May Catholic vote ba gyud?

Gusto ko nga maaprobahan sa Kongreso ang kontrobersyal nga Reproductive Health bill aron lang gyud pagsuway kun lig-on ba gyud kitang  mga sakop sa Simbahang Romano Katoliko pagpalukapa sa umaabot eleksyon niadtong mga  politiko nga nagpaluyo sa RH Bill.

 
Sa pagkakaron pulos hulga ra gyud ngadto sa mga politiko ang gihimo sa Simbahang Katoliko nga mosuporta sa RH bill.

 
Diha gud sa mga lihok protesta sa kadalanan dunay mga personalidad nga kwestyonable kaayo.

 
Ang uban nagpaka-aron-ingnon basta lang nga makakuyog sa panahon.

 
Mas maayo man gyud nga atong suwayan ang tanan aron kun modaug ang Simbahan sa kawsa  daghan nang mga sungayan ang modangop og balik sa Labawng Makagagahum.

 
Alang nako ma anaa o wala ang RH bill  tulubagon ug responsibilidad kanunay sa mga ginikanan kun unsaon niya  pag-umol ang pamilya  nga di magkagidlay.

 
* * *

 
Makalilisang gyud ang baha kagahapon sa Metro Manila ilabina sa Marikina River ug sa ubang parte sa Luzon.

 
Ambot kun pilay danyos sa mga kabtangan ug  pila ka mga kinabuhi ang naalkanse?

 
Sa mga video footage kagahapon nakita gyud ang pagkahugawan ug pagka-way disiplina sa mga Pinoy tungod sa daghang mga basura nga nagkatag ug nanglutaw.

 
Way kalainan ang batasan sa taga-Manila dinhi sa taga dakbayan sa Sugbo.

 
Ang baha maoy resulta sa pagka-way  disiplina sa paglabay sa basura pun-an pa sa pagpasagad og pamutol sa mga karaan ug dagkung  kahoy.

 
* * *

 
Kinsa mang mga opisyala sa gobyerno ang makababag sa mga organizers niadtong triathlon niadtong Domingo nga usa ka international sports event unya daghang mga sikat, impluwensyado ug mga dagkung negosyante ang misalmot?

 
Ang giapas sa mga kadagkuan sa gobyerno mao ang garbo ug makatabang kaayo kadto sa tourism  industry.

 
Apan wa lang sab nila tan-awa ang negative impact sa “Ironman 70.3” sama sa kahasol sa mga  motorista nga natanggong sa grabeng traffic.

 
Ang laing butang nga wa tan-awa mao nga duna  gyuy mga pagsaway sa mga langyawng atleta bahin sa atong kadalanan nga wa magkaparehas ang gilapdon ug gidak-on ug dunay mga tinapakan. Wa man gud tawon ni sa ilaha.

 
Manghinaut lang sab ko nga sa sunod nga triathlon kinahanglang duna na gyuy proper screening  ug proper medical check-up sa tanang mosalmot aron kalikayan  ang  nahitabo  ni Ramon Igaña Jr.

 
* * *

 
Mas daku ang akong pagtuo nga naghiko si PO1 Arnold Law-ay sulod sa iyang kwarto niadtong Lunes sa buntag diha sa barangay Basak dakbayan sa Lapu-Lapu bisag way gibilin nga suicide notes.

 
Kay kun disgrasya pa samtang naglimpyo sa iyang armas, adto unta sa ubang parte sa iyang lawas ang igo sa bala.

 
Segun man gud sa pagsusi ang point of entry anaa sa iyang tuo nga bahin sa tampihak unya milawos pa sa walang bahin sa ulo.

 
Laing butang nga nakapakonbinse kanako nga naghikog gyud siya tungod kay grabe ang iyang depression dihang wa aprobahi ang iyang promotion sa pagka-PO2 unya daghan kaayo sa iyang ka batch mate ang gihatagan ug promotion.

 
Bisan ang iyang kabanay nakabantay sa mga nanglabayng mga adlaw nga nalahi na gyud ang binuhatan sa pulis.

 
* * *

 
Pagkahayahay sa atong mga kawani sa Kapitolyo kay gihatagan ug dagkung bonus ni Gov. Gwen Garcia atul sa ika-443 nga founding anniversary sa lalawigan sa Sugbo basi sa iyang gianunsyo niadtong Lunes sa hapon.

 
Pulos gyud mapahiyumon ang mga kawani sa Kapitolyo niining mga panahuna kay tiaw muna  dunay makadawat ug P25 mil labing gamay unya P30 mil ang labing daku kadtong very satisfactory ang performance rating.

 
Ang mga job order employee nga outsourced gikan sa mga agency way labot sa bonus segun sa katin-awan ni Provincial Administrator Eduardo Habin bisan ang gigamit nga termino ni Governor Garcia nga across the board ang makadawat og bonus.

 
Apil sa di makadawat og bonus kadtong mga trabahante sa gobyerno nga nagpabadlong sama  niadtong duh ka mga kawani nga nasakpan nga  nag pot session ug kadtong mga nag-atubang ug  administrative investigation nga giingong mga badlungon.

 
Maglaum lang sab ko nga deserving ang atong  mga trabahante sa Kapitolyo nga modawat sa bonus ug way mga lungsoranon nga ilang gipahilak ug gipabalik-balik sa mga transaksyon.