Slumdog, real world Pakistani edition
Kun duna kitay mabantayan sa opening sa London Olympics mao kini ang humor sa England ug ingon man ang cultural influence ning maong nasud nga midalit sa Beatles, Harry Potter, Mr. Bean, Monty Python, sa mga nobela ni Dickens, sa mga dula ni Shakespeare ug sa mga sugilanon ni Tolkien ngadto sa tibuok kalibutan.
Ang humor makit-an mo sa ilang multimedia presentation diin ila kunohay nga gipa-parachute ang ilang rayna gikan sa usa ka helicopter ngadto sa ilang stadium, inubanan ni James Bond. Walay mituo nga tinuod kini apan wala manginahanglan og suspension of disbelief ang humor para ka malingaw.
Ang tinubdan ning maong hinanggaw mao si Danny Boyle nga mao director niadtong Oscar-winning film nga Slumdog Millionaire. Giunsa niya pagpatando sa queen nga musakay sa iyang kabuang? Wala maglisod si Boyle pag kombinser sa rayna kay ang tibuok Buckingham household fanatic diay sa iyang pelikula. Gawas pa nationalistic kaayo kining mga English ug murag ma-guilty unya si Queen Elizabeth II kun di siya mosakay sa lingaw kaayo nga tripping ni Boyle.
Ang Slumdog Millionaire usa ka love story sa India diin ang krimen, pangwarta ug kalisud mihatag og conflict sa sugilanon. Gugma vs Kwarta, kun si Max Surban pa. Pero di lang kwarta ang involved dinhi kay apil man ang gambling syndicates ug drug lords. Kultura sa ilegal nga kahamugaway batok sa naandang kalisud.
Apan di na kinahanglan nga mobiya sa Engaland ang mga director nga sama ni Boyle para moasoy ning maong kahimtang.
Usa ka Iftikhar Ahmed, 52, uban sa iyang asawa nga si Farzana, 49, didto sa Chester, England, gisilotan og 25 anyos nga pagkabilanggo tungod sa ilang pagpatay sa ilang dalagang anak nga alang kanila nagka-Westernized na.
Ilang gipatay si Shafilea niadtong 2003 sa 17 anyos pa kini. Sige nila kining gidapog kay lagi mag “make-up” naman kini ug makig-istorya sa mga lalake. Dihang dili gyud kini motuo ila kining gidalag balik sa Pakistan para paminyoan. Alang sa mga ginikanan mao ra kini ang bugtong paagi nga maundang ang pagpakauwaw kanila sa ilang anak nga dalaga.
Apan pag-abot sa Pakistan miyarok kinig para bleach ug nasakit mao na gipada kinig baligk sa England para tambalan. Pagguwa niini gikan sa ospital gipaksan nila ang baba niini og plastic para di na kini makaginhawa. Gibuhat nila kini atubangan sa uban nilang mga anak.
Makalingkawas ra unta ang magtiayon sa maong krimen kay wa may ebidensya ang mga awturidad. Apan sa tuig 2010 gisikop sa mga kapulisan ang lain nilang anak babaye nga si Alesha nga gaplano og armed robbery sa ilang panimalay mismo. Ug sa maong imbestigasyon mihisgot si Alesha kun giunsa pagpatay sa iyang mga ginikanan ang iyang igsoon.
Dili kini bugtong insidente sa mga pamilya nga oriental nga namuyo sa Europe. Tungod kay kadaghan naman kini mahitabo duna na kini ngalan: Honor Killing. Maayog may makahimo og sine niini para mas daghan nag makaita ug makasabot ning maong kahimtang sa mga tawo nga mosuway pagpatuman sa mga kinaiya sa ilang lugar sa dapit sa laing mga tawo.
