Responsibilidad sa usa ka dakung opisyal sa Ombudsman ang pagbaton og delicadeza, maayong pamatasan, ligdong na integridad ug ang pagsunod sa balaud bisan supak sa iyang kabubut-on.
Lab-as pa sa akong panumduman kadtong mga hait kaayong krusada batok sa nepostimo sa panahon nilang Deputy Ombudsman Arturo Mojica, Director Edgardo Labella ug sa bag-o lang nga miretiro nga si assistant ombudsman Virginia Palanca Santiago.
Ang balaud parte sa nepotism nagsilot niadtong mga opisyales sa gobyerno nga mikuha og mitudlo sa ilang mga kadugo aron makatrabaho sa opisina nga ilang gialagaran ug giabusohan.
Kun estriktohon ang pagpatuman sa balaud batok sa nepotism unang maigo karon si Deputy Ombudsman Pelagio Apostol.
Akong nahibaw-an nga si Apostol mi-hire sa iyang tulo ka mga pag-umangkon segun pa sa akong kasaligang tinubdan.
Matud pa, ang rason ni Apostol kini tungod kay may kompyansa ug may pagsalig siya sa iyang mga kadugo.
Unsa man diay ang balaud sa nepotism? May exempted? Mahimong inutil kining balaura kun ang i-rason samang Apostol nga may pagsalig ug may kompyansa siya sa iyang mga pag-umangkon?
Pagkayabag gyud niya!
Alang nako mas maayong imbestigahon si Apostol niining iyang isyu sa nepotism kay usa kini sa matang sa pagpangabuso ug pamintaha sa gahum.
Kanyahay ra diay nga sukad si Apostol maoy nahimong deputy ombudsman napapas ang krusada sa Visayas Ombudsman batok sa nepotism kay mahug siyang double standard.
* * *
Gikompirmar sa akong mga amigong piskal ug mga huwes nga tungod ni Regional State Prosecutor Fernando Gubalane nalangay karon pag-ayo ang pagdawat nila sa binuwan nga allowance gikan sa Cebu provincial government.
Matud sa akong mga tinubdan nga sukad nagpahimulos pag-ayo sa gahom si RSP Gubalane pagpangayo ug allowance sa lain-laing mga local government units napugngan ang ilang allowance gikan sa Cebu provincial government subay sa kamanduan sa Commission on Audit.
Usa sa mga huwes nga dunay court assignment sa usa sa mga lungsod mitug-an kanako nga siya maoy nauwaw sa binuhatan ni Gubalane.
Gani matud niya siya maoy mibalibad nga hatagan unta og allowance sa mga opisyales sa maong local government unit bisan nag-bista siya ug mga kaso kay di siya ganahan nga hinganlan og swapang.
Kay alang kaniya insakto na kaayo ang binuwan nga allowance nga iyang gidawat sa Kapitolyo diin ang maong LGU sakop.
Ingon ani pa lang unta ang atong mga amigo nga magbaton ug delicadeza sangko sa langit akong pagdayeg kanila.
Wa na gyuy uwaw ning ubang mga piskal nga dagku kaayog kamkam sa kamot sa ihatag nga allowance sa LGU bisag wa sila manerbisyo didto?
Ang paet pa gyud kanang modemanda gyud og allowance nga di magpaabot kun kanus-a hatagan sa usa ka LGU.
Kun di na kontento akong mga higala sa ilang madawat nga income pagka-piskal mas maayo tingale nga manggawas nalang sa serbisyo.
* * *
Karong Sabado sa akong programang “Dialogue on the Air” sa dySS Super Radyo mangahas ko pagtuki bahin niining proposal karon sa United Nations nga kinahanglang ma-legalize ang prostitution sa Pilipinas.
Akong apilon pag-imbitar si Cebu Archbishop Jose Palma sa maong programa ug maglaum ko nga makagahin og panahon ang simbahan niining maong isyu sa moral aspect.
Lakip sa akong imbitaron mao ang mga legal experts ug mga tigpanday og balaud lakip na ang mga local chief executives.
Dinhi sa ato sa dakbayan sa Sugbo ang barangay Kamagayan maoy labing ilado nga lugar nga anaa nagpasad ang atong mga kababayenan nga nagbaligya sa ilang dungog.
Wa ko malimot kaniadto ni kanhi kapitan Celestino Avila atol sa among programang “Barangayan” nga uyon siya nga himoong legal ang prostitution sa iyang barangay kay bisan unsaon dili na gyud maundang kay kini maoy panginabuhi sa uban.
Karon ang UN nakakita sa maong punto kay pinaagi sa pag-legalisar sa prostitution matibhaan ang pagkuyanap sa sakit nga AIDS ug HIV.
Pero ambot lang kun mouyon na ba niini ang mga pilgrims ni Saint Pedro Calungsod.
* * *
Niadtong Lunes misuway ko og tambong sa flag raising ceremony diha sa Palace of Justice ug akong naobserbahan nga gamay ra sa atong mga huwes ang nakatambong nga unta sila maoy mo set og example sa ilang kawani.
Ang akong nakit-an mao sila si RTC Judges Eric Menchavez, Ramon Daomilas, Gilbert Moises, Samuel Malazarte, Macaundas Hadjirasul ug Wilfredo Navarro.
Nakatunga usab sila si MTCC Judges Edgemelo Rosales, Pamela Uy Baring ug Rosabella Tormis.
Ang ubang mga abogado nakakita sa ubang mga huwes nga didto apan wa molinya sama nilang RTC Judges Sylva Paderanga, Lynna Adviento, Enriquieta Belarmino ug Estela Alma Sinco.
Ang ubang mga huwes giingong late gyud samtang ang uban nadestino ug laing LGU apan ang uban atua pa sa Rome, Italy kay mitambong sa canonization ni San Pedro Calungod.
Maglaum ko nga maka-perfect na sila sa attendance sa mga mosunod nga mga Lunes uban sa ilang mga trabahante kay dinhi makita ang gugma sa nasud ug sa trabaho ug disiplina sa kaugalingon.