Mas nindot paminawon nga makonbinse sa mga Garcia ug sa One Cebu Party ang ubang sakop sa pamilyang Durano sa kinto distrito nga Durano gyud maoy ika-tandem ni kongresista Pablo John Garcia nga nagtinguha sa pagpadayon sa liderato sa iyang maguwang pagkagobernador sa sunod tuig nga midterm elections.
Dili imposible kining maong scenario nga magbangga ang mga kaliwat sa mga Durano sa bugno sa politika kay nahitabo na kini kaniadto sa inahan ug anak.
Wa koy nakit-ang apelyedo nga mas lig-on nga ikaparang ni Vice Governor Agnes Magpale nga kaliwat sab og mga Durano kun di Durano ra sab.
Kun molampos ang One Cebu party nga Durano gyud ang ikapares ni Pablo John sigurado siyang makakuha og daghang botos ug di magkagidlay.
Mao gyud ni ang nakapait sa politika kay wa gyuy permanenteng kaaway ug way permanenteng amigo.
Maglaum lang ko nga professional ang ilang away sa politika ug di susama sa ubang mga lugar nga mosangpot sa dugoong hitabo.
* * *
Maayo kay giatras na ni Kabataan party-list Rep. Raymond Palatino kadtong iyang kontrobersyal nga House Bill 6330 nga ang katuyuan unta niadto mao nga i-ban na ang mga religious icons ug mga activities sama sa pagpahigayon og mga Santos Nga Misa sa mga buhatan sa gobyerno.
Si Palatino nangayo og despensa sa mga tawo nga nasakitan sa iyang katuyuan nga ipahamtang ang religious freedom sa matag buhatan sa gobyerno.
Akong sublion nga kanunayng nag-obserbar ang mga kadagkuan sa gobyerno ug religious freedom ngadto sa ilang mga kawani kay wa gyud ko makadungog og laing mga tinuhoan nga gipugos sila sa pagpasimba ug pagpatambong sa mga kalihukan sa atong relihiyon isip mga Romano Katoliko.
Akong nahibaw-an nga naboryong si Palatino sa tagawtaw sa mayoriya sa katawhan ilabina gikan sa mga kadagkuan sa Simbahang Katoliko ug mga kadagkuan sa gobyerno.
Mao ni ang resulta sa pagpasagad lang og panday og balaudnon nga di magtuon og tarong ug di mokonsulta sa mga sektor nga posibleng maapektahan.
* * *
Garbo kaayo natong mga Sugbuanon nga mosikat pag-ayo ang atong “Cebu Dancing Inmates” kay ang kinabuhi sa atong mga piniriso diha sa Cebu Provincial Detention and Rehabilitation Center (CPDRC) i-feature karong Hulyo 20 hangtud Hulyo 28 sa St. Clements Theatre atol sa New York Festival.
Usa kini sa mga butang nga atong ampingan ug ipadayon ang maayong rehabilitation program sulod sa prisohan kay pinaagi sa programa ug disiplina napahimuslan nato ang mga piniriso sukwahi sa nangaging administrasyon nga pabadlong ray naantigohan.
Pero subo lang palandungon karong bag-o nga dunay ubang mga piniriso nga bisag unsaon gahi gyud.
Kun di mopuga, mopalusot og mga kontrabando.
Di ko makatuo nga 11 ra ka mga cellular phones ang nakasulod diha sa CPDRC nga nasakmit sa inspection nilang acting warden Romeo Manansala karong bag-o.
Bisan diha sa Bagong Buhay Rehabilitation Center – New Cebu City Jail Kalunasan anaa gihapon kining maong problema.
Pwera buyag sab ning uban maayo kaayong mopalusot.
* * *
Usa ka dakung leksyon sa atong kapulisan ug ubang mga otoridad ang naingnan ni SPO2 Roberto Canencia kinsa giingong nakigrelasyon og “drug queen” sa dakbayan sa Danao ug gipatay niadtong Lunes sa udto.
Bisan iyang mga labaw nagtuo na karon nga ang hinungdan sa iyang kamatayon mao gyud ang iyang problema sa pagkahilambigit sa ginadiling drugas.
Wa kaha maka-utang og daku ang iyang uyab sa ilang mga suppliers unya gigamit ang pangan ning maong pulis?