation ni Ecleo nga “a mere scrap of paper.”
Gihagit si Ecleo sa prosecution team nga mo-surrender ug mipatim-aw sa korte kana kun gusto niini nga mo-avail og mga legal remedies.
In fairness sa akong amigo nga si Archival, makasabot lang sab ko nga moapil na siya og depensa ni Ecleo kay tipik kini sa iyang panginabuhi.
* * *
Unsay nahitabo ni kanhi Compostela Mayor Ritchie Wagas nga pabawian man og sakyanan nga Nissan X Trail basi sa kamandoan sa Pasay City Metropolitan Trial Court pinaagi kang Judge Restituto Mangalindan Jr?
Aron pagsiguro nga ma-serve gyud ang subpoena ug court order gi-personal ni Pasay Court Sheriff Ronald Lampitoc Jr . ang pag-execute sa kamanduan sud sa lima ka adlaw.
Apan in fairness ni kanhi Mayor Wagas dili siya ang klaseng tawo nga mosibat sa obligasyon kana kun tinuod man nga duna siyay utang sa RCBC Bank.
Ang RCBC Bank unang mikiha sa korte og kasong “recovery of possession with replevin” batok kang Ritchie Wagas and John Does.
Posible nga buot lang sab seguro sa taga-bangko nga ipa-settle ni Wagas ang iyang tulubagon aron dili na mabira ang sakyanan.
* * *
Di malikayan nga mahisgotan namong mga sakop sa prensa ang kalibutan sa sports human sa kalit nga kamatayon ni Marlon Bellita ug ang pagka-depektoso na karon sa lawas nilang Bong Soriano ug Sammy Yncierto.
Kay ang dakung kawad-on nga butang namong mga sakop sa media mao ang paugnat sa kusog nga kini maoy maghatag og higayon nga makapasingot og todo.
Pinaagi sa regular nga sports nga dili kinalit-kalit ug dili pinugos maoy bililhon kaayo niining mga panahuna ilabina nga nagkaduol na ang Pasko nga daghang kaon ug inom ug kanunayng kuwang sa katulog.
Makuwang ang katug kay wa na may disiplina sa katug ug magpasulabi ug inom og hudyaka kay way paugnat sa kusog nga sayohon pagmata.
Mao nga akong hangyoon si Cebu City Mayor Michael Rama nga ibalik ang tri-medialympics alang sa tanang mga sakop sa media ma-sakop o dili miembro sa Kapisanan ng mga Brodkaster ng Pilipinas ug makaduwa bisan asang department.
Tinuodanaa ang among pundok sa NBAC kon Newsmen Basketball Association of Cebu apan exclusive ra gyud intawon kini sa mga news personnel base sa by-laws.