With all due respect mapalig-on lang ang kampanya sa pagpanakop sa mga manglimosay sa kadalanan panahon nga magsaulog kita sa gitawag ug Anti-Mendicancy Month nga mao ni karon ang gisaulog.
Kun way selebrasyon ug way rekognasyon mingaw pa sa tirana ang mga naglangkub sa Anti-Mendicancy Task Force nga gilangkuban sa mga opisyales sa gobyerno.
Akong gibasehan niini kay wa gyud mabadlong ug wa gyud mahipos sa atong mga kadagkuan sa gobyerno ang mga naglaroy-laroy ug mga manglimosay sa kadalanan ug kining mangatug sa aseras o sidewalk.
Way gamit ang task force kun magpabilin kining maong problema ug kini maoy sukaranan sa akong pasangil nga inutil ang liderato ni City Mayor Michael Rama.
Taud-taud na kining balaura nga magsilot niadtong mohatag og limos ug niadtong molimos apan may lang sa sinugdanan.
Sama sa akong giingon nga wa gyuy motunol kun nahipos sa gobyerno kining mga tawhana ug gitudloan kun unsaon pagkabuhi ug desente.
Apan ang subo nga palandungon kay mismo ang atong mga naglangkub sa Cebu City Anti-Mendicancy Office nga gipangulohan ni Betty Ganub mipadayag nga di gyud sila makapasalig nga wa nay manglimos sa kadalanan kay limitado kaayo sila og mga tawo unya kuwang sa suporta sa ubang mga opsiyales sa Ciudad ug sa kabarangayan.
Asa man ang teamwork sa “Team Rama”?
* * *
Sa akong analysis way makadawat sa gitanyag nga cash reward sa mga kadagkuan sa Philippine Amusement and Gaming Corporation (Pagcor) kay wa man madakpi si Pascual Urian Jr. na ilang gwardya nga miunay pagsibat sa P2.8 milyones.
Ngan nga mibolontaryo pag-surrender si Urian sa kapulisan sa Panay way tulubagon ang Pagcor pagbayad.
Grabeng uwawa gyud sa pamilya sa gihimong pagpangawat ni Urian.
Ang iyang pagkakiriwan maoy epekto sa iyang pagka-gumon sa drugas, pagkasugarol ug pagka-materialistic.
Pwerteng sayanga gyud sa iyang trabaho kay dagku unta siya og sweldo ug benepisyo pun-an pa sa mga ihatag nga balato sa mga customers.
Unsa to iyang giingon nga igo ra siyang nayawaan ug natintal sa iyang gihimong krimen?
Ang tawo nga kawatan, kawatan gyud! Busa mag-antos siya sa bilangguan.
* * *
Si Ian Charles Griffiths nga uyab ni Bella Ruby Santos nga gilambigit sa kasong pagdagit ug pagpatay sa bata nga si Ellah Joy Pique nanghatag og upat ka sakong bugas humay ug mga kinarton nga assorted goods alang sa mga biktima sa baha sa kaulohan.
Kaniadto sab si Bella maoy nanghatag sa mga biktima sa sunog og gipaagi gihapon sa ilang abogado nga si manlalaban Rameses Villagonzalo.
Hinuon in fairness sa manag-uyab nga mga suspetsado immaterial kini sa kaso nga ilang giatubang.
Pero dili kalikayan ang pagtuo sa publiko nga gihimo kini nila ni Griffiths aron magpahumot sa publiko.
* * *
Wa nako matinga sa migawas nga balita nga gi-reclaim na ang Balili property kay dugay na nako ning gipagawas nga istorya human nga ang akong kasaligang tinubdan nga taga-barangay Tinaan, Naga City maoy misugilon kanako.
Gani matud pa, bisag gabii gisigihan pagtrabaho ug gipaspasan pag-ayo.
Hinuon in fairness nila ni Gov. Gwen Garcia pagbuto pa lang sa isyu apil na sa ilang plano ang pag-reclaim sa controversial nga property aron himuon nilang eco-tourism site ug aron kapahimuslan.
Alang nako kun unsay tinuod dili na lang gud molimod ug magpagoryo-goryo sila si manlalaban Rory Sepulveda kay mabuksan ra man gihapon nang maong property sa katawhan.
Sama sa akong giingon nga anaa ra sa korte ang tanan kun angayan bang konbiktohon sila si Governor Garcia pagpalit sa maong lote.
Kanang ilang gipanghambog nga titulado ang yuta tipik na kana ug kabahin sa ilang depensa.
* * *
Lisud gyud alang namong mga tigbalita basta dunay sayo nga kalihukan nga tambungan sa adlawng Domingo kay manapol gyud og matag sayo ilabina kun nakainom pagka-gabii sa adlawng Sabado.
Sama kagahapon sa among padayong liga sa Newsmen Basketball Association (NBAC) pakyas gyud ang Sun.star Daily/Superbalita pakigharong sa among team kay wa sila makaabot og lima ka players.
Midaug among team sa GMA-7/dySS via forfeit batok sa Sun.star.
Sa second game sayon rang gipilde sa TV-5 ang lig-on nilang kaatbang nga mao ang CCTN-47 kay di sab kompleto.
Sa third game nanganawkanaw ang kadaugan sa Cebu Daily News batok sa The Freeman kay daghan og kakulian ang naulahi.
Salamat diay sa mga naglangkub nga mga officiating officials ug mga referee sa barangay Apas nga maoy nagpadagan nga mahimong hapsay ang among torneyo sa NBAC nga sila si Sgt. Allan Abuhan, John Wyndill Reg, Warren Travero ug Darwin Muralla.