Bisag nakonbikto na, hambugero gihapon
Nagpahambog, nagpasigarbo ug wa gyuy pagmahayay kagahapon si retired Air Force sergeant Nestor Bugarin human nga gikonbikto siya ni Regional Trial Court Judge Estela Alma Sinco sa kasong double murder ug sa usa ka attempted murder sa pagpamusil patay ug pag-angol sa iyang mga in-laws diha sa barangay Apas ning dakbayan niadtong tuig 2008.
Akong nakita kagahapon nga mora gyud siyag aliwas kay inay magmahay ug mangayog pasaylo sa mga nahibiling mga kabanay apan iya pang gipainit kagahapon sa iyang mga pamahayag namong mga sakop sa media.
Miingon si Bugarin nga mas maayo pa siya kay sa mga biktima kay siya dakung buhi ug may kaugmaon pang makalingkawas ngan nga may kinabuhi pa.
Midugang si Bugarin nga makaluluoy ang iyang father-in-law nga biktima nga si Cristito Pontanar ug iyang brother-in-law nga si Esmeraldo kay atua na sa “six feet below the ground” unya mga ensikto maoy nagpahimulos.
Gawas niini nagpasigarbo pa si sergeant Bugarin sa iyang tattoo sa iyang kalawasan nga nag-imprinta sa iyang assignment kaniadto sa pagka-sundawo.
Gipatik usab sa iyang lawas ang birthday sa iyang mga sakop sa pamilya lakip na ang iyang motto nga gisubay ug ubang importanteng butang sa iyang kinabuhi.
Si Bugarin namahayag nga kun wa pa siya unhi sa iyang mga in-laws dili unta kadto mahitabo kay iyang gisaad nga wa siya gi-train aron patyon kun di siya maoy mopatay.
Nagpasabot ba kini nga grabe gyud ang iyang pagdumot sa pamilya sa iyang in-laws?
Ang makaluluoy niini ang asawa sa sarhento ug mga anak nga direktang kadugo sa mga biktima ug sa mga nahibiling kabanay.
* * *
Lisud na gyud kaayong sumpoon ang drugas sa dakbayan sa Carcar.
Ambot kun unsa ka tinuod kining alegasyon batok ni Carcar City Mayor Nicepuro Apura nga giingong nalambigit sa illegal drug operation.
Kaniadto pa kining mga pasangil ug motumaw basta magkaduol na ang eleksyon.
Dunay akong amigo nga nangalagad kaniadto sa National Bureau of Investigation (NBI) mikompirmar nga under surveillance nila si Mayor Apura kaniadto apan negatibo gyud ug wa silay nakuhang ebidensiya.
In fairness ni Mayor Apura napasanginlan lang siguro tungod kay kalit nga misulbong ang iyang negosyo ug maoy nakapadato kaniya ang kabahin sa pagpanggama og mga sapatos ug tsinelas.
Pero mas maayo tingali nga dunay action plan si Mayor Apura pagpakiggubat batok sa mga nalambigit sa pagbaligya og illegal drugs sa iyang ciudad aron di siya madudahan.
Unsa may motibo niadtong pagpusil patay sa sakop sa Tau Gamma Phi nga taga-Sibonga nga si Cyrus Elmer Suico niadtong Lunes sa hapon? Ang paghitak sa shabu sa Carcar? O may kalambigitan gihapon sa pagpatay sa anak ni Mayor Apura?
* * *
Unsa man gyud ka-substandard ang mga dike ug seawall sa mga barangay sa dakbayan sa Talisay nga anaa nahimutang kilid sa dagat?
Naglibog ko kay sa ubang mga lugar sama sa barangay Pasil ning dakbayan ug ingon man sa South Road Properties wa man lagi mangaguba ang mga seawall bisag dagkung bawod.
Wa kaha kurakuta ang ubang budget sa seawall nga nagsigeg kaguba sa higayon nga maglain ang dagan sa panahon?
* * *
Maayo kay mihimo na og lakang si Regional Trial Court Executive Judge Silvestre Maamo kabahin sa obserbasyon sa publiko niadtong pipila na ka mga Lunes nga milabay nga gamay na lang kaayo ang mga kawani sa korte sa Palace of Justice ang manambong sa flag-raising ceremony.
Niadtong Lunes sa buntag nakadawat na lang ko og balita sa mga kawani sa korte nga daghan na silang nanambong ug matud pa miabot na og 80 porsiento.
Midaghan ang attendance kay nagpagawas diay og direktiba sila si Executive Judge Maamo og Central Clerk of Court Jeoffrey Joaquino nga nagmando sa mga trabahante nga manambong sa flag raising.
Maglaum ko nga mag-pirme nang 100 percent ang ilang attendance kay tipik ug kabahin kini sa ilang sweldo.
Kun gikinahanglan nga dunay corresponding penalties mas maayong ipatuman ilabina ngadto sa mga huwes ug mga clerk of court nga mapakyas pagtul-id sa ilang mga ligoy nga mga kawani.
