Overloading maoy hinungdan sa disgrasya?

Daku kog pagtuo nga ang overloading maoy hinungdan sa disgrasya  sa de pasaheroan nga sakyanan sa mga Yapha niadtong  Sabado  sa gabii didto sa dakbayan sa Toledo nga mikalas og daghang kinabuhi ug miangol sa mga  pasahero.

In fairness sa mga Yapha nga maoy operator, andam  nilang sagubangon ang tanang mga  galastuhan  sa ospital ug pag-ayuda  sa mga  namatyan segun pa  ni Pinamungahan Mayor Geraldine Yapha.

Kinahanglang subayon gyud kun dili ba depektoso ang makina kay  medyo karaan na ang sakyanan ug dunay nanggawas nga mga istorya  nga way proper maintenance.

Di sab isalikway ang anggulo nga nasayop ang driver.

In fairness sa management sa South Bus Terminal, sigurado ko nga pagdayong larga way overloading nga nahitabo kay kini maoy polisiya.

Apan tungod lagi kay wa nay makabadlong sa driver ug sa konduktor  nga magbyahe, mo-pick-up ug mga pasahero sa kadalanan mao nga paturagas lang sab og  pasakay bisag  nagsugwak na.

Pun-an pa nga batasan ug kinaiya sa taga-probinsya nga mainantoson mao nga mosakay na lang bisag magbarug ug bisag  magkapyot. Bisan kaniadto nauso kaayo ang pagsakay bisan  sa atop.

Angayng panaminan natong tanan kadtong maong aksidente niining panahon sa paghandum sa atong mga minahal sa kinabuhi atol sa Kalag-kalag karong Huwebes ug Biyernes.

Si Director Raul Aguilos sa Land Transportation Office in Central Visayas miingon nga hugtanon  nilang ipatuman ang pagpanakop sa mga driver nga mag-overloading.

Pero mangambot na lang ko kun epektibo ba gyud ang taga-LTO  ug ubang mga ahensya sa kagamhanan nga mobadlong niadtong mag- overloading.

* * *

Gisupak sa mga lain-laing pundok dinhi sa Sugbo ang sugyot sa United Nations nga himuon nang legal  ang prostitution sa Pilipinas nga ang tumong mao ang pagkontrolar sa  sakit nga HIV ug  AIDS.

Ang magtiayong Thelma ug Dionisio Chiong ug Paulita Capoda sa Crusade Against Violence, Heddah Largo sa Provincial Women Commission ug Fe Cabatingan sa Legal Alternative for Women kun Law Center, Inc. ang mipalanog sa ilang pagsupak atol sa among programang “Dialogue on the  Air” sa  dySS Super Radyo  niadtong  Sabado.

Daku silag pagtuo nga modaghan ug samot ang pagkatap sa  maong sakit gikan sa kagaw ug makapaingganyo kini sa uban nga mosulod  na lang sa prostitusyon.

Si Fr. Brandet Bohol nga amo sang gipasalmot via phone patch mipadayag sab sa iyang pagsupak kay alang kaniya daku gyung sayop  nga ang dautang binuhatan himuon pa  gyung legal.

Gisaysay ni Padre Bohol nga ang labing maayong  himuon  mao  ang  pagtamod sa katawhan sa prinsipyo sa Simbahan nga likayan  ang mga dautang binuhatan sama sa premarital sex ug ang pakighilawas sa dili asawa o bana.

Apan ang mga pundok nga misupak medyo nakonbinse sab  sa mga  punto nila ni Cebu City Public Information Officer Carlo Duga-duga,  Police Supt. Rex Derilo ug manlalaban Gonzalo Malig-on Jr nga miingon nga ang unang hinungdan kun nganong misulod sa prostitusyon mao gyud ang  kalisdanan sa  pagpuyo.

Gani matud pa ni Supt. Derilo kanhi operations chief sa Criminal Investigation and Detection Group nga sila pang mga pulis ang pangasab-an sa mga babaye ug mga minor de edad kaniadto nga  mohimo sila og rescue operations.

Alang  nako mas maayong tun-an kini pag-ayo kay maghatag kini og  komplikasyon sa uban natong  mga balaud criminal.

Kun atong legalisahon ang prostitusyon  nagpasabot  na  ba sab  kini nga himoon sang  legal ang shabu  ug  ubang ginadiling drugas kay inutil ug  palpak ang gobyerno sa kampanya?

* * *

Unsa ka tinuod nga nagpabaya lang ug wa tagda ni Regional State Prosecutor Fernando Gubalane ang yango-ngo  sa mga subpoena servers  nga nangayo ug RATA o representation allowance ug transportation allowance.

Wa matagad ni Gubalane kining legitimate concern sa mga subpoena servers kay na-busy siya og iya rang  kaugalingon  ang gitan-aw pinaagi  sa  pagpangayo og allowances sa  lain-laing mga local government units?

Obligasyon sa RSP ang paghatag ug RATA ilabina nga risgo ug  lagyo  kaayo ang  byahe sa  mga subpoena servers.

* * *

Congratulations sa among team sa GMA-7 Cebu nga midaug   kagahapon sa duwang basketball sa Newsmen Basketball Association (NBAC) batok sa CCTN-47  didto sa gym sa  Cebu Eastern College.

Ang among kadaugan sa GMA-7 maoy naghatud kanamo sa  no. 2 slot sa magic four ug ang CCTN-47 maoy nagtagak nila ngadto sa no. 3.

Buot ipasabot ang CCTN-47 mao gihapoy mosangka kanamo ug  maningkamot alang sa championship pero kinahanglang pildihon mi nila  ug  kaduha kay naandan namo sa semi-finals nga 1 vs 4 ug 2 vs 3.

Si Sir Bobby Inoferio nga maoy NBAC Commissioner miingon nga ang no. 1 sa  magic four mao  ang TV-5 nga  mao  ray  nakapilde  kanamo  niadtong higayon nga  lima ra  mi  ka buok  ang nakatunga sa entiro duwa.

Tungod kay na-forfeit ang ABS-CBN  kagahapon, ang “Siloy Team” o Cebu Daily News maoy number four ug sila maoy maningkamot  pagpukan  sa TV-5 sa twice to beat policy.

Salamat sa management sa Cebu Eastern College ilabina  nila  ni Sir Sammy Sia, Sir Jeffrey Go ug Sir John Mara-at nga mipagamit sa ilang gym kagahapon.