Seryoso na gyud ang kapulisan sa masiao

Karong semanaha ug gani possible karong adlawa relibohan na ang Bohol Philippine National Police (PNP) provincial director tungod sa kainutil  pagpakgang sa mga illegal nga sugal sa iyang area ilabina sa masiao.

Si Police Supt. Paul Labra II nga  maoy nag-representar kang Police Regional Office in Central Visayas Director Chief Supt. Marcelo Garbo mitug-an sa programang “Dialogue on the  Air” sa dySS Super Radyo  nga  di  magdugay ipatuman na ang relief order batok sa opisyal.

Samtang ubos sa liderato ni Cebu PNP Provincial Director Senior Supt. Patrocinio Comendador akong nahibaw-an gikan kang Supt.  Jonathan Pineda nga dunay 19 ka  mga chiefs of police sa Sugbo ang gihatagan og warning tungod kay minus kaayo ang operation batok sa  masiao.

Ako sang nahibaw-an kang Supt. Arnel Banzon sa Cebu City Police Office nga naninguha sila pag-monitor sa mga hepe sa kapulisan nga  magdawatan og payola  apan  wa pa gyud silay proyba. Nahibaw-an sab nga duna nay mga station chief ang gipang-ilisan tungod sa pagkainutil.

Sa dakbayan sa Lapu-Lapu ug Siudad sa Mandaue  pinaagi  sa  mga representante nga sila si Senior Insp. William Homoc ug Senior Insp.  Philip Silva miingon nga wa gyud sila magpabintaha kun ang hisgutan performance sa operation ug dinakpanay sa  mga nalambigit sa sugal sa  ilang mga lugar.

Si  Eliodoro Sanchez production manager sa dyDD Bantay Radyo miangkon nga  duna silay block timer grupo nilang Mhar Mendez nga nagsiby  sa resulta sa lotto apan legal  ang tanan  kay  adto na  kini  isibya sa  lawom nang kagabhion.

Sila si National Telecommunications Commission (NTC) Director Jesus Laureno ug ang NTC legal officer nga si manlalaban Alan Felix Macaraya Jr. miklaro nga way nalapas ang Bantay Radyo kay wa kini mohatag  og  tips o  numero sa  mga number combinations nga  padag-on.

Apan matud pa nila nga di gyud sila maka-monitor og tarong sa mga  programa sa radyo kay kuwang sila og personnel.

Kun dunay moreklamo andam nilang aksyonan.

Samtang sa isyu sa kalambigitan nilang Cordova mayoralty  candidate Rex Wakee Salud ug Inayawan barangay captain Rustom  Ignacio giklaro sa kapulisan nga hangtud karon wa pa gyud silay igong  basehanan nga ang  duha maoy mga dagkung  masiao financier sa Sugbo.

Buot ipasabot nga hangtud karon padayon ang ilang pag-monitor sa duha ka mga personalidad.

In fairness sa duha nga among gipangtawgan aron makatubag si Salud di gyud makontak samtang si Ignacio morason nga di lang siya  mo-on the air kay misaka ang iyang sugar.

Pero ambot lang kun molampos ba gyud ang mga awtoridad sa ilang  kampanya kay subo kaayong palandungon nga daghang mga pulis ang  magdawatan og protection money sa mga gambling lord.

Wa gani sila makagukod niining mga mikompetensya ug mga illegal lotto outlet.

* * *

Ambot kun unsa gyud ang motibo sa pagpusil-patay kang radio commentator Julius Causo didto sa Cabanatuan City, Nueva Ecija sa miaging semana?

Si Causo kinsa anchorman sa dwJJ giingong naglakaw sa dalan gikan sa ilang sibyaanan ang kalit lang gipusil sa nag-angkasay sa motorsiklo.

Hangtud karon gisubay pa sa mga awtoridad ang motibo sa krimen ilabina ang pag-ila sa mga mamumuno.

Kun politika man ang hinungdan sa iyang kamatayon tungod sa pagtuki sa mga negatibong isyu sa mga politiko sa ilang lugar mahug nga si Causo maoy unang magsisibya ang gipatak-om niining nagkaduol na ang eleksyon.

Maayo unta kun igo ra siyang  gipatak-om  pinaagi sa pagtaral  sa kasong libel.

Nabalaka ko kun politika maoy naingnan sa iyang kamatayon kay posibleng manakod kini.

Dinhi ra ba sa ato nakadawat na ko og daghang impormasyon nga grabe na ang gubat sa mikropono sa mga gipang-hire nga mga political block timers.

Personalan na ang isyu ug wa na mag-promote sa ilang mga politiko nga gipangpaluyuhan.

Si Laureno mitug-an nga wa pa makadawat ang ilang buhatan batok  sa mga sibya sa mga political block timers.

Iyang gipasalig nga andam niyang imbestigahon kun dunay  mangreklamo.

Si Macaraya miklaro nga di gyud ma-exempted ang mga sibyaanan sa radyo pagbayad og danyos sa  panahon nga  ikiha ang ilang  mga block timers.

Miingon ang duha ka mga opisyal  sa  NTC nga  moestrikto na karon sila sa pag-monitor sa mga sibya sa radyo ug mohimo sila og linaing recording aron pagsubay sa mga violations sa broadcast code.

* * *

Congratulations sa akong mga ka team mates sa GMA-7 Cebu nga  midaug gyud mi kagahapon sa unang hugna sa best- of-three sa championship series batok sa taga TV-5 diha sa New Cebu Coliseum sa dalan Sanciangko ning dakbayan.

Ang akong papel kagahapon mao ra gyud ang pag-depensa sa sinaligan sa TV-5 nga si Noel  Sanico kinsa gihulagway sa akong mga  kaubanan nga milampos ko pagdepensa  kaniya.

Mangayo lang ko og despensa ni Noel kinsa kanhi among  kauban sa GMA-7 Cebu nga sa hugot nakong  depensa nakahimo ko og usa ka  hard foul kaniya tungod sa kamaayo niyang moduwa unya idlas pa  kaayo.

Sa sunod Domingo puhon maninguha gihapon mi sa GMA-7 nga  modaug aron hingpit na  namong  makuha sa kampiyonato nga makakulit og laing records sa Newsmen Basketball Association.

Again, salamat kaayo sa management sa Cebu Eastern College, nila ni Sir Jeff Go, Sir Sammy Sia ug Sir Johnny Maraat nga mipagamit sa New Cebu Coliseum.