On gay grass

Love Guru (LG): O, Nyor Gamay, dayun. Dayun ning gamay tang tolda.

Nyor Gamay (NG): Uy sorry Love Guru, murag sayo ra kaayo ko. Wa pa man diay kay kaligo.

LG: Hahaha. Siaw gyud ka Nyor, da. Dili man ko kada adlaw maligo. Every other day ra ko maligo para ma maintain nako akong pulso ug paglikay sab sa panuhot. Makadaginut sad kos tubig ug sabon. Basta do ko panington og maayo di ra man sad ko manimaho.

NG: Ha? Mao ba?

LG: O, Nyor. Naa gyud hinuoy manga tao nga di mahimutang kon di makaligo. Pero, time sa, unsa man tay akong ika alagad nimo Nyor? Kape?

NG: Ok na Guru. Unya naa ta koy tulo ka pangutana nimo kabahin sa kapildihan sa Republican party sa America.

LG: Daghana sad anang tulo, Nyor, duha lang. Kay moadto pa ra ba ko sa mall kay mubayad kos kuryente. O dia rang kape. Unsa man tay imong pangutana?

NG: Unsa may imong ikasulti aning pagdaug sa pagtugut sa same sex marriage sa o sa pagminyo sa mga tomboy ug bayot sa pipila ka estado sa America?

LG: A, kana. Depende kon asa nga kampo nyor. Kon naa ba ka sa “Love as a means” nga grupo o sa “Love as an end” nga pundok.

NG: Pasabta kuno ko ana Guru.

LG: Sure, Nyor. Kon gatuo ka nga ang gugma o ang paghigugma maoy pinakataas nga awareness o pagamgo sa tao, kon motuo ka nga ang pagbaton og gugma maoy tumong sa kinabuhi, nasakop ka sa pundok nga “Love as an end.” Ko motuo ka niini, kon sakop ka ning maong kampo, wa kay angay kabalak-an ning kaminyuon sa lalake sa laing lalake ug ingon man sa kaminyuon sa babae sa iyang isig ka babae. Kay ang ilang kaminyuon usa man lang ka pagsaulog sa ilang gugma.

NG: Ug sa laing kampo Guru, unsa man say padagan sa ilang hunahuna?

LG: Sa “Love as a means” nga grupo, Nyor, gatuo sila nga ang gugma dunay tumong, dunay kahulugan kon nganong gibati kini sa mga tao. Di sila motuo sa love for love’s sake. Para kanila ang gugma gimugna para makahimo ang mga nahigugma og bata, og pamilya, para magpadayon ang kinabuhi sa tao sa kalibutan. Ikaw, Nyor asa man ka nasakop? Asa may sakto alang kanimo? Ang “Love as a means?” O sa “Love an End?” Kasagaran kuno sa mga wife beater mga “maya-maya” nga wa ka take-off.

NG: Lisud sad nang pangutaha Nyor da.

LG: Hunahunaa lang inig abot ninyo sa inyo kay tutal wa man sad kaha ka magdali. Higupa na nang kape nimo kay mabugnaw na unya na. Kopiko ra na, Nyor, pero okay ra baya. Unsa may lain nimong pangutana.

NG: Kaning, mangayo ta kos imong panahum kabahin ning tumong sa ubang estado ngadto nga buot mo legalize sa pag gamit sa Marijuana.

LG: Hehe, wa kay angay kagul-an, Nyor. Si Clinton ug si Obama puros na nakatilaw og Marijuana. Wa lang sila mahimong presidente na nga relected pa gyud. Ug kadtong si George W. Bush nga pweti man adtong buguya wa kahay nihagit adto paghingus ug kay pwerti man adtong sipata di kaha to mosuway kon hagiton? Nyor, pwedi rag mohingus kag marijuana hangtud ka molagum naa gihapon kay chance ma presidente.

NG: Mao ba Guru? Murag lami lagi ning imong Kopiko. Wa naa diay ka mag Nescafe?

LG: Usahay. Ako ra na silang pulipulihon para way puol.

NG: Katapusan na lang Nyor. Unsa may buhaton sa mga Repulican para maka presidente sila.

LG: Mo undang sila pagka Christian. Di na sila mag conservative.

NG: Ha?

LG: Ang problema gud sa Republican, buot nila kuhaon ang bagang panun sa mga Americano nga wa na mauyon sa ilang panan-aw ug baruganan. Mao nga kon di nila mausab ang ilang baruganan di na lang sila managan. Kay lisud kaayo ning ilang gihimo -mura silag galanguy nga ga-alsag bato. Nagkagamay naman gud kuno ang mga puti nga butante nga parehas nilag panan-aw. Kanang, excuse sa Nyor, ha. Murag maligo na lang sa ko una ko mubayad sa koryente kay na conscious na hinuon ko nga namatngunan mo ang akong pagka way ligo.