Pagkaluoy gyud nila ni Interior and Local Government Secretary Jesse Robredo ug laing duha ka mga piloto nga na-crash didto sa kadagatan sa Masbate niadtong Sabado sa hapon nga hangtud sa pagsuwat ning maong lindog padayon pa silang gipangita.
Daku gyud kaayo kining kasub-anan sa pamilya ni Robredo ug ingon man kanatong mga Sugbuanon kay naapil si Capt. Jessup Bahinting nga maoy nagmaneho sa twin-engine Piper Seneca plane uban sa usa ka Nepalese nga co-pilot nga si Kshitiz Chand.
Si Captain Bahinting nakamugna og bayanihong binuhatan niadtong miaging semana kay siya maoy nakaluwas sa kinabuhi niadtong zoo keeper nga napaakan og cobra tungod kay wa siyay duha-duha pagpakuha sa anti-venom didto sa Camiguin aron pagluwas sa biktima.
Bugtong ang aide ni Robredo nga si Senior Insp. Jun Abrazado ang naluwas kinsa misugilon nga posibleng wa makagawas sa eroplano ang kalihim tungod kay naka-seatbelt atol sa pagkahagsa sa eroplano.
Si Consolacion Mayor Theresa Alegado nga maoy opisyal sa Sugbo nga gipakig-kitaan sa kalihim niadtong Sabado human sa kalihukan sa Cebu International Convention Center (CICC) wa makalimot kang Robredo nga miingon pa kaniya nga di kini gusto og taas nga introduction sa iyang pagkatawo kun siya maoy kuhaong guest speaker.
Nagpasabot lang kun unsa kasimple si Robredo ug way kausaban sa iyang pagkatawo taliwa sa ranggo nga iyang gihuptan.
Nagkanayon si Mayor Alegado nga didto pa naniudto si Secretary Robredo sa ilang lungsod sa Consolacion ug naingganyo kaayo diha sa ilang lungsod ug daghang mga pangutana kabahin sa kaayuhan sa ilang lungsod.
Nagkanayon si Mayor Alegado nga wa mosanong si Secretary Robredo sa ilang imbitasyon nga anhi matulog sa Sugbo ug makighugoy-hugoy sa ilang kapartido sa Liberal Party (LP) kay medyo nagdali.
Matud niya nga wa sila maghisgot og politika kay mitugon pa kini kaniya nga mobalik ra siya dinhi sa Sugbo karong semanaha kay makigtagbo sa mga kadagkuan sa LP uban ni gubernatorial bet Hilario Davide III.
Si Cebu City Traffic Operations Management Chairman Jack Jakosalem usa sa mga nasubo kaayo niining maong trahedya.
Gani sa wa pa nahitabo ang trahedya iyang irekomendar nga hatagan og pasidungog si Captain Bahinting tungod sa dakung tabang niini sa zoo keeper nga si Ronaldo Aventurado.
Matud ni Jakosalem nga mi-text pa kini kaniya og “Praise the Lord” dihang iyang gipahibawo nga maayo na ang kondisyon sa zoo keeper.
Sa pagsuwat ning akong lindog kagahapon pabiling missing si Robredo ug ang laing duha ka mga kauban basi sa report sa GMA News TV.
Among kauban sa GMA News and Public Affairs nga si John Consulta nga didto sa Masbate miingon nga napadala na ang sonar equipment gikan dinhi sa Sugbo aron makatabang og daku sa ongoing search and rescue operations.
Maglaum ko nga kun dili gyud itugot sa Kahitas-an nga buhion sila si Robredo maayo na lang unta nga makit-an ang ilang patayng lawas aron kahatagan kini og desenteng funeral services.
Moduyog ko sa pangaliya sa mga kabanay ug mga kauban sa gobyerno nga unta luwas pa sila si Robredo.
* * *
Salamat kang Director Oscar Tabada sa Philippine Atmospheric, Geophysical and Astronomical Services Administration Visayas nga mihatag og komprehensibong presentasyon atol sa among programang “Dialogue On The Air” niadtong Sabado nga maoy maglig-on sa akong baruganan nga kinahanglang supakon natong mga Sugbuanon o tibuok Central Visayas kining proposal nga adto na sa Setyembre ang tingbukas sa klase sa mga tinun-an inay sa naandan nga matag buwan sa Hunyo.
Sa akong nasabtan ni Director Tabada, mas maproblema kita dinhi sa Central Visayas kun Setyembre ang school opening kay sulod sa 35 na ka tuig nilang obserbasyon ang mga buwan sa September ug October maoy mas daghan og uwan ug gani mo-average og tag 15 ka adlaw nga uwan niining duha ka buwan.
Matud pa sab ni Tabada nga naandan na sab nga ang buwan sa November ug December maoy ting-igo sa bagyo dinhi sa Central Visayas.
Alang lagi nako nga kun gusto man sa taga-Manila nga usbon ilang opening sa klase, wa man siguroy problema. Ang importante nga di nila anginon ang Central Visayas ug ubang rehiyon nga mas kampante nga ipabilin ang naandan nga sa June gyud ang school opening.
Matud pa ni Talisay City Schools Division Superintendent Woodrow Denuyo nga nagtuo siguro ang taga-Manila nga sila maoy tag-iya sa tibuok Pilipinas.
Nganong anginon man ta dinhi sa Sugbo ug sa Central Visayas nga kun panahon nga sila magbaha didto apan igang man kaayo dinhi sa ato.
Si DepEd Asst. Regional Director Caridad Labe mitug-an nga sa survey niadtong 2009, 13 sa 16 ka mga rehiyon ang supak pagbalhin sa school opening ngadto sa Setyembre.
Ang tulo ka mga rehiyon nga uyon mao ang Region 6 (Western Visayas) kay ang proponent nga si Senador Franklin Drilon taga-didto man.
Ang laing duha ka rehiyon nga uyon mao ang Region 9 (Western Mindanao) ug ang Region 3 nga mao ang Central Luzon.
Na-establisar usab sa survey nga 66 porsiento ang nangatarungan nga makahasol kaayo sa mga tinun-an nga magklase tungod sa grabeng kainit nga panahon sa mga buwan sa Marso, Abril ug Mayo.
Gawas pa sab mag-antosugyud ang taga DepEd sa bayranan sa koryente kay possiblo man gyud nga magdugang kita og bentilasyon aron mahanginan ang mga nagsugwak nga mga estudyante sa matag classroom.
* * *
Sayang kaayo ang team sa Sun.star Daily kagahapon nga na-forfeit na sab batok sa Cebu Daily News sa second game sa Newsmen Basketball Association diha sa gym sa barangay Apas.
Nakaabot unta sila og lima ka mga players apan late lang gyud kaayong naabot ang ikalima.
Sa first game, midaug ang ABS-CBN batok sa CCTN-47 sa score nga 86-79.
Sa third game wa gyud maka-agwanta sila si Rico Navarro sa The Freeman/Bombo kay kuwang silag players ug wa ang sinaligan nga si Manny Villaruel.
Sayon kaayo silang gipildi sa TV-5 sa score nga 110-68.