Dihang nahagsa ang eroplano nga gisakayan ni Secretary Jesus “Jessy” Robredo sa Department of Interior and Local Government, gisuwayan dayon pagsulod sa iyang undersecretary nga si Rico Puno (dili ang singer) ang iyang opisina ug puloy-anan sa Manila.
Dili makapanghimakak si Puno niani kay daghan man ang nakakita kaniya. Mao tingali nga di na lang siya motubag sa mga media inquiry.
Natural lang nga makahuna-huna kita nga may kalabutan kini sa ilang trabaho. Ug kay dinalian man ang lihok ni Puno, nakahibawo kita nga importante kini ug nga di siya buot nga daghang mahibawo niani.
Unsa kini? Unsa may gitrabaho ni Robredo nga buot dayon makuha ni Puno sa labing madaling panahon? Natural lang nga maghuna-huna kita nga may kalabutan siya niani. Ug tuod man nasayran ta nga gi-imbestigar diay si Puno ni Robredo kabahin sa mga pusil nga iyang palitunon para sa Philippine National Police (PNP).
Dunay gi-order si Puno nga assault rifles nga mobalor og P178 million ug lain pang P213 million para sa PNP Special Action Force.
Nganong natarantar man si Puno ning maong imbestigasyon? May pipila ka mga “tingali” ang mosulod sa atong hunahuna ning usa sa mga badlungong kabayo ni P-Noy sa iyang “tuwid na daan.”
* * *
Sa laing police story, dili na karon makit-an ang police nga giingong nang-extort sa anak mismo sa iyang daku-daku.
Giingong gihudlat ni SPO4 Jose dela Peña ug SPO2 Resty del Rosario ang anak ni Chief Supt. Leonardo Espina. Wa makahibawo ang duha ka ukoy nga ang ilang gipangilkilan anak ra sa ilang amo.
Gihulga nila kini nga dakpon ubos sa kaso nga phone sex (kay gagamit man kini sa iyang cellphone sulod sa nakaparking niya nga sakyanan) kun di kini mohatag kanilag P20 mil. Mihangyo ang batan-on nga 5 mil ray iyang mahatag kay mao ra kini sulod sa iyang ATM. Pag-abot nila sa lugar nga may ATM gihatag sa batan-on ang iyang telepono ni dela Peña kay buot makig-istorya kanila ang iyang amahan. Ug dihang nahibawo-an nila kun kinsay amahan ning batan-ong ila untang pangilkilan, mikaratil ang duha ka police.
Gitangtang na karon sa trabaho ang duha ka police. Wala ni si dela Peña sa iyang panimalay nga karon gipapadlock na.
Nag-atubang na diay og pipila ka kaso sa extortion kining maong police. Ang piankauna niyang atraso niadto pang 2006. Niadtong miaging Mayo dunay manag-uyab nga iyang gihadlok nga pasakaan niyag sumbong nga grave scandal (kay kuno ka robohanay kini sulod sa ilang sakyanan) kun di sila mohatag kaniya og P7 mil.
* * *
Nadungan ko sa radyo kaganina nga buot pa lakrahan ni Congressman Tomas Osmeña ang iyang pribadong sakyanan og “Pulis”” kay pirmi man kuno siyang may kuyog nga bodyguard nga police.
Nangutana ang magsisibya kun unsay mahitabo kun sa paghatud unya ning maong sakyanan kang Osmeña sa airport may masugatan silang krimen? Agian ba lang unya ning maong sakyanan ang hitabo? Kun mahitabo kini dili kaha mahimong ngil-ad ang imahen sa pulis dinhi sa atong dakbayan?
Midugang ang maong magsisibya kun uyon ba kita nga ang tanang pribadong sakyanan sa mga pulis lakrahan sad og “Pulis” kay sama sa katarungan ni Osmeña may pulis man sad nga sakay niani.
Kun gusto man gyud magpulis-pulis si Tomas, kita ngari sa Salins Hulbot mosugyot nga magpatahi na lang siyag uniporme sa police.