Nindot kaayog script si Joavan Fernandez sa iyang tubag sa bag-ong kontrobersiya nga iyang gikalambigitan sa pagpusil sa cashier’s booth sa Shell station sa dakbayan sa Talisay niadtong Domingo sa kadlawon.
Alang ni Joavan nga legal na og wa na siyay tulubagon sa iyang pagpamusil.
Unsay iyang giingon nga anha siya magtubilan kay duna silay account? Kun duna pay account nganong balibaran gud tawon siya nga kwarta naman na.
Kinsa man sab siyang tratahon isip santos ug VIP nga duna naman siyay atraso diha ug nakaila na man ang mga trabahante sa iyang pagkaabusado?
Gusto pa sa kanahan nga mosimpatiya niya ang publiko pinaagi sa pag-ingon nga ang hinungdan sa pag-ulbo sa iyang kalagot kay dul-an 30 minutos niyang pinaabot unya wa gyud siya tubili ug gasolina nga unta kuno maghatod siya ug tambal sa iyang inahan nga anaa sa ICU sa usa sa mga ospital.
Inay kuno unta tubilan dayon siya apan naglumba na hinoon og panagan ug panulod sa convenience store.
Pagkadaghang gasoline station nga iyang kabalhinan kun naglikay pa lang siya og atraso. Yabag gyud!
Gibogoan na lang gyud si Joavan sa mga tawo nga adto motuo kaniya?
Unsay pagtuo ni Joavan ipakasama niyang iresponsable ang iyang amahan nga si Mayor Socrates Fernandez nga di magpundo og tambal alang sa iyang hinigugma?
Kita pay ilaron nga emergency kuno nga duna may tambal ang taga-ospital sa mga pasyente. Ingon pa lang siya nga dunay emergency pot session kana motuo ko.
Kun tarong pa si Joavan nganong wa man siya monaug sa sakyanan ug magpakilooy aron maka-utang siya ug gasolina ug i-esplikar iyang sitwasyon?
Buotan pa nang tawo nga mamusil kay wa pautanga?
Otro sab ning iyang amahan nga konsintedor nga si Mayor Socrates Fernandez.
Simbako ako pay na-amahan si Joavan dugay na nako nang gigaid sa doldol aron dili mamiligro ang kinabuhi sa uban ug dili makamantsa sa pangan sa akong apilyedo.
Kumusta man tuod ang inutil nga hepe sa dakbayan sa Talisay nga si Supt. Eddie Recamara?
Hangtud karon wa pa gyud sila makadakop ni Joavan? Pagkabulay-og! Maypa mang-resign mo kun di mo kadakop ni Joavan.
Kun tarong pa sab ni si Mayor Fernandez siya maoy mangunay pagpa-surrender ni Joavan.
Warning lang ngadtong Mayor Soc nga daghan na ra ba kaayong mga ginikanan ang naunay ug kabiktima sa ilang pagkakonsintidor.
* * *
Asa man diay ang ubang mga pulis kun tinuud nga nangilog og armas kadto si Glen Cagulada nga sakop sa Alpha Phi Omega (APO) sa service fire-arms ni PO2 Antonio Alister Tejero sulod sa San Nicolas Police Station 6 nga giingong naghikog niadtong pagkaudto sa adlawng Lunes?
Instinct naman siguro na nga kun dunay kaubang pulis nga giilogan ug armas nga namiligro ang kinabuhi kinahanglang tabangan siya sa iyang mga kaubanan.
Kinahanglang imbestigahon kini aron masuta gyud uy.
Mangambot lang sab ko kun tinuod ba gyud nga nakasuwat pa si Cagulada ug “Sori B” sa iyang nagpasad nga dugo taliwa sa injury nga iyang naangkon gikan sa 9-mm pistol.
Ma-positive o ma-negative ang resulta sa paraffin test ni PO2 Tejero apan di gihapon kini conclusive kun angay na ba siyang ilibre sa imbestigasyon.
Lisud sab ning hikuga ni Cagulada kay nang-angin ug mga pulis.
* * *
Mityabaw na sab intawon ang atong mga kaigsoonan diha sa dakbayan sa Naga kay namonbon og coal ash ang sulod ug gawas sa ilang mga panimay.
Pwerteng paita gyud sa ilang kahimtang ilabina panahon sa tingkaon kay dunay mga itom-itom nga manugpa sa ilang plato.
Way laing gidudahan kun dili mao ang pondohanan sa mga coal ash nga iya sa Korean Electric Power Corp-Salcon Power Corp nga bukas kaayo.
Maglaum ko nga di magtugtug sa pansitan ang atong mga kadagkuan sa gobyerno niining maong problema kay risgo baya kini sa panglawas.
Obligasyon usab kini sa Kepco-SPC paghipos sa ilang hugaw.