Sama sa nangaging katuigan gibuksan ang 2012 Cebu Press Freedom Week celebration sa usa ka freedom walk kon parade kagahapon sa buntag nga nakabalda sa dagan sa mga sakyanan.
Moapil na lang sab ko sa pagpangayo og dispensa niadtong naatlan sa traffic gikan sa Ayala area paingon sa San Jose Dela Montaña hangtud na sa may SM City Cebu gikan sa alas-7:30 a.m. ngadto sa -8:30am.
Niining ika-18 na ka tuig nga selebrasyon ang Cebu Daily News maoy lead convenor nga gipangulohan ni Ma’am Eileen Mangubat.
Nagpalahi mi karong tuiga kay ang parade gikan diha sa Ayala Business Park ug sungko didto sa SM City Cebu Trade Hall unya gisundan sab dayon sa Santos nga Misa ni Fr. Carmelo Diola.
Human sa Misa gisunod ang different presentations sa mga media outlets ug gisagbatan sa raffle draw sa mga panahon nga dunay lull.
Gikan karong adlawa hangtud na sa Sabado dunay mga dagkung kalihukan kaming mga sakop sa media, usa na ang championship sa basketball tournament nga sangkaan sa mga tigbalita sa Cebu City Hall ug sa Philippine National Police ug military.
Unya mag-ilog sa third place ang Justice ug ang Sports beat diha sa Cebu Eastern College sa mga alas-8 sa buntag. Samtang inig kagabii mao na ang culmination night nga duyugan sa harana, balak ug balitaw sa lain-laing beat organizations.
* * *
Unsa ka tinuod nga dunay liboan ka mga molupyo ning dakbayan nga magmartsa ugmang adlawa gikan sa Fuente Osmeña paingon sa Ombudsman Visayas aron sagpaon og upat ka mga kiha si Kongresista Tomas Osmeña?
Ang pinakabug-at nga asunto batok ni Osmeña mao ang kontrobersyal niyang pag-angkon sa sakyanan gikan sa taga-Big Foot.
Kun madayon man kining maong lakang sigurado ko nga ang sabot niini ni Osmeña ug sa mga hinanib niya mao nga binuhatan kini sa iyang mga kaatbang sa politika nga gipangulohan ni Cebu City Mayor Michael Rama.
Pero alang kanako dili nako igsapayan nga pamolitika ang motibo. Ang importante nga ma-imbestigahan kining maong isyu aron masubay ang propriety sa giingong pag-donate ug sakyanan sa taga Big Foot ngadto sa mga Osmeña human nakasulod og kontrata sa pag-abang diha sa South Road Properties.
* * *
Daghan kaayong salamat sa mga \ tigpaminaw sa akong programa sa radyo matag gabii sa dySS Super Radyo kon Radyo GMA nga “Lloyd Suarez On Board Saksi” kay nagpabilin gihapong number 1 sa bag-ong survey sa Nielsen Media Research.
Sa figure nasubay nga inig lingkod nako sa alas-9 sa gabii misaka og samot ang gidaghanon sa mga maminaw nga togub sa mga komentaryo ug puno sa mga lab-as nga balita ug mga nagkalandrakas nga mga impormasyon.
Sa third quarter survey result, Monday to Friday from 9 p.m. to 9:30 p.m. ang akong programa nakakuha og 0.91 samtang 0.22 sa dyHP unya ikatulo ang dyMF Bombo Radyo nga dunay 0.07.
Sa 9:30 p.m. to 10 p.m., nag-una gihapon ko sa samang puntos samtang sa 10 p.m. to 11 p.m. nanghawod gihapon ko sa 0.13 samtang way gibutang nga puntos ang dyHP unya 0.07 ang sa Bombo Radyo. Ang dyAB nakakuha ug 0.07 niining orasa apan way gibutang nga score sa 9 p.m. to 10 p.m. ang slot sa dyAB.
Again salamat sa inyong salig ug kompiyansa ug maglaum ko nga magpabilin kini isip maoy giya kanako pagpalapad sa serbisyong tinud-anay.
* * *
Maayo kay nakapaminaw diay ang mga paryente ug mga kaubang gwardya ni Elmer Ian Ilagan sa akong mga programa sa radyo kinsa usa sa tulo ka mga gwardya nga buot ipadakop sa korte kay way tunga-tunga sa bista sa kasong robbery with homicide batok nilang Meloy Garcia, Danilo Flores ug mga kaubanan nga gipanglambigit sa pagtulis sa La Nueva Supermarket niadtong Aug.13, 2007.
Niadtong Miyerkules sa gabii nga natayming nga wa ko makaprograma kay naibtan kog ngipon nanawag kanako si Ilagan aron pagklaro nga dili tinuod ang nanggawas nga opinyon sa publiko nga kakonsabo siya sa tulis human nga wa na siya mopakita.
Miesplikar si Ilagan nga wa gyud siyay kasayuran sa mga bista sa kaso ug wa gyud siya makadawat sukad na sukad og notice ug summons.
Miangkon siya nga human sa nahitabong pagpanulis wa maglangay iyang gibyaan ang GDS Security Agency isip head guard sa La Nueva kay gawas nga gamay ra og sweldo mas nabalaka siya sa iyang kinabuhi dihang dunay daghang nangita kaniya tungod sa pag-execute og affidavit.
Gawas nga mibalhin siya ngadto na sa Tactical Security Agency, milaling usab sila og laing pinuy-anan aron luwas sa peligro ang iyang pamilya.
Si Ilagan nga nabalaka sa iyang seguridad ug nahadlok nga sikopon ug prisohon nagpatabang intawon kanamo ni Chief Insp. Michael Bastes hepe sa Investigation and Detective Management Branch sa Mandaue City Police Office ug nagpakuyog kanamo sa korte.
Magpasalamat siya kay mihatag lang sab dayon og konsiderasyon si Regional Trial Court Judge Douglas Marigomen ug milibkas sa gi-isyu nga bench warrant of arrest batok kaniya.
Apan mibahad ang huwes nga kun di motunga karong October 11 nga bista si Ilagan iya na gyud kining ipabalhug. Pero in fairness sa gwardya sinsero siya nga mo-testify sa kaso batok nilang Meloy Garcia et. al.