Impyerno blues

Matud pa ni Frank Schaeffer sa CNN website, bisan pa man kun atheist ka angay kang mabalaka sa impyerno.

Si Schaeffer nga usa ka New York Times bestselling author nga kang kansang pinakabag-ong libro mao ang “Crazy for God,” gipangayuan sa CNN og panahum tali sa impyerno ug sa mga epekto sa mga motuo niani. Usa ka Kristiano, si Schaeffer apil sa mga gi-interview sa film documentary nga “Hellbound” nga usa ka survey sa punto de vista sa mga nagkalain-laing Amerikano kabahin sa Impyerno.

Matud pa ni Schaeffer ang mga militanteng fanatic karon nga dakug impluwensya sa foreign policy sa ilang nasud mao ang mga fundamentalist sa America ug ang mga Islam extremist sa Middle East countries sama sa Pakistan, Saudi Arabia ug Pakistan.

Ug nagkanayon siya nga kining duha ka pundok gatuo nga mopahiyum ang ilang Ginoo kun malabay nila sa impyerno ang ilang mga kontra.

Ug mipadayon ang maong author nga niadtong 9-11, gipangulohan ang America ni George W Bush nga usa aka born again Evangelical nga dapig kayo sa Israel tungod sa giingong importansya niani sa katapusan sa kalibutan. Samtang ang Al Qaeda gipangunahan ni Osama Bin Laden nga buot mopalipay sa ilang Ginoo pinaagi sa pagpalagpot sa mga invaders sa Middle East sama sa mga Kano ug Israeli.

Misugyot si Schaeffer nga maaong tagaan usab og igong attention ang redemptive nga bahin sa Ginoo ug di lang ang retributive. Sa ato pa tagaan ta sad og pagtagad ang mapasayloon o mapangaon nga Ginoo imbis nga nga ang masilutong ginuo ra maoy atong ampoan.

Gani mipadayon ang inilang manunulat nga mas maayog gahinan tag mas daku-daku nga pag-ampo ang mapinangaong Ginoo kay sa Ginoo nga mosilot pinaagi sa impyerno kay matud pa niya ang kusog motuo sa impyerno giuhaw sa panimalos ug dili kini maayo kay may dala nga stress ang pagdumot nga makapamubo sa kinabuhi.

Gitagaan usab og lugar sa CNN ang mga hugot ang pagtuo sa impyerno pinaagi sa pagkuha sa panahum sa pastor sa Mars Hill Church nga si Mark Driscoll.

Alang kang Driscoll, klaro kayo ang impyerno sa Bibliya. Gani iya mang gibinagsa paghisgot ang kinaiya sa impyerno. Matud pa ni Driscoll ang impyerno: 1)ngingit; 2)dunay kalayo; 3)kastigo; 4)sinalikway ug layo sa Ginoo; 5)pagkadili mahimutang; 6) ikaduhang kamatayon; 7) pagtyabaw ug pagkagud sa ngipon sa kasakit.

Ug nagkanayon si Driscoll nga wala ni katapusan.

Pero nganong duna may ikaduhang kamatayon kun wa kini katapusan? Unya kun dunay gadilaab nga kalayo nganong ngitgnit man kini?

Nagkanayon ang laing speaker sa video nga wala kuno ang impyerno sa mga pagtuo sa Hudiyo kay wala may hisgot sa impyerno sa Old Testament, gikan sa Genesis paingon sa Malachi.

Hinuon Oktoberfest na man, manginom lang sa tag beer ug unya na lang ta maglalis kabahig langit ug kun unsay purohan nga maka score tag virgin didto. Inom lang sa ta kay wa ra ba kunoy beer sa langit.