Makatay-og kaha ang Ombudsman ni Osmeña?
Ang sentro sa akong pangutana kagahapon atol sa among ambush interview kang Cebu City Mayor Michael Rama human sa Santos nga Misa diha sa Our Lady of the Sacred Heart Parish Church sa Capitol Site mao kun mohangyo ba sab siya sa Ombudsman nga ipasuspenso si Kongresista Tomas Osmeña.
Iyang tubag nga depende na ang tanan sa Ombudsman nga maoy magtuon sa iyang mga kasong gipasaka kagahapon sa buntag batok sa kongresista uban sa igsoon nga si Minnie ug sa pag-umangkon nga si Paulo Osmeña Jacinto nga mga recipients sa duha ka mga United States-made nga mga sakyanan nga (Dodge Chargers 2000) nga mibalor og P2 milyones.
Pero akong naobserbahan nga medyo kuwang ang kiha sa mayor kay wa iapil ang naghatag sa sakyanan nga nakabenepisyo sa baratong abang diha sa South Road Properties (SRP) nga maoy chairman sa Bigfoot Entertainment nga si Michael Gleissner.
Kuwang pa sab kaayo sa mga documentary evidence. Mas daghan ang attachment nga media-published reports.
Hinuon kining mga butanga dili palutson sa Ombudsman og trabaho na kini sa mga competent investigators pag-apil sa ubang respondents nga wa makarga.
Siyarog sa kadaghang kaso nga gipasaka way maestablisar aron mataral ang kongresista sa Sandiganbayan.
Kinahanglang masubay gyud ang tanan kun pilay palit ni Osmeña kana kun gipalit man ang duha ka mga sakyanan.
Kinahanglang subayon sab kun gihatag man ug unsay bugti sa donasyon ug unsay ubang mga kaayohan nga gipasalig sa mga Osmeña ngadto nilang Gleissner gawas nga gipangabugaran ni Osmeña aron makaangkon og citizenship ang maong langyaw aron hingpit kining makapanag-iya og lote ug makaarangkada sa negosyo dinhi sa Sugbo.
Maglaum sab ko nga utingkayon sa Ombudsman kun dili ba alkanse ang Siudad sa maong kontrata pagpaabang diha sa SRP sa taga-Bigfoot.
Pero ambot lang kun may kaisog ba ug may katakos ba ang taga-Ombudsman pagtaral sa pinaka-impluwensyadong tawo dinhi sa dakbayan sa Sugbo.
* * *
Akong kasaligang tinubdan nagbutyag nga si Atty. Aristotle “Totol” Batuhan maoy kuha-ong kandidato pagka-kongresista alang sa Cebu City South ubos sa “Team Rama” human mi-atras ang beterano nga si kanhi kongresista Antonio “Tony” Cuenco.
Samtang sa Cebu City North District hingpit na ang desisyon nga si Annabel Rama ig-agaw sa mayor maoy palansaron aron dili makalubong ang BOPK sa “Team Rama”.
Posible nga kini maoy mahitabo tungod kay si Atty. Batuhan independente man sa pagkakaron ug natural nga ang independente maningkamot gyud nga makasulod ug lig-ong partido aron makatabang.
Bintaha man gyud ang dunay partido kay sa mag-independente nga puwerte’ng paita kay imo tanan ug gawas pa way labot ang mga independent candidates nga kahatagan ug kopya sa election returns human sa eskotenyo sa eleksiyon.
* * *
Makapanimbawot sa balahibo ang nahitabo didto sa Argao nga gidunggab patay sa 11 anyos nga batang babaye ang iyang amahan dihang migabas sa bitiis sa iyang inahan.
Way sala ang bata sa gihimo niyang krimen kay gawas sa iyang pagkalinghod og huna-huna, igo ra sab niyang gitubos ang iyang inahan nga nag-ungaw sa kamatayon tungod sa binuhatan sa iyang amahan nga buluyagon.
Kun tinuod man ang sobrang pagka-babaero sa biktima nga amahan nagpakita lang nga wa gyud siyay respeto sa pamilya.
Siyaro sab niya kay bisag nakasala na pun-an pa gyud ang pagpakasala ug di pa gyud makontento, padunggon ang iyang ka-live in ug iyang mga anak nga motawag sa kabit.
Tarong pa ni? Ang uban gani pwerte mang tago-tago nga di masakpan pero kining iyaha garapalan na man.
Ginoo na lay mag-igo sa iyang kalag. Pero kinahanglang tabangan sa gobyerno ang bata nga nakapatay ug ang iyang inahan ug mga igsoon aron makabalik pagpuyo sa normal nga kinabuhi.
* * *
Salamat diay sa management sa Globe Telecom sa ilang pagpahigayon og 1st Cebu Media Excellence Awards kagahapong adlawa diha sa Casino Español De Cebu.
Congratulations sa tanang mga awardees ilabina ni Kapusong Alan Domingo nga nakakuha og duha ka mga prestigious awards nga mao ang “Reporter of the Year” ug “Feature Story of the Year” sa television category.
Congrats sab ni Marian Codilla dinhi sa Cebu Daily News nga “Best Reporter” sab sa “Environment and Disaster Response” category ug ni Ador Mayol nga gi-nominate sa daghang kategoriya.
Maayo kining gihimo sa Globe Telecom management kay usa kini sa among giya nga magpaka-responsable gyud sa among propesyon.
Salamat, sir Jerry Yntig ug mabuhi ka, sir Ger, sa kanunayng suporta namong mga sakop sa media.
