Laing piniriso sa CPDRC ang gipatay?
Nagduda ko og samot sa hinungdan sa kamatayon sa laing usa ka binilanggo diha sa Cebu Provincial Detention and Rehabilitation Center (CPDRC) niadtong Domingo sa gabii kay gitago-taguan kining maong isyu.
Nakadawat ko niining maong impormasyon niadtong Domingo pasado alas-10 sa gabii.
Ang kasaligang tinubdan nanawag kanako ug mibutyag nga dunay piniriso sa CPDRC nga biktima sa takal kon bangis nga pagpamun-og ug pangulata hangtud nga namatay. Unya gipalabas lang nga naghikog.
Mga gwardya sa CPDRC nagduha-duha sa paghatag og kasayuran. Ang uban mikompirmar nga dunay namatay nga piniriso apan dili gumikan sa takal apan igo rang naghikog human gisulod sa bartolina.
Apan akong source mi-insister nga dili gyud hikog kun dili gipatay gyud ang binilanggo nga si Ricky Salidaga, 30 anyos, nga taga Liloan nga may kasong patay ug tulis.
Si Jail Warden Algier Comendador nagkanayon nga dunay findings sa autopsy si Dr. Martin Fuentes sa PNP Crime Laboratory nga naghikog gyud ang piniriso kay may dakung lagom sa iyang liog ug matud pa sa warden nga nakit-an kining nagbitay gamit ang iyang habol.
Bisan si Comendador miingon nga naghikog gyud si Salidaga kay nanulti kini nga maghunos sa iyang kinabuhi kay may problema sa iyang pamilya.
Apan unsa man ka tinuod kining akong nasagap nga istorya nga gibun-og sa “Busyo” nga si Roger Repuela ug sa assistant “Busyo” nga si Victor Diolan ang napatay tungod kay nagbinastos kini sa usa sa mga babayeng dalaw niadtong Domingo?
Gipatay si Salidaga apan limpyo lang pagka-himo? Kinahanglang imbistigahon kini sa taga Commission on Human Rights kay kun kuwang sa disiplina ang ubang piniriso, tarungon sa pagdisiplina ug dili kinahanglang patyon.
* * *
Hangtud nga dili mag-unay ug patay ang mga Durano diha sa kinto distrito unya na ko motuo nga tininuud ning ilang bugno sa pulitika.
Mangayo kog dispensa sa akong unang linya ngadto sa mga Durano kay ang labing alkanse niining away sa pulitika sa isig ka pamilya mao ra ang mga political supporters nga humok kaayong magpagamit.
Wa ba gyud tuyua kini sa mga Durano nga nag-drama og away-away aron wa nay laing pamilya ang mangahas sa duwa sa pulitika sa ilang komunidad?
Manawagan lang ko sa katawhan sa dakbayan sa Danao nga kalma lang ug ayaw kamo pagpagamit sa mga politiko nga sila ray mabulahan.
Kanang recall petition nilang Vice Mayor Ramon “Nito” Durano III batok sa iyang maguwang nga si incumbent Mayor Ramon “Boy” Durano Jr. nag-usik-usik lang sa panahon sa taga Comelec.
Unahon pa sa taga-Comelec pag-resolve ang isyu sa Cospostela nga hangtud karon, wa pay nakalingkod nga Mayor, Vice Mayor ug mga sakop sa konseho mas kampante pang paminawon.
* * *
Hilas ra kaayong paminawon si Davao City Mayor Sara Duterte sa iyang pagbun-og sa court sheriff nga si Andres Abe niadtong Biyernes.
Maayong pakungon ilang ulo sa iyang amahan nga kanhi mayor nga mirebenta sab sa mga sakop sa media ilabina sa mga kolumnista nga nag-kondenar ug nagsaway ni Mayor Sara sa iyang linakin-hong binuhatan.
Nagtuo na gyud ning mga tawhana seguro kun silay tag-iya sa Davao. Nagsalig si Duterte sa iyang gitawag og DDS kon Davao Death Squad?
Unsa may sala sa sheriff nga igo rang nagtuman sa kamanduan sa korte sa pagpangguba sa mga panimay?
Abogada man kaha ni si Mayor Sara? Ignorante siya sa balaod? Maayo tingali ni siyang ipa-disbar.
Kung tinuod nga nagprotihir si Mayor Duterte nga way kagubot nga motumaw sa demolition, nganong wa man niya tabangi ang mga residente nga apektado pagpaabot sa maong isyu ngadto sa Korte Suprema?
Unsa may tumong niya niadto? Hinambugera ug papapel? Pagka-hilas!
Nakasabot ko sa biktima nga si Abe nga di na mokiha ug mao pay nangayog pasaylo sa mayor kay unsaon pwerte mang pagka-gamhanan sa mga Duterte sa Davao.
Pun-an pa sa taga Korte Suprema nga nagbinayot sa ilang suporta nga gipakita ngadtong Abe.
