Kisaw na sab ang political dynasty

Mangahas ko karong Sabado pagtuki atol sa among programang “Dialogue on the Air” sa dySS Super Radyo sa isyu bahin sa “political dynasty” uban sa akong mga dinapit nga mga bisita.

Unsa may klaro nga definition of term sa “political dynasty”? Apan sa di pa tingali kini matubag mas maayong matugkad sab kun kanus-a tawgon ang usa ka politiko nga usa ka “traditional politician”?

Pila ka tuig o pila ka termino nga nangalagad ang usa ka politiko sa di pa siya bunyagan nga usa ka traditional politician.

Mahug na ba gyud nga usa ka “political dynasty” ang pagpasa sa politikanhong katungdanan gikan sa usa ka traditional politician ngadto sa iyang asawa o bana, anak ug hangtud mabalik sa traditional politician ang pwesto ug ipasa na sab sa iyang immediate family human sa termino?

Political dynasty na ba ang tawag sa nahitabo nila ni P-Noy ug PGMA nga nakabalik sila pagdumala sa nasud human nalat-angan ug pipila ka tuig gikan sa pagka-presidente sa ilang mga ginikanan?

Kun estriktohon gyud kini dili ba kasupakan sa katungod ug sa gitawag og freedom of expression sa igsoon o ba kaha sa ginikanan nga gustong moserbisyo?

Kun mao man kini ang definition sa “political dynasty” mayoriya sa atong mga politiko ang nakalapas kay gani ultimong katungdanan sa barangay puli-pulihan man gani sa mga sakop sa pamilya.

Sa akong nahibaw-an sa prinsipyo sa balaud gidili ang political dynasty sa Pilipinas apan tungod kay way “enabling law” way napriso ug di mabadlong ang mga pamilya nga nag-practice niini.

With all due respect, way nangahas pagtuki seriously niining maong isyu didto sa Kongreso tungod kay nangaigo niini halos silang tanang mga politiko.

* * *

Atong ibutang nga sulagma ang panagtagbo tali nila ni boxing promoter Rex Wakee Salud ug Cebu City North Election Supervisor Marchel Sarno sa usa ka kan-anan, di ba gud makabalibad si Sarno sa gitanyag nga paniudto ug mobuwag siya og lamesa ug lingkuranan?

Delicadeza lang gyud unta ba!

Mabaw ra kaayo kanang katarungan nga moingon sila si Sarno ug Salud nga coincidence ang tanan ilabina nga anaa ang abogado ni Salud nga si Filmore Gomos.

Dili ba amigo ug classmate sila si Sarno ug Gomos?

Batid na ba gyud si Gomos sa mga election laws niadtong mga higayuna nga wa na sila magkinahanglan sa expert opinion ni Sarno sa Commission on Elections (Comelec) pag-file ni Salud ug certificate of candidacy nga unang gihulga nga ipadakop ni Cordova Mayor Adelino Sitoy?

Sama sa akong giingon nga wa gyud untay isyu kun naglikay pa si Sarno pinaagi sa paghatg og legal advice kang Salud didto mismo sulod sa iyang opisina.

Mas maayong imbestigahon kini aron maghatag og leksyon niadtong uban. Paglikay intawon kamo aron di dudahan nga napalit na mo!

* * *

Medyo ulbong kaspa ni manlalaban Lionel Marco Castillano sa provincial Comelec kay dunay mga certificate of candidacy nga gikan dinhi sa Sugbo nga ilang nadala sa Manila sa law department nga dili original ang gi-attach nga party nomination.

Matud ni Castillano nga binuhatan kini sa iyang mga election officers sa kalungsoran nga gahi kaayong pasabton.

Miingon siya nga bisan kapila na balik-balika ang instruction nga ang hard copy gyud maoy dawaton apan bisan xerox copy gidawat lang gihapon.

Mao ni ang nakapait basta kuwang sa briefing kay ang tendency ipalapos lang sa pisan dunggan ang mga importanteng instructions.

Kuwang sa latos!

* * *

Wa gyud ko makasabot sa pagka-tig-a og kasing-kasing sa mga opisyales sa barangay Luz ug sa mga opisyales sa Homeowners Association nga nagpaguba sa kabalayan sa 32 ka mga pamilya.

Grabe sab sila nga wa makatugot nga makabarong-barong ang mga biktima sa demolisyon samtang nangita pa og kabalhinan.

Gani duna pay akong nahibaw-an kagahapon nga di na mobayad ang asosasyon sa gitagana nga tag P10 mil isip financial assistance ngadto sa mga na-dislocate.

Kun mao ning kalakiha usa kini ka dakung hagit sa korte pagpapriso niining mga kanahan nga mga bintahoso.

* * *

Makapanimbawot sa balhibo kining nahitabo sa mga tinun-an ug mga kabanay didto sa Jaclupan dakbayan sa Talisay nga giingong nasudlan og mga dautang espiritu. Ang uban gibalikan kagahapon.

Kun tinuod man nga gi-possess ang mga bata timailhan lang nga may pagkuwang sila sa ilang pagtuo ug pagpangalagad sa Diyos.

Ang tawo nga hugot ug pag-ampo Kaniya lisud duolon ug sudlan sa mga dautang espiritu kay way butang nga makabuntog sa gahum sa Diyos.

Pero mas maayo tingaling susihon kining maong mga tinun-an kun wa bay bisyo sa drugas ug wa ba manulod og gang ug fraternities.

* * *

Makapahinuklog kaayo ang nahitabo sa usa ka tinun-an sa high school sa dakbayan sa Lapu-Lapu nga naghikog patay human nagbuwag iyang mga ginikanan.

Nakasabot ko sa dalagita kay pait gyud kaayo ang pagpuyo kun di kompleto ang pamilya ilabina nga may insakto na siya og kabuot sa nahitabong trahedya sa iyang kinabuhi nga mao ang eskandalo sa iyang mga ginikanan.

Maglaum ko nga kining maong panghitabo usa kini sa maghatag og giya sa ubang mga magtiayon nga nagpasulabi sa garbo.