Amang ang SK Cebu Federation president?
Insakto gyud diay ang akong nadunggan nga founder sa committee on silence sa Hunta Probinsyal si Aladin Caminero nga kasamtangang Sangguniang Kabataan (SK) Federation president kinsa naglingkod karon isip ex-officio member.
Mga Capitol beat reporters misugilon kanako nga lisud gyud dakpon alang sa interview si Aladin unya kun madakpan sa mga tigbalita di gyud motingog sa mga isyu nga naglambigit sa SK.
Niadtong Biyernes sa buntag nga maoy deadline sa filing sa certificate of candidacy sa provincial Commission on Elections personal nakong gihangyo ang amahan ni Aladin nga si Board Member Willy Caminero nga makatambong sa among programang “Dialogue on the Air” sa dySS iyang anak nga magtuki bahin sa isyu sa SK.
Apan otro sab ang amahan mibalibad nga patambungon ang iyang anak ug misugilon nga iyang mando nga dili patungahon og mga susamang kalihukan iyang anak kay matud pa hilaw pa kaayo ug mauwaw.
Nakapanglingo-lingo ko kun nganong ingon ani ang nahitabo ni Caminero. Kadto maoy ikaduha nakong imbitasyon ni Aladin sa maong programa nga sa unang higayon mao ang isyu kabahin sa pag-abolish sa SK.
Magduda man lang ko kun makamao ba o dili sa iyang katungdanan.
Kun di makamao sa trabaho nganong magpatuga-tuga man? Mao ni ang nakadaut basta mag-apil-apil ang mga ginikanan nga mga politiko sa eleksyon sa SK kay ang mahitabo kadtong di makamao ug inutil maoy makalingkod sa trono.
Atol sa maong programa niadtong Sabado, gibutyag ni Ombudsman Graft Investigator/Prosecutor Philip Camiguing nga ang nag-unang kaso batok sa mga SK officials mao ang isyu sa imoralidad nga mag-unay ang mga opisyales nga mag-uyab-uyab hangtud mangabuntis.
Ikaduha ang graft and corruption apil na dinhi ang dishonesty ug ang pag-falsify sa mga dokumento.
Ang nakapaet kay makamao na ang mga SK officials sa binuhatan sa mga tang-an sa politika pagmaniobra og mga “ghost project”.
Gani segun pa usab nila ni Joy Calvo ug Mar Ecarms sa Cebu City Department of Interior and Local Government nga dunay mga kwestyonable karon nga mga hangyo sama sa pagpalit og upat ka mga video camera, multicab ug uban pa.
Hinuon taliwa sa isyu sa mga SK nga nahisgutan na sa unahan lakip na nga gamiton sa mga traditional politicians ug grabeng vote buying atul sa SK elections gipadayag ni manlalaban Ferdinand Gujilde sa Provincial Comelec nga di lang gyud wagtangon ang SK kun dili usbon lang ang mga sistema niini ug i-revisit sa mga kongresista ang balaud sa SK aron amendahan.
Pero alang nako nga kun tan-aw gyud nga wa nay kapuslanan ug mograbe ang pagpanggawong sa mga tang-an ngadto sa mga batan-on mas maayo pa nga i-abolish na lang ang SK ug palig-onon ang campus politics nga maoy tinuod nga sukaran sa leadership training.
Lahi na ang SK karon kay training na sa pangurakot pwera niadtong mga tarong.
* * *
Unsa ka tinuod nga napugos lang si kanhi kongresista Raul Del Mar pakigsakbang sa pagka-kongresista batok kang Anabelle Rama sa Cebu City North kay nabalaka ang amahan kun si Rep. Cutie Del Mar maoy mokontra?
Ang gikabalak-an mao ang mga halang kaayo nga mga isyu personal sa kasamtangang kongresista nga giandam nga ipabuto ni Anabelle nga siya ray nasayod.
Ambot kun ang isyu kabahin ba sa performance ni Cutie isip magbabalaod o ba kaha may kalambigitan sa eskandalo sa showbiz.
Akong nahibaw-an nga upat karon ang magtigi pagka-kongresista sa north district. Gawas nilang Anabelle ug Del Mar mosalmot usab ang akong mga amigo nga sila si former National Bureau of Investigation director Florencio Villarin ug retired prosecutor Vicente Mañalac.
Sa upat akong tan-aw medyo sadya ang away nilang Del Mar ug Anabelle kay ang paagi sa nauwahi mao ang paghakot og mga artista atol unya sa pagpangampanya.
Pero di pa gyud maundang ang atong paghinam-hinam niining mga tungora sa mga magpapili kay hangtud pa karong Disyembre 31 ang substitution kun pag-ilis og mga kandidato.
Ambot kun si Anabelle ba gyud ang tinuod nga pambato? O paukyab lang kining tanan sa “Team Rama.”
* * *
Misuway ko ug agi sa bag-ong kalsada ug tulay nga nagdugtong sa barangay Guadalupe ug OPRHA Kalunasan niadtong miaging semana.
Sa akong obserbasyon medyo gamay pa ang mangagi tungod kay daghang portion nga medyo dagku og libaong ang kalsada.
In fairness ni City Mayor Michael Rama naningkamot pagpaayo sa mga lubakon apan sango sa Commission on Audit tungod kay dunay mga portion sa yuta ang wa pa gyud i-donate ngadto sa Siudad.
Gawas niining maong access road akong gibalikan pagbisita ang duha ka mga dagkung prisohan diha sa barangay Kalunasan kay interesado ko nga matan-aw gyud ang gisigeg reklamo sa mga nagpuyo nga kabaho sa duha ka mga prisohan.
Pwera buyag tinuod gyud nga wa gihapon masulbad ang kabaho sa kanal nga maoy agianan sa tubig.
Maglibog lang ko kun nganong wa gyud kini masulbad ilabina ang luyo nga bahin sa habig sa Cebu Provincial Detention and Rehanilitation Center nga unta duna may water treatment facility.
