Salamat sa Diyos nga makabaton na gyud ang Sugbo og usa ka Santos karong Domingo human unya sa canonization ni Blessed Pedro Calungsod.
Maayo unta nga daghan ang magtamod sa kabuotan ni San Pedro De Cebu.
Subay sa iyang canonization didto sa Roma alas-5 sa hapon oras dinhi sa Pilipinas daghan sab ang mga kalihukan sa diin-diin nga mga simbahan ug mga lugar.
Usa sa hugpaan sa daghang mga tawo mao ang bisperas nga kalihukan didto sa lungsod sa Ginatilan kay dunay pasundayag sa kinabuhi ug pagkamartir ni Blessed Pedro.
Gipaabot kini nga bibo tungod kay ubos kini sa direction sa akong kauban sa Super Radyo nga si Brod Aljin Abaquita.
Busa mag-ambahan ug mangadto kita didto sa Ginatilan aron atong saksihan kining maong religious affairs samtang di kita maka-afford sa plitehan sa Roma.
* * *
Saludo ko sa akong kababayan sa Dalaguete nga si Pablo Orozco nga taga-Mantalongon ug driver sa ambulance sa munisipyo kay bisag naglisud sa panginabuhi wa gyud magpatintal sa nakit-an niyang pitaka nga may sulod nga P44,500 diha sa Chong Hua Hospital niadtong Sabado sa hapon.
Nagpatigbabaw ang sugo sa iyang konsensya nga mauli gyud sa tag-iya nga segurado siya nga naproblema sa gastuhanan sa pasyente sa maong tambalanan.
Gani matud niya nga wa niya ma-report sa gwardya kay gusto niya nga ma-report sa among mayor sa Dalaguete nga si Ronald Allan Cesante.
Niadtong Lunes sa buntag si Mayor Cesante nanawag kanako bahin sa maayong balita sa pagkabuotan ni Orozco ug nakig-abag kanamo sa GMA-7 ug dySS aron gyud pagsubay sa tag-iya sanglit dunay mga identification cards sulod sa pitaka nga iya ni Avelino Abella Cabansay Jr. nga may address nga Purok Limonsito Sangi dakbayan sa Toledo.
Wa ko maglangay nanawag ko sa Chong Hua Hospital sa emergency department ug matud pa sa nakatubag nga way pasyente nila nga mi-report nga nawagtangan o nakabiya ug pitaka sa CR. Ang nakatubag miingon sab nga way gi-blotter sa ilang security department.
Nangahas ko sa pakig-coordinate sa information section sa maong tambalanan ug nagpakitabang ko sa usa sa mga personnel nga si Arlene Arche sa pagsubay kun duna ba silay pasyente nga nag-apilyedo ug Cabansay o ba kaha Abella.
Dihang iyang gitug-an kanako nga dunay pasyente nga Estelita Cabansay nga taga Lapu-Lapu taas na kaayo akong kutob nga sila gyung pamilyaha ang tag-iya sa pitaka.
Mao nga gi-connect ko didto ug mikompirmar ang nagbantay didto nga usa sa mga anak sa pasyente nga si Angles Cabansay Revilla ang mitug-an kanako nga ang tag-iya sa pitaka mao ang iyang amahan nga si Avelino.
Mao nga akong nakontak si Avelino ug nakahilak intawon sa kalipay.
Tungod sa akong tuyo nga ma-formally documented ang tanan akong gihangyo si Mayor Cesante nga sa ako na lang programa sa radyo niadtong Lunes sa gabii ang turn-over.
Natigayon gyud ang pag-uli sa maong kantidad ug nadala og balik sa edaran ang iyang kompletong salapi kinsa unang nagtuo nga dili na gyud mauli ug mipadayag sa iyang tumang pagpasalamat sa ambulance driver .
Bilib ko ni Orozco kay matud niya bisag naglisud siya sa panginabuhi kinsa dunay lima ka mga anak ug dunay mga tinun-an sa kolehiyo apan wa gyud siya magpatintal.
Iyang gihulagway nga igo ra siyang mibawos sa Ginoo tungod kay niadtong nag-negosyo sila nahauli usab ang iyang kwarta nga P40,000 gikan sa mga bata nga nagdula sa ilang palibot.
Si Mayor Cesante nga akong natawgan nagkanayon nga mohatag sila og pasidungog kang Orozco sa mosunod nga mga adlaw tungod sa gipakitang talagsaon nga hiyas.
Gawas sa P5,000 nga cash incentives iya karong gipatun-an sa Human Resource Department sa munisipyo nga himoong regular nga trabahante si Orozco.
Deserving gyud si Orozco nga mahatagan og due recognition sa iyang kabuotan isip trabahante sa gobyerno.
Alang gani nako angayan siyang hatagan ug presidential award pagpakita sa mga trabahante sa gobyerno nga seryoso ang kagamhanan pag-rekognisar sa mga buotan ug tarong nga taga gobyerno.
Ang iyang gipakita nga hiyas sinugdanan sa matuwid na daan ni Presidente Benigno Aquino III.