Nyor Gmay (NG): Di ba sipat man gyud ka Nyor? Makahimo bakag definition o outline kon unsay kataw-anan?
Nyor Daku (ND): Kinsa may gaingon nga sipat ko Nyor? Para nako nyor ang kataw-anan mao ang mga hitabo nga sukwahi sa naandan ug nga kasagaran gihimo sa way kalibutan.
NG: Sample kuno Nyor.
ND: Sama pananglit ning video sa youtube -(https://www.youtube.com/watch?feature=player_embedded&v=zd7c5tQCs1I) – diin ang us aka tao miambak sa frozen nga swimming pool uban sa pagsalig sa kaugalingon nga mabuak niya kini apan solid pa man kaayo kini ug siya hinuoy nabunal ug na paruk.
NG: Kuyawa gud ana Nyor. Mahimong kuyaw ug kahadlukan sab diay ning kataw-anan?
ND: O. Medyo.
NG: Mao ba?
ND: Sama ning nahitabo sa Brazil, bag-o lang. Duna gipusil ug namatay nga tao. Way nakaila kaniya hangtud may miabot nga lalake nga miangkon nga iyang igsuon. So, gihatag sa mga awturidad ang patay nga lawas ngadto sa tagtungod para bilaran ug unya ilubong. Apan pwerting karatil sa ubang mga mibilar dihang ang ilang gibilaran mitunga mag kali tug miapil pagbilar. Ang kadtong wa kadagan gipang kuyapan. Ang inahan ra sa giingong namatay maoy wa matarantar.
NG: Ngano man to Nyor?
ND: Of course, mistaken identity. Super look-a-like sa igsuon sa lalake nga miangkon sa lawas ang cadaver. May nakakita sa gidudahang namatay ug giingnan kini nga gibilaran na siya sa balay sa iyang mama ug mao nga iya kining giadto. Pwerting gubuta pagbutho niya. Ang iya rang inahan maoy wa mahadluk kay nalipay ra siya nga buhi iyang anak.
NG: So, kanus-a man nyor, ang hitabo makataw-anan ug mahimong kahadlukan.
ND: Una, Nyor duna gyuy sense of cruelty o panakit ang kataw-anan. Mao kini hinungdan nga daghang dukoldukol sa mga comedy nga karaan. Katawanan ang hitabo kon di ka maapikyuhan niani apan kahadlukan kon makadaut kini kanimo ug sa mga tao nga concern ka.
NG: Apil sab diay ang audience perspective Nyor?
ND: O. Mao bitaw nga nangahadluk tong gabilar. Apan kita nga nasayud nga wa diay sila masayud magkatawa. Mao nga kon dunay duklon makatawa kita sa reaction sa gidukol pero di ta mokatawa kon kitay duklon. Mao nga best humor mao ang gitawag nilag “self-deprecating.” Diin ang naigo sa binuang mao ra usab gabinuang. Kay muhatag man kinig distansya sa audience.