Medyo na-misinterpret ni Cebu City Mayor Michael Rama ang presentasyon sa balita kagahapon nga naapil iyang pangan sa kiha nga sum of money nga gipasaka sa Cebu Red Carpet Catering Services human nga wa sila makabayad sa P5.2 milyones nga utang sa pagkaon nga gipakaon sa mga nangalagad sa barangay ug Sangguniang Kabataan elections niadtong tuig 2010.
Si Mayor Rama wa mahimuot sa balita nga gapasabot nga siya maoy gikiha sa maong catering services.
Alang nako di na siguro angayng maalarma si Mayor Rama sa paagi sa pagbalita kay sa unang bahin apil gyud iyang pangan sa kiha.
Maayong klarohon ko kini nga sa dokumento mao ni ang mga party sa kaso: “Cebu Red Carpet Catering Services, Inc. plaintiff versus CITY OF CEBU represented by its Mayor Hon. Michael L. Rama and its OIC-City Treasurer Ofelia M. Oliva defendants.”
Sa tuno man gud ni Mayor Rama kagahapon sa interview sa among “Buena Mano Balita” sa GMA-7 nga gikuhaan og reaction sa kiha puwerte man gyud niyang pasabot nga sayop ang pagkasulti nga siya maoy gikiha ug buot niyang ipasabot nga dili siya maoy gikiha kun dili mao ang City of Cebu or ang Cebu City government.
Basig nalimot si Mayor Rama sa prinsipyo sa balaud nga kinsa kadtong incumbent mayor automatic nga apilon gyud sa kiha.
Busa dili siya makabasol namong mga tigbalita nga ang iyang pangan maoy i-hype isip usa sa mga nahisgutan nga defendant.
Gawas pa sab ang maong pangutang sa pagkaon sa catering niadtong October 2010 nahitabo sa iyang administrasyon.
Di man seguro na makadaot ug makapa-negatibo sa iyang pangan kay natural man gyud nang ikiha kun dunay mga bulilyaso pun-an pa sa grabeng pamolitika karon.
May lang siya mangiha kang Kongresista Tomas Osmeña.
In fairness hinuon ni Mayor Rama nga akong gitawgan kagahapon iyang gipasabot nga andam silang mobayad sa maong obligasyon ilabina kun dunay kamanduan ang korte.
Iyang gipasabot nga nalangay gyud ang pagbayad kay dunay kuwang sa mga dokumento nga maoy isuporta alang sa liquidation sa Commission on Audit (COA).
Makatagam gyud kini sa mga catering services ug sa ubang mga pribadong kompaniya sa panahon nga mangutang ang Siudad kay tiaw muna abtan pag siyam-siyam una mabayran.
Kun di modangop sa korte di gyud mabayran. Hunit pa sa kusahos basta gobyerno maoy ika-transact.
* * *
May punto kining pagkwestyon ni Cebu City Mayor Michael Rama sa plano ni Kongresista Tomas Osmeña nga i-divert na lang ang P400 milyones nga alang unta sa iyang flyover project ngadto na sa pagpalapad sa Naga City to Carcar City road.
Pagkanindot unta nga kun ang maong kantidad idugang sa drainage program dinhi sa dakbayan sa Sugbo o ba kaha pagpalapad sa mga karsada dinhi sa dakbayan sa Sugbo.
Hinuon in fairness ni Kongresista Osmeña, karon na lang siya kwestyona ni Rama human sila nagkabingkil sa politika.
Asa man si Rama kaniadto nga dunay daghang gipang-donate si Osmeña sa ubang dapit sa ilang big brother program?
Nganong si Tomas ra man ang gikwestyon? Wa na lay kwenta ang tabang ni Gov. Gwen Garcia sa tunghaan sa barangay Lahug kaniadto ug ubang mga tabani penansyal ngadto sa ubang probinsya?
Samtang insakto kining panultihon nga “charity begins at home,” dautan ba gud nga motabang kita sa atong isig ka Sugbuanon ug isig ka Pilipinhon?
* * *
Nahinumdum ko sa akong kabatan-on kaniadto nga nagtubo didto sa amo sa Casay sa lungsod sa Dalaguete nga kanunayng makakaon og ohong “mushroom” nga among paisan.
Kaluoy sa Ginoo wa ko malanag ug wa magkasakit sukwahi sa nabalita karong bag-o sa dakbayan sa Mandaue nga dunay usa ka pamilyahan ang gipangtabang ug ilang silingan kay nakakaon sa ohong.
Ang ilang nakaon nga ohong dili gyud makaon kay ihi kadto sa iro nga mitubo nga susamag ohong.
Pwera hambug kaming taga-probinsya makaila gyud sa ohong nga makaon.
Kaniadto makabantay gani ko nga dunay ohong nga moturok sa palibot sa among balay nga sa panahon nga ting-uwan ug ting-dugdog amo dayong tabunan og dahon sa saging hangtud nga modaghan.
Busa kadtong dili suweto, di na lang gyud mokompyansa sa mga butang nga talagsaon aron dili mabutang sa peligro ang kinabuhi.