The Innocence of film
Nyor Gamay (NG): Nakakita na aka nianing pelikula o video nga gikagubtan sa mga nasud nga Muslim?
Nyor Daku (ND): O, Nyor. Naa ra mas YouTube. Ambot kun mao na gyud ni ang tibuok salida kay duna may miingon nga trailer ra kuno ni mao nga 15 minutos ra ang dagan niani.
NG: Wa diay tangtanga sa YouTube Nyor?
ND: Gitangtang nilag kadiyot dihang nagkagubot sa Middle East pero gibalik ra pud nila. Pero dili na tanang parte sa kalibutan ang makakita niani.
NG: Nganong ila mang gibalik Nyor?
ND: Kay duna may kaugalingong sukod ang YouTube kun unsay angay ug dili angay nga ipasundayag sa ilang site ug ang video nga “The Innocence of Muslims” wala man makasupak sa ilang lagda. Wala man kini hubo-hubo o pakighilawas. Wala usab kini moawhag og pagdumot. Usa man lang kini ka comedy nga gabugal-bugal sa prophet Muhammad sa Islam.
NG: Unya Nyor bisag daghan na ang nangamatay ila gihapon kining ipasundayag?
ND: Ikaw Nyor, pananglitan duna kay i-post sa YouTube unya wa ko ka uyon. Unya anamanamon nakog daub ang mga building sa among palibot ug mobahad ko nga di ko moundag pangdaub kon di tangtangon sa YouTube ang imong video, maayo kaha na?
NG: Unsa may labot sa akong gipost nga video sa imong mga palibot ug kasilinganan?
ND: Mao lagi. Mao nay baruganan sa YouTube. Inosente kining maong pelikula sa maong kagubot ug pinatyanay.
NG: Kun walay sala kining maong pelikula nga giingong hinimo sa usa Egyptian nga Kristyano nga daghang kasong dispalko, unsa man diay hinungdan ning maong kagubot?
ND: Una, nasayran na karon nga daghan diay sa mga nanghasi mga binayran.
NG: Mao ba? Pero di pud tingali tanan kanila binayran?
ND: Tinuod dili tanan. Ubay-ubay sab ang mga tawo nga religion ray kahatag og kahulogan sa ilang kinabuhi –mao kini ang mga fanatic.
NG: Nganong init man kaayog ulo ning mga fanatic, Nyor, basta religion maoy issue?
ND: Kuwang silag tolerance ug humor kay kasagaran ning mga fanatic, Nyor, wala man kaeskwela. Ug kun ni eskwela man gani ni sila, religion ray gitun-an. Mao nga di kini sila kakomedyahan.
NG: Unsa pay laing hinungdan Nyor?
ND: Kasagaran ana nila Nyor gipul-an o gisamukan nas mga Amerikano. Nangita lang ni silag bikil. Ug kasagaran nga nanguyog sa panon mao ning gitawag sa CNN og “young men looking for trouble.” Sa binisaya mga way lingaw. Mga tawo nga way trabaho, way sapi, unya galagot sa mga puti nga dugay nang nanimuyo sa ilang lugar ug mao nay gabuot-buot sa padagan sa ilang kinabuhi. Nangita ni silag katarungan para manghasi. Kun wa pa ning maong video mangitag ni silag laing hinungdan para sila makapanghasi.
NG: Sa ato pa wa gyud diay labot ang maong video niani.
ND: Gihimo ra to nilang posporo para padilaab sa dugay na nilang kalagot. Kun tagaan ta diay kag posporo imo diay nga dauban ang inyong lugar?
