Kanus-a tinud-on kining mga adik sa druga nga hangtud karon aktibo pa sa pagkapulis ug pagkabombero?
Kaniadto pa kita makadungog nga dunay mga nagpositibo sa drug test apan wa pa ko makadungog nga gipangtaktak sa serbisyo kining mga kanahan.
Wa ko matinga sa migawas nga balita karong bag-o nga dunay lima ka mga personnel sa Bureau of Fire Protection nga nagpositibo sa paggamit og ginadiling drugas.
Apan ang nakaporke niining maong balita kay sa lima nga nagpositibo usa niini babaye unya opisyal pa gyud.
Sa akong nahibaw-an siya usa ka kanhi Municipal Fire Marshal sa usa sa mga malamboong lungsod sa habagatang bahin sa lalawigan sa Sugbo unya karon nagserbisyo isip Deputy Fire Marshal sa usa sa mga dakbayan dinhi sa Metro Cebu.
Apan in fairness niya iyang gialkontra ang findings sa nag-drug test kanila pinaagi sa pagpa-drug test og laing drug testing center unya matud pa nahimo siyang negatibo.
Sa mga experto daghang paagi nga manegatibo sa resulta ang ipa-drug test.
Buot ipasabot nako nga kadtong unang resulta nga positibo siya maoy opisyal ug maoy labing ilhon nga resulta kay surprise drug testing kadto.
Maglaum ko nga dili mainutil ang liderato sa BFP pagpahamtang og tukmang silot ilabina kang bag-ong Department of Interior and Local Government (DILG) Secretary Mar Roxas batok niining mga badlungon sa serbisyo.
* * *
Usa ko sa mga mosuporta niining ordinansahon nga gipanday karon sa Cebu Provincial Board nga mopahigayon og random drug testing alang sa tanang mga tinun-an gikan sa elementary ngadto na sa college level.
Akong nakita nga maayo ang katuyuan ni Provincial Board Member Carmen Remedios “Ivy” Durano Meca kinsa ex-officio member sa Sangguniang Panlalawigan isip presidente sa Philippine Councilors League Cebu Chapter.
Niadtong Sabado atol sa among programang “Dialogue on the Air” sa dySS Super Radyo akong gikuhaan og opinion si bokal Meca kun angayan ba gyung i-apil ang mga elementary students human nga akong nakita nga daghang mga tag-as na og edad nga klaro gyud kaayong mga adik nga nagbalik-balik sa elementarya.
Miingon si kagawad Meca nga sa iyang personal note ug opinion mas maayo gyung apilon apan wa siya makasiguro kun unsay sentimento sa iyang mga kaubanan sa Hunta Probinsyal.
Sa maong programa gihangop sa legal consultant ni Meca nga si manlalaban Edmund Lao ang akong sugyot nga kinahanglang klarohon kun kinsay mga maglangkub sa tukoron nga gitawag og Anti-Drug Abuse Committee (ADAC) nga maoy pangsilotan kun dili makaimplementar og drug test sa mga tinun-an.
Basi man gud sa draft ordinance nga ang maglangkub niini mao kining mosunod: 1.) school personnell 2.) student leaders 3.) officials of the Parent-Teachers Association (PTA).
Kun buot huna-huna-on basi sa draft ordinance pwedeng ibutang sa ADAC ang tiglimpiyo og gwardiya sa eskwelahan nga kuwang sa legal personality nga mohimo sa maong gimbuhaton.
Si Dr. Berna Ysulan nga nagrepresentar sa Department of Education (DepEd-7) misugyot nga kun mahimo matag duha lang ka tuig ang random drug testing sa mga tinun-an.
Sila si manlalaban Mauro Licen, legal counsel sa Philippine Drug Enforcement Agency in Central Visayas ug Supt. Jun Albotra sa Cebu Provincial Police Office miingon nga nalipay kaayo sila niining maong ordinansahon kay makatabang kini sa ilang gitinguha nga mahimo na kitang drug free.
Si manlalaban Paul Clarence Oaminal kinsa nakaserbisyo isip undersecretary sa Dangerous Drugs Board mipadayag nga ang pinakadakung problema sa implementasyon niini mao gyud ang kwarta. Kun way budget, way mahims.
Maglaum ko nga molampos pagpasar ang mga sakop sa Provincial Board sa dili pa mahuman kining ilang termino.
Manghinaut lang sab ko nga di lang kita kutob sa drug test ug kinahanglang dunay komprehensibong programa alang sa drug addict pinaagi sa pagbutang kanila og rehab centers nga medyo makaya sa bulsa sa mga ginikanan.
* * *
Nindot gyud diay duwaan ang main basketball gym sa Cebu Eastern College (CEC) kay insakto sa kagamitan unya tabla gyud unya safe kaayo ang mga sakyanan sa ilang parking area.
Insakto gyud sila si sir Jefferson Go Executive Director sa CEC ug sir Sammy Sia head coach sa CEC nga kinahanglang mag-warm-up gyud kay bugnaw ang ilang gym kay anaa sa ibabaw sa ilang eskwelahan ang main gym nga maoy among venue niadtong Sabado atol sa opening sa 2012 Cebu Press Freedom Basketball Cup.
Salamat nga milampos gyud mi sa among opening bisan dunay mga kakulian ug di pa kompleto sa uniform ang mga players uban sa suporta sa tanang mga beat reporters nga maoy mga players ug ni NBAC commissioner Bobby Inoferio.
Again salamat sa management sa CEC nila ni sir Jeff ug sir Sam ug sa ilang property custodian nga si John Mara-at nga mitugot kanamong mga sakop sa media pagpagamit sa ilang gym.
Salamat sab nila ni Sgt. Allan Abuhan, Darwin Muralla ug mga kaubanan sa barangay Apas nga gi-train ni Kapitan Ramil Ayuman pag-referee ug pag-officiate sa among mga liga.