Grabe ang corruption sa CAAP?

Unsa ka tinuod nga ang Civil Aviation Authority of the Philippines (CAAP) susama ra sa corruption sa Land Transportation Office (LTO) nga motugot ug mopalusot sa renewal sa mga “floating coffin” nga mga eroplano bisag way gihimong actual  inspection?

Nagpasabot ba sab kini nga ang mga operator sa mga chartered flights ug mga light aircraft nagpalandong sa mga politiko nga maoy hinungdan nga di makabalibad kun magpahatud sa bisan asang lugar sa Pilipinas ug taliwa nga mabutang sa risgo ang ilang mga biyahe?

Tulukbilon kaayo ang pamahayag ni Cesar Lucero kinsa usa ka beteranong imbestigador sa CAAP kinsa miingon nga sa iyang inisyal nga imbestigasyon dili si Capt. Jessup Bahinting ang  nagmaniho sa iyang Piper Seneca plane kun dili ang estudyante  nga co-pilot nga si Kshitiz Chand.

Sa pamahayag ni Lucero makadaot kaayo ngadto kang Captain Bahinting ilabina nga mibuhi kini og mga pulong nga doble ang igo sa pangwarta ni Bahinting.

Nagpasabot nga doble ang igo ni Bahinting ngan nga ang estudyante nga Nepalese national mobayad pa ngadto kang Bahinting og dakung kantidad sa training sa pagpalupad og eroplano unya makakwarta pa si Bahinting sa paghatud nila ni Secretary Jesse Robredo sa Naga City pinaagi sa chartered flight.

Pero kun tinuod man kining teyorya ni Lucero, wa siguro pabayra ni Captain Bahinting si Secretary Robredo ngan nga  amigo ra apan daku sab kini og investment ni Bahinting ngan nga si Robredo pwedeng makahonghong sa mga kurakot nga mga opisyal sa CAAP nga i-compromise ang actual inspection sa iyang mga light aircraft.

Apan in fairness sa taga CAAP, gidepensahan nila ni MCIAA General Manager Nigel Paul Villarete, Captain Stephen Toring chief flight instructor sa Indiana Aerospace University  ug  ni engineer Benison Momo course coordinator sa Institute of Engineering and Technology sa PHILSCA kon Philippine State College of Aeronautics atol sa among programang “Dialogue  On The  Air” niadtong Sabado.

Matud nila nga basi sa ilang experience magkinto gyud sila sa mga inspector sa CAAP tungod kay instrikto gyud kaayo tungod kay ang safety maoy gitan-aw.

Hinuon dili sila makaistorya sa uban kun giunsa pag-inspection.

Akong nahibaw-an nga miabot og sobra sa 500 ka mga gagmayng eroplano nga pang-aviation flights ug wa pay labot dinhi ang  mga pang-international ug pang-domestic flights.

Basi sa lagda, matag tuig gyud ang renewal sa registration sa ilang mga aircraft.

Sa gidaghanon sa mga eroplano tibuok Pilipinas makaya ba sa taga-CAAP ang pagpahigayon og actual inspection nga ang tuig duna lay 365 ka adlaw pun-an pa sa kagamay ra og tawo sa CAAP?

Kun maka-inspect man sa mga eroplano, giunsa man nila pag-inspect, gi-moryo-moryo lang or wa nay inspection sa mga aircraft basta ang mga operator ug tag-iya way reklamo sa mga dagkung politiko nga mopahimulos sa ilang mga abyon?

Samtang kabahin sa gitawag og “emergency locator transmitter” matag eroplano, gipasabot sa mga  eksperto nga kuli gyud kaayo kining maguba kay anaa kini gibutang sa pinaka-safe nga dapit sa eroplano.

Ang rason nga dili mag-function mao kining mosunod: Una, gituyo pagpawong sa piloto. Ikaduha guba ang battery ug ang  ikatulo mao nga ang impact sa pag-crash sa eroplano dili makapa-trigger sa iyang pag-function.

Maglaum ko nga kining CAAP usa sa mga buhatan sa gobyerno nga tutukan pag-ayo sa gobyerno ni Presidente Noynoy Aquino.

* * *

Daku kog pagsalig nga matul-id ug matunhay na ang liderato sa Korte Suprema niining pagkatudlo ni Associate Justice  Maria Lourdes Punzalan Aranal Sereno isip ika-24 nga Chief Justice sa Korte Suprema.

Syarog way kausaban sa 18 niya ka tuig nga pagdumala sa hudikatura kinsa giisip nga tarong ug makamao sa trabaho.

Kining 18 ka tuig nga termino ni Sereno taas ra gyud kaayo  kun magtinunto ni siya.

Apan mubo ra kini kung magtinarong gyud siya ug epektibo kaayo ang iyang liderato.

Kun di ma-impeach morag makaluluoy kaayo kadtong mga naghuna-huna sa pwesto kay di na gyud makalingkod sa gisubay  nilang edad.

Maglaum ko nga kining pagkatudlo ni Sereno manakod kini sa  mga lower courts nga dili na modawat niadtong medyo nang-gungis na sa edad nga gamiton na lang pang-retirement package ang judiciary.

* * *

Maayong balita alang sa tanang mga sakop sa Cebu media nga  mga newsmen nga nadestino sa matag beat kay ato  nang buksan karong Sabado Setyembre 1 ang mubo natong liga sa basketball isip usa sa mga highlight sa 2012 Cebu Press Freedom Week.

Akoy nasugoan ni Ma’am Michelle So, executive editor ug administrative operations sa Sun.star niining maong kalihukan kay na busy na si Sir Jun Migallen nga maoy nagpasiugda ning maong kalihukan.

Mas bongga ning maong torneyo kay giangkon ang tanan sa San Miguel Corp. diin langkuban lang og upat ka teams ug dunay tag-12 ka mga players.

Salamat ni Sir Bobby Inoferio commissioner sa Newsmen Basketball Association (NBAC) nga mitabang kanamo pagporma  sa upat ka mga teams ug ubang technical assistance.

Magpasalamat sab ko sa Cebu Federation of Beat Journalists (CFBJ) pinangulohan ni Sir Elias Baquero kay sa among tigom niadtong Sabado sa gabii way duha-duha nga mosanong sa ubang bayranan sama sa uniporme niadtong mga madugang nga mga players.

Gi-aprobahan sab sa CFBJ ang akong komedya nga sugyot nga ang tema  sa presentation atol unya sa culmination activity sa Cebu Press Freedom week mao ang pagpukaw sa kanhi-ay nga mga hiyas sa atong katigulangan pinaagi sa balak, harana ug balitaw.

Makalingaw kini kay gamiton gyud ang pinulongang Bisaya as in bisdak gyud.