Dirty fingers

Nyor Daku (ND): Be, sulti-i ko kun unsay ngan aning tudlua.
Nyor Gamay (NG): Ngano man intawn nga imo man kong eksaminon ana, Nyor? Wa man koy hilig anang anatomy.
ND: General knowledge ra ni, Nyor. Hadlok ka mag mahagbong wa bitaw ni graduhay.
NG: Aw hinuon.
ND: Be, unsa lagi ni?
NG: Sa Ininglis, Nyor, gitawag man na og pointer finger. Basin ang Binisaya niani tudlo panudlo. Hinuon sa lagyong bungtod, simud na may itudlo. Ug sa mga department stores, dili na man pud sila motudlo. Ila na man lang bukharon ilang palad paingon sa lugar nga ilang gituohan nga adto nimo makit-an ang ilang gipangita. Murag nahimong showcase genie ang mga salesladies karon.
ND: Apan mahimo mo usab kining tawgon og eye-cleaner, Nyor.
NG: Ngano man?
ND:  Di ba kini may gamiton natog paghimuta inig ka buntag.
NG: Amaws yawa…
ND: Kini unsa man ni?
NG: Kumingking, little finger, pinkie kon sa mga Kano pa.
ND: Nganong Pinkie man na siya, Nyor, ug di man Linda o Catherine.
NG: Dili tingali na Pinkie nga ngan sa babaye, Nyor. Basig dali tingai ni siya ma pink kon mapiit kay gamay man. Be ako na say mangutana.
ND: Na hala, sigi.
NG: Unsa may gamit ni Pinky?
ND: Di ba na siya newscaster o artista.
NG: Ayaw gug likoy, Nyor. Kini bang kumingking ba.
ND: Wa ra ba ko  kahibawo, Nyor, da.
NG: Kon eye-cleaner to ang tudlo-panudlo, maayo tingaling hinganlan tag “nose and ears” cleaner ning kumingking.
ND: Very good, Nyor. Very functional description.
NG: Unsay pagtuo nimo, Nyor, ikaw ray kamao.
ND: Wa ko mag ingon ana, Nyor, uy. Kita ra bayay magkopyahanay adtong classmate pa ta. Unya karon ako na say mangutana.
NG: Sigue, Nyor.
ND: Unsa man ni?
NG: Thumb. Kumagko.
ND: Para unsa man ni?
NG: Para text ug pang tamla o thumbmark. Labi na kadtong di kahibawo mosuwat. Gamiton sad nis mga tiguwang pang pakli sa basahon. Ila ning lawayan unya ikabya sa pahina.
ND: Unsa pay laing gamit niya, Nyor?
NG: Naa pa diay, Nyor?
ND: O uy. Ang sign of approval diay nga “thumbs up!” Di ba? Ug ang sign of disapproval diay nga “thumbs down.” Ug ang pagpanikma diay. Gani gihimoan naman kinig idiomatic expression sa pag pangyam-id “thumb their noses at the rule.” Unya ayaw kalimti ang giingon sa mga tiguwang nga himuon sa bata nga mangayo kunog manghud—ang pag supsup o thumbsucking.
NG: Suhito kag kumagko, Nyor, da. Be ako na say mangutana. Unsa man ning tudlua?
ND: Ring finger man na sa Ininglis. Basig paningsing ang tawag ana sa ato. O di ba tudlo sa panaad. Kay kun engagement ring ang gisul-ob diha, nagpasabot nga nanaad ang gasul-ob niani makig minyo sa gahatag niani. Ug kun marriage ring na ang gitaud niini, nanumpa na ang gasul-ob niiini nga ang gahatag ra niani maoy iyang pangaon ug ikadug. O karon ako na sab. Unsa man ni, Nyor?
NG: Ha! Ha! Nyor, mao na ang gi-sensor sa TV. Mao na ang tudlo nga gigamit sa amahan ug anak nga Duterte sa Davao agig pakita sa ilang kalagot. Ang tawag niana sa mga Kano dirty finger.
ND: Be nganong dirty finger man ni?
NG: Ambot lag diin na nila gituslob, Nyor, nga na dirty man. Duna kunoy himuon nga rally ang mga supporter sa mga Duterte sa Davao. Nindot ni atgan, Nyor, da.
ND: Nganong na-interested ka man nianang maong rally?
NG: Basig historical moment kini, Nyor, o di ba hinuon pang Guiness. Kay basig mo dirty finger sa media ang tanang mo-attend sa rally ug mao na unya kini ang pinakadaghang dirty finger nga iisa sa usa ka panagtigom sa pang publiko nga lugar.
ND: Pero kinahanglan nga ila nang ituslob sa hugaw ang ilang tungang tudlo para inig isa niani dirty gyud.