Siobiz prowess

Karong nakapanukad nas Anabelle Rama sa iyang kandidatura sa pagka kongresista sa amihang distrito ning dakbayan maurag mahubog gyud kita sa kadaghan unya sa mga artista nga modagsa nganhi para mutabang kaniya sa pagpangampanya.

Apan dili lang baya kitang Pinoy ang movie star crazy nation. Bisan ang America ingon niani man. Kon duna tay Erap duna pud silay Reagan. Ug kon si Annabelle Rama dunay artista brigade (kadaghanan kanila naa sa GMA 7 ug pipila usab ang naa sa TV5) duna usay caravan sa mga endorsers si Barrack Obama.

Nalakip sa Team Obama mao sila ni — Katy Perry, Lena Dunham, Scarlett Johansson, Jay-z and Beyonce, Nicki Minaj, Samuel L Jackson, Gwen Stefani, Eva Longoria, Ricky Martin, Bon Jovi, Elizabeth Banks, Sarah Jessica Parker, Ashely Judd, Eddie Vedder, Natalie Portman, Mary J Blige, James Taylor, Marc Anthony, Jessica Sanchez, The Foo Fighters, Bruce Sprinsteen ug George Clooney.

Mura mag Grammy ug MTV staples man kining line-up ni Obama nga daw mura silag line-up sa usa ka awards night diin ang susama kanila ni Johansson, Clooney, Portman ug Longoria maoy mga presentor. Gani kon tagaan mo lang ug 5 song sets ang matag performer mura na kinig ba-ong Woodstock.

Ambot lang kon makabutar na ba kini Jessica Sanchez. Apan ang iyang presence usa ka indication nga ang iyang mga ka age bracket pabor sa incumbent. Susama kini sa sitwasyon sa France niadtong panahon ni Francois Mitterrand diin ang mga batan-on mas midapig sa karaang pangulo imbis nga mulaban sa mas mga agresibo nga kontra niani.

Nga naapil si Sanchez sa mga nahisgutang pro Obama endorser misugyot usab og duha ka laing butang. Una, nga may igo nang kabug-aton sa American awareness ang half Pinay nga runner-up sa American Idol. Ikaduha, nga ang mga gitawag og minorities sama sa mga Asian ug Latinos mas dapig kang Obama.

Ang kontra ni Obama nga si Mitt Romney duna say iyang mga endorser. Ug bisan tuod og dili ingon ka power cast ang Team Romney duna usab kini celebrity arsenal sama nila ni —Meat Loaf, Jenna Jameson, Kid Rock, Clint Eastwood, Robert Duvall, Stacey Dash, Chuck Norris, Donald Trump, Sara Evans, Patricia Heaton, Kelsey Grammer, Ted Nugent, Trace Adkins, Elisabeth Hasselbeck, Scott Baio, Jon Voight, Foxworthy.

Paet intawon kaayo kining lusyang nga pundok ni Romney: mga “has-beens,” red necks, porn star ug mga “wa-els.”

Si Lena Dunham ra ug Elizabeth Banks (nga usa kuno sa mga bida sa “Hunger Games”) ang mga ngan sa Obama Team nga di kaayo ko familiar. Apan katunga ray nailhan nako sa punduk ni Romney.

Apan makapadaug ba sa usa ka kandidato ang kadaghan ug kalig-on sa iyang mga celebrity endorsers? Tingali. Makapabali sa pagbati sa mga supporter sa pikas kampo ang mga endorser sa usa ka kampo. Matud pas mga ka eksperto –dili.  Apan nagkanayun sila nga makapalig-on kini sa loyalty sa ilang mga supporter, makapabutar sa mga supporter nga wa untay plano nga mobutar ug maka dani ang mga endorser sa mga “undecided” pagdapig sa ilang gi-endorsar.

Mao nga ang atraka unta ni Anabelle Rama ug sa iyang mga artista mao ang come out and vote ug ila kining itumong sa mga movie fan nga dili kaayo manumbaling sa politika.