Club 27: Pop goes the obit
Ug tuod man, namatay si Amy Winehouse. Dugay na nga nadawat sa iyang mga ginikanan nga padung na mamatay ang ilang anak tungod sa abuso niini sa inom ug druga. Apan daw gikalitan gihapon sila. Katapusan siyang nahinabi sa iyang inahan usa ka adlaw una siya mipanaw ug ang katapusan kunong gilitok sa galuya nga Amy mao ang “I luv you mum.”
Sa iyang henerasyon, si Winehouse mao ang serious artist nga ingnon tang naka-capture sa imagination sa publiko o at least sa mga music lovers. Jazz-blues-pop hybrid ang iyang mga kanta nga kasagaran siya maoy naghimo. Ang iyang amahan nga si Mitch Winehouse usa ka jazz musician. Ang pinakasikat nga kanta ni Amy Winehouse (nga nakadaug og Grammy) may kalabutan ra usab sa iyang kinabuhi, kini mao ang “Rehab.”
Rehab
“They tried to make me go to rehab but I said ‘no, no, no’
Yes I’ve been black but when I come back you’ll know know know
I ain’t got the time and if my daddy thinks I’m fine
He’s tried to make me go to rehab but I won’t go go go”
Tungod kay 27 anyos man si Winehouse sa iyang pagpanaw, nalakip na karon siya sa Club 27, usa ka imaginary nga kapunongan nga gimugna sa mga fans ug sa mga manunulat sa music industry, diin ang mga sakop mga inila ug bangiitang musikero nga daw dunay kalagut sa ilang kinailadman nga nangamatay sa maong pangidaron. Ang nangamatay sa edad nga 27 mao sila ni Jim Morrison, Jimi Hendrix, Janis Joplin, Brian Jones ug Kurt Cobain. Sila mao ang dunay world-wide fame apan duna pay kapin sa 30 ka musikero nga dili kaayo inila nga nangamatay sa edad nga 27. Makita mo ang maong lista sa Wikipedia.
* * *
Ang musikero nga si Manny Amador, 49 anyos na dihang napalgan ang iyang patay nga lawas sa iyang pinuy-anan sa Lahug. Una ko siyang nakit-an sa Kahayag/Handuraw music joint sa Mabolo. Duna kini siyay big bike ug blues ang nadunggan nako nga iyang gitokar sa gitara sa Handuraw. Kay tisoy man kaayo kining tawhana, gatuo ako nga Kano kini nga nakig jamming sa mga local.
Dihang ga-interview kami sa artista nga si Pinky Amador backstage sa SM, kalit kani siyang mitunga ug gi-ilaila siya ni Pinky kanamo—“my brother Manny, he is a businessman.”
May kalabutan sa Internet ang negosyo ni Amador. Diri sa Cebu niya gi-base ang iyang open source firm nga InfoWeapons.
Aktibista sab kini si Amador. Usa siya sa founders sa Philippine League for Democratic Telecommunications, Inc. (PLDTi) nga nakig batok sa telephone metering system (usa ka pamaagi unta sa PLDT pangwarta pinaagi sa pag metro sa mga telepono). Wala madayon ang maong sistema human kini gibabagan sa Senado.
Niadtong 1999, naapil si Amador sa most 10 Most Influential Filipinos in the Internet.
* * *
“Hoy, Gerard, maldito kaayo ka,” miingon si Sal Malto dihang nagkita kami mga pipila na ka tuig milabay sa usa ka kan-anan sa SM. “Suwat-suwat ka anang Best Designers. Ang mga ego intawon ma-igo.”
Usa si Sal sa mga designer nga media darling dinhi sa ato. Na presidente siya sa Clothes for Life, Foumdation. Kun wa ako masayop mosuwat usab kini si Sal. Ug andam kining mopahuwam sa iyang mga minugna kun dunay taga media nga mohuwam.
Kaming mga maniniyot suod ni Sal kay anha man kami niya manghuwam og swimsuit kun dunay pictorial. Matud pa sa usa ka model niadto nga si Carliz Selma, world class ang mga two-piece ni Sal.
Mipanaw si Salvador Malto sa edad nga 41 niadtong miaging semana.
* * *
Way gipiling edad ang kamatayon. Mao nga kun duna kay mahimo nga makapalipay sa kadgahanan, himoa na para way magmahay.
