Dolphy in 10 frames

1. Ang “Gone with the Wind” maoy unang colored nga pelikula nga nakit-an ni Dolphy sa sinehan samtang nanglibud siya sa sulod niini og mani, lisos pakwan ug singkamas nga mausap sa mga nan-aw.

2. Ang akong inahan sa buhi pa kadto mas ganahan kang Chiquito kay ni Dolphy kay para kaniya mas realistic kuno ang mga plot sa sine ni Chiquito. Kay sa mga sine gud ni Chiquito mahigugma man niya ang iyang pares nga babaye human niya kini tabangan. Labi na kun luwason kini ni Chiquito kun dunay buot molugos niani. Daw dili madawat sa akong inahan ang plot sa ubang pelikula ni Dolphy nga bayot kini unya molangyaw unya inig balik niini lalake na unya mahigugma dayon ang babaye nga silingan niini. Sukwahi sa kasagaran kining maong padagan.

3. Niadtong padung na ang Pasko misulod kami ni Cio Datan sa Café Elysa sa Parian para motan-aw sa sulod niini kay buot unta kaming mo shoot og video ning maong lugar. May nakit-an kaming daw Americana nga buxom. Dihang diha kami sa iyang luyo kay gasukod sa mahimong distansya sa camera ngadto sa lamesa milingi kining maong Amerikanhong dagway nga babaye og mi-introduce sa iyang kaugalingon nga siya mao si Pilar Pilapil. Flashback: Si Pilar Pilapil usa sa mga beauties nga nalambigit ni Dolphy. Apil sa maong lista ang Brit nga si Lotis Key (nga may under the shower nude photo nga miguwa niadtong panahon sa EDSA revolution), ang laing Cebuana nga gaplano karong modagan pagkasenador nga si Alma Moreno, ang sexy actress nga si Carmi Martin ug ang  mang-aawit nga kuyog karon ni Dolphy nga si Zsazsa Padilla.

4. Sa akong mga kaedad ang Dolphy nga di namo makalimtan mao ang John sa “John en Marsha.” Si Marsha gidala ni Nida Blanca ug si Rolly Quizon ug Maricel Soriano maoy ilang mga anak. Ang theme ning maong TV program usa ka inusab nga kanta ni Michael Jackson. Sa mga manghud nakog gamay si Kevin Kosme sa “Home along da Riles” ang ilang mahinumduman.

5. Apil sa mga trabaho sa 13 anyos nga Dolphy sa panahon sa World War II mao ang pagka kutsero ug pagka shoe-shine boy.

6. Si Dolphy ang Captain Barbell niadtong 1964.

7. Si Rodolfo Vera Quizon, Sr. (a.k.a. Dolphy) nga natawo pagka July 25, 1928, maguwang og usa ka tuig kang actor Eddie Garcia, ug lima ka tuig kang actress Gloria Romero ug siyam ka tuig kang Joseph Estrada.

8. Daghan siyag anak (sa lima ka babaye) nga misulod ug miguwa sa entertainment industry. Ang medyo inila karong mga panahuna mao si Zia Quizon, ilang anak ni Zsazsa nga usa ka Indie type nga recording artist.

9.  Matud sa usa ka spokesman sa usa ka colostrum product sa New Zealand (gikan sa ilang mga baka), si Dolphy ug si Imelda Marcos maoy leading consumers sa colostrum sa Pilipinas. Ambot kun usa kini ka tinuod. Hinuon, ang colostrum nga mao ang unang mugawas sa dughan sa inahan inig kahimugso sa bata giingon nga makapakusog sa immunity system sa tanang mo-tumar niini bata man o edaran. Si Doplhy nga gidali sa ospital niadtong June 16 kay naglisud pagginhawa apan kagahapong adlawa daw misugod na pag-recover.

10. Mayataps man si Dolphy karong tuiga o dili, matapos uban kaniya ang usa ka prototype sa movie star nga male comedian. Si Rene Requiestas ang katapusang sikat nga komedyanteng lalake sa pelikula apan taudtaud na kining mipanaw. Si Joey ug Vic mi-bajar na ug daw dili pa makadala og audience sa sinehan si Jose ug si Wally. Mga babaye na ug bayot ang mga komedyante karon sa pelikula.