Kid Kalbaryo bids farewell
Ganahan man kita ni Al Evangelio o dili, dili nato malimud nga dili masulat ang kinabuhi sa entablado sa Sugbo sa niaging dekada o duha nga dili maapil ang ngan ning maong direktor. Mahug tang revisionist o bakakon kun mohisgot kitag drama sa dakbayan ug sa tibuok lalawigan unya di nato apilog hisgot si Evangelio. Ganahan man ta niya o dili, adto gyud siyang iapil para dili ma-incomplete ang atong report.
Lalisunon pa (ug gali dili kita magdahum nga may kaundangan ang maong lantugi), kun si Al ba ang pinakamaayo nga direktor sa Cebu sa iyang panahon. Apan walay makapanghimakak nga usa siya sa pinakaimportante nga persona sa dula ug arte ning miaging duha ka dekada. Dili tanan niyang gihimo mga obra maestra. (Ako mismo dili kaayo matandog sa iyang mga musical.) Pero daghan siyang gihimo nga “una” sa mga matang nga pang-entablado dinhi sa ato. Daghan usab siyag napalambo ug natabangan nga mga aktor, mangaawit ug mga pintor.
Apan ang pinakadu tingali niyang nahimo sa atong katilingban mao ang tinuig nga ting Cuaresma nga pasundayag: ang Buhing Kalbaryo.
Dili lang “buhi” ang Buhing Klabaryo tungod kay live reenactment kini sa katapusang mga oras ni Kristo paingon sa iyang pagka lansang. Buhi kini kay kada tuig may mga kausaban mang mahitabo. Nagkanayon si Evangelio nga nahimugso kining maong street/community drama niadtong 1991 dihang nangimbitar ang barangay kapitan sa Lahug niadto nga si Juan Sala og unom ka direktor nga iyang gipangayuan og blueprint para sa usa ka pasundayag nga pang Cuaresma. Matud pa ni Evangelio, nauyon ang maong kapitan sa iyang plano ug mao nga nahimo ang Buhing Kalbaryo sa Lahug.
Midagan kinig duha ka tuig sa Lahug. Dayun gi-import kini sa Madridejos, lungsod sa Isla sa Bantayan nga gipangulohan pa ni Mayor Salazar niadto. Walay Buhing Kalbaryo pagka 1995 kay migawas sa nasud si Evangelio.
Pagbalik niya, iyang gisugyot kang Mike Rama nga himuon kini sa Guadalupe dinhi sa dakabayan. Nauyon si Rama, nga niadto usa pa ka konsehal. Miuyon si Rama ug maong gasugod ang maong tinuig nga pasundayag sa tuig nga 1996 hangtud sa tuig 2000. Milangyaw na pud si Evangelio pagkahuman niani. Mibalik siya pagka 2003 ug gidala na pud niya pagbalik ang maong dula sa Madridejos nga gipangulohan na ni Mayor Mancio. Duha ka tuig ang Buhing Kalbaryo didto.
Mibalik sa Guadalupe ang Buhing Kalbaryo pagka 2005 ug gidirehir kini ni Evangelio hangtud pagka 2008. Sulod ning mga tuiga, dunay tulo ka tinuod nga paglansang sa krus nga gihimo ang maong dula. Diri usang panahuna nga nawa ang maayong relasyon nila ni Mayor Mike Rama ug Al Evangelio. Matud pa ni Evangelio, kuwang ang supporta sa dakbayan sa maong pasundayag. Dihay problema sa binayranay ug sa mga dili maayong partisipasyon sa kagamhanan sama sa wa pag-andam og anesthesia para sa gilansang nga Kristo. Ang napangluoran gyud hinuon ni Evangelio mao nga wa mapatik sa production t-shirt ang iyang pangan.
Molarga para sa New York para sa usa ka medical check-up sa iyang diabetes ug sa iyang mata nga nabutangan ug sayop nga lens sa iyang doctor. Ug kay daw wa na man siyay labot sa Buhing Kalbaryo, adto na lang kuno siya mopuyo sa Biliran, Leyte inig balik niya. Mamuhi na lang kuno siyag baboy ug itik kay suwayan niya kun ingon ba ka malampuson sa iyang kinabuhing teatro ang iya unyang pag negosyo og balot.
Parat.
