Asa naman ang kaisog ni Bella Ruby Santos?
Unfair kaayo ngadto sa korte kini’ng strategy sa mga abogado ni Bella Ruby Santos nga magsige’g panghangyo sa husgado unya ang akusado wa mobolontaryo pag-surrender.
Nganong dili man unahon ni Bella ang pag-submit sa iyang kaugalingon ngadto sa court jurisdiction?
Ang buot nako’ng ipasabot nga kinahanglang motahan pag-una sa dili pa siya manghangyo sa korte uban sa iyang mga abogado.
Kagahapon akong nahibaw-an nila ni attorney Rameses Villagonzalo attorney Julius Cesar Entise, mga abogado ni Bella, nga moduso sila ug gitawag nga omnibus motion.
Tumong nila sa omnibus motion mao nga ipa-quash o ipa-dismiss ang information sa kasong kidnapping with homicide ug ipa-defer ang issuance sa warrant of arrest samtang ipa-determinar nila ang existing sa probable cause.
Unsa may buot ipasabot sa mga abogado nila ni Bela? Ilang gitudlo-an ang korte nga maglangay-langay sa kaso?
* * *
Maglaum ko nga di magyagaw diha sa sala ni Regional Trial Court Judge Ester Veloso ang prosecution panel nga maoy mo-prosecute sa kasong kidnapping with homicide batok nilang Bella Ruby Santos ug sa iyang uyab nga British national nga si Ian Charles Griffiths.
Basig kutob ra ni sa ngan nga panel unya bati kaayo’g performance. Busa tarunga gyud tawon ninyo kini’ng maong kaso pagdala.
Kagahapon lang medyo supalpal dayon ang prosecution pinaagi sa taga Childen’s Legal Bureau kay ang gi-file nga urgent motion for the issuance of a hold-departure order alang ni Bella way conformity sa mga piskal ug pakyas pagtuman sa mga rekisitos sa hold-departure order.
Nagpakita lang kadto nga wa gyu’y coordination. Hinaut nga makat-on sila sa mga sayop nila’ng gihimo.
With all due respect sa tulo ka mga piskal nga gitukod kagahapon ni Regional State Prosecutor Fernando Gubalane wa pa ko makakita sa ilang labok.
Hinoon ngan nga sila maoy gitahasan ni RSP Gubalane makaingon ko nga de-kalidad kini’ng atong mga piskal nga gilangkuban nila ni Assistant Provincial Prosecutors Petronio Elesterio, Annabelle Robles ug Jerome Abarca.
Ang tulo ka mga piskal abagan sa mga sakop sa Children’s Legal Bureau nga sila si attorney Joan Dymphna Saniel Amit, attorney Noemi Truya Abarientos ug attorney Jo-ann Suarez Pabriaga.
Mag-expect ko niini nga dunay “fireworks display” diha sa korte kay di sab basta-basta ang mga abogado nila’ng Bella nga sila si attorney Rameses Villagonzalo, attorney Julius Cesar Entise ug attorney Lyndon Maceren.
* * *
May ponto si Renante Pique, amahan sa bata nga gidagit ug gipatay nga si Ellah Joy, sa iyang hagit kagahapon nga mogawas na sa iyang lunggaan si Bella ug atubangon ang kaso.
Si Renante naningil kang Bella sa iyang saad sa kaisog kaniadto nga atubangon ang kaso.
Apan asa naman si Bella? Wa na gyud magpakita sukad ang Provincial Prosecutor’s Office mipagawas ug resolosyon nga siya kasohan sa husgado.
Apan iyang mga abogado nga sila si attorney Villagonzalo ug attorney Entise namahayag nga anaa ra gyud si Bella dinhi sa Sugbu.
Apan kun anaa si Bella dinhi sa Sugbu apan nganong di naman siya ma-contact sa iyang upat ka mga linya sa telepono?
* * *
Wa ko matagbaw sa trabaho nila ni attorney Rory Jon Sepulveda ug attorney Jose Maria Gastardo nga mga consultants sa Kapitolyo nga maoy gitahasan ni Gov. Gwen Garcia sa pag-imbistigar sa kamatayon niadtong piniriso sa Cebu Provincial Detention and Rehabilitation Center (CPDRC) nga si Ricky Salidaga.
Nganong wa man sila magkuha ug laing forensic expert aron maoy subling mo-autopsy sa patay’ng lawas sa biktima?
Bintaha man gud unta nga mahiling ug laing experto aron dunay posibleng second opinion o ba kaha malig-on ang unang findings.
Kun kuwartahan pa lang seguro ang pamilya’ng Salidaga sila’y mangunay pag-hire ug experto aron pagtagbaw kanila.
Unsaon pobre man unya ang amahan ug igsoon pulos mga piniriso. Mao nga gimantinilan nalang sa autopsy ni Insp. Joe Martin Fuentes nga nakapa-diskontento kaayo sa kabanay.
