Asa naman si Danny Gabiana kinsa maoy kanhi hepe sa Division for the Welfare of the Urban Poor (DWUP) sa Cebu city government?
Daghan man gud ang nangita kaniya nga mga residente sa Citi Center Commercial Complex sa barangay Kamagayan niadtong Sabado atol sa among programang “Dialogue on the Air” kay matud pa nangolekta siya og tag -P5,000 isip pasiunang bayad sa gitagana sa Siudad nga relocation site didto sa barangay Canduman, Mandaue City.
Sila si manlalaban Collin Russel, Carlo Dugaduga ug manlalaban Jocelyn Pesquera nga nakadungog sa maong mga alegasyon sa mga residente nakapadayag og mga pagmahay sa nahitabo ug ilang giklaro nga wa gyuy bayad ang pag-angkon og rights sa relocation.
Mipasalig si Russel nga iya kining imbestigahon. Samtang si Pesquera nanawagan sa Ombudsman nga imbestigahon si Gabiana.
Samtang kabahin sa tinguha ni Cebu City Mayor Michael Rama nga papahawaon na ang mga nag-okupar diha sa Citi Center nga maoy sentro sa topic niadtong Sabado, dunay mga residente nga mihangyo nga kun mahimo, dili sila papahawaon.
Ilang mga rason kay anaa ang ilang panginabuhi ug gawas pa diha sila natiguwang.
Apan ang kapulisan nga mitambong sa maong programa nga sila si Chief Insp. Aileen Recla, hepe sa Station 1 ug Chief Insp. Gualberto Gabales sa Police Community Relation misuporta sa lakang ni Mayor Rama nga papahawaon na ang mga nagpuyo ug aron makapuyo og mas desente ug hamugaway nga panginabuhi.
Si City Councilor Alvin Dizon nga maoy gidangpan sa mga nagpuyo miangkon nga bisan siya dili gyud angayang magpabilin ang mga illegal settlers apan miapelar nga kun mahimo unya na lang papahawaon human sa eleksyon ug inig sugdan na ang construction sa proposed commercial ug medium rise condominium alang sa mga kawani sa City Hall.
Apan ang duha ka mga abogado miingon nga mas maayong mamahawa sa madaling panahon kay gamiton na sa Siudad ang maong 7,000 square meter property ug gawas pa kini aron makalikay ang mga bata sa mga law-ay ug sa mga risgong binuhatan sa mga dagku diha sa Citi Center nga giingong gihimong drug ug prostitution den.
Si Boboy Hermosisima nga maoy nagdala sa Prevention Restoration Order Beautification Enhancement Division kon Probe miklaro nga wa pa gyuy tukmang petsa kun kanus-a papahawaon ang mga nagpuyo.
Samtang si Jess Kangleon Paller tag-iya ug printing press kinsa nakadawat na og 72-hour notice sa boluntaryong pagpahawa mipadayag nga silang mga nagnegosyo ug legal kinahanglang hatagan og insaktong due process kay misuporta sila sa Siudad sa paglimpyo ug pagpamintal diha sa Citi Center.
Matud niya nga mas maayo gyud nga kahatagan sila og insaktong lugway kay nagsige pa sila sa pagpanghimo og mga kalendaryo alang sa tuig 2013 diin dako kaayo ang ilang puhonan.
Misambingay pa ang negosyante nga kining pamolitika kinahanglang di gyud mangaway ang politiko basta magkaduol ang eleksyon ug kun mahimo iya pang i-multiply ang pakig-amigo ug dugangan pa.
Iyang gipatas-an ang iyang litaniya sa sambingay nga “no vote, ibot!”.
In fairness ni Mayor Rama akong naobserbahan nga wa sila magdali sa paglimpiyo sa Citi Center. Nasayod siya sa tanan kun unsay epekto.
* * *
Mahug ra diay gihapon nga way kapuslanan ang paglibkas ni Gov. Gwen Garcia sa tag-P5 nga entrance fee sa mga pasahero nga mosulod diha sa Cebu South Bus Terminal.
Kini tungod kay mihulga ang grupo sa mga bus operators nga adto gihapon nila ipapas-an sa mga pasahero ang gipatuman nga 100-percent increase sa Kapitolyo sa ilang pag-parking sa terminal.
Matud pa ni Julito Flores, presidente sa ilang pundok sa mga Mini Bus Operators Association nga kun dili mo-reconsider kanila si Governor Garcia mapugos sila pag-withdraw sa ilang petisyon sa Land Transportation Franchising and Regulatory Board pagpakunhod sa plitihan ug ipabalik ang mahal nga taripa sa plitihan nga maoy ilang ipatuman.
Ang mahitabo alaut gyud ang mga pasahero kay mao na say magbago sa kamahal sa plitihan unya.
Matud ni Flores nga wa silay supak nga usbawan apan kinahanglang gikan ra sa 20- ngadto sa 30-porsiento nga usbaw sa parking fee aron dili mahapak ang obligasyon ngadto sa mga pasahero.
Gawas pa sab niini, mag-antos na karon kadtong mga pasahero nga mosulod nga mag-taxi sa CSBT kay doble na sab ang entrance sa mga taxi gikan sa tag P10 kaniadto ug karon gihimo nang tag-P20.
* * *
Medyo seryoso na gyud karon ang atong kapolisan pagpakigbatok niining mga illegal nga sugal sa tibuok Sugbo.
Akong naobserbahan nga niadtong buwan sa October ubay-ubay gyud ang nadakpan sa masiao operations.
Ang nakanindot kay niadtong Nov. 1, wa gyud pasayloa si PO3 Artemio Tumakay sa iyang mga kaubang pulis dihang nagpasiugda kini og tigbakay diha sa may sitio Mahayahay, barangay Marigondon dakbayan sa Lapu-Lapu.
Samtang duna say konsehal sa barangay Daan Lungsod sa lungsod sa Alcoy nga si Brian Romanos ang gipriso kay nagpapel nga iyang pabuhian ang iyang mga konstituwente nga nagsugal og bingo.
* * *
Human milampos kami sa GMA-7 ug dySS team pagpildi kagahapon sa CCTN-47 diha sa barangay Apas Gym kami maoy moharong sa TV5 alang sa kampiyonato sa duwang basketball sa Newsmen Basketball Association (NBAC)alang sa best of three.
Ang Cebu Daily News ug CCTN-47 maoy mag-ilog sa third place sa maong torneyo.
Kaming mga opisyales sa NBAC naninguha nga human ning maong torneyo makapahigayon dayon ug second conference aron makamintinar sa himsog nga panglawas ug paglig-on sa among maayong relasyon taliwa sa kompetisyon ug network rivalry.