Pamutos na lang, warden Manansala
Sa akong interview kagahapon sa buntag ni Cebu Provincial Detention and Rehabilitation Center (CPDRC) jail warden Romeo Manansala, siya mipadayag nga lisud na kaayong madakpan og balik ang nakaeskapo nga piniriso nga si Johnny Ylanan.
Matud ni Manansala nga nagpabukid na sa lungsod sa Tuburan si Ylanan ug armado na uban sa pundok nga mga armado sab.
Nagkanayon ang warden nga bisan ang hepe sa kapulisan sa Tuburan miangkon nga lisud na gyung dakpon si Ylanan ug may tinguha kini nga mosukol nilang mga otoridad.
Kun mao ning kalakiha nagpasabot lang gyud kun unsa na kainutil ang atong mga tinugyanan sa balaud ug ang taga-CPDRC kay mibahag na ang ikog paggukod ni Ylanan nga may kasong paghupot og shabu ug mga drug paraphernalia ug paghupot og illegal nga armas.
Mamutos na lang daan sila si warden Manansala ug iyang tulo ka mga prison jailers nga sila si Raul Sabellano, Joy Te Noval ug Glenn Veloso kay di gyud sila pasayloon sa “one strike policy” ni Gov. Gwen Garcia.
Ambot lang kun resulta na ba kini sa sobrang kompyansa ug pabaya sa trabaho?
Ang paet lang kun gituyo pagpasibat si Ylanan human kadto mihatag og dakung kantidad sa tulo ka mga gwardya kay segun pa ra ba sa akong mga tinubdan nga kwartahan kaayo kadto si Ylanan ug impluwensyado.
* * *
Pagkabakakon gyud ni Richard Cabornay Baculi kinsa maoy nagmaneho sa motorsiklo nga “Yamaha Meo” nga maoy ilang gisakyan uban sa iyang ig-agaw nga napatay ni PO2 Lea Juarez nga si Rael Alex Tajanlangit Cabornay alias “Nano” gikan nga mitulis ni Reychel Alvizo Juntar.
Si Richard Cabornay Baculi nga akong na-interview dayon human siya nadakpi duol sa Kapitolyo human napusilan iyang ig-agaw nga si Rael pwerte gyung pamakak.
Miingon siya nga wa gyud siya makaila sa napusilan ug iyang gipasabot nga samtang miagi siya sa dalan Cardinal Rosales niadtong tungora kalit lang mition kaniya ang napatay og misakay sa iyang motor gikan nga nanulis.
Matud ni Richard nga tungod sa iyang kakuyaw wa siyay nahimo gawas sa pagpasakay.
Ultimo ang amahan nga konsentidor ni Richard pwerte sang nakadepensa sa anak nga kuno buotan.
Buotan gyud? Tingali kun matug!
Nakaingon ko nga usahay tinuod gyud diay ning panultihon nga way kawatan nga moangkon.
Grabehang sulagmaa noh nga natayming gyud og agi si Richard didto sa crime scene ug gipasakay iyang ig-agaw.
Niadtong Lunes sa hapon hilom ug paspas kaayong nakapyansa ang pamilya ni Richard sa kasong giatubang.
Kun tinuod nga inosente si Richard bantay bitaw kun mosibat ni?
Ang tawong inosente di mauwaw nga moatubang sa kaso.
Way plano ang kapulisan nga mosubay sa mga laptop ug ubang gadgets nga second hand nga gipang-display diha sa barangay Kamagayan kun unsay connection sa mga binuhatan ni Richard ug sa iyang ig-agaw nga napatay?
* * *
Unsay nahitabo ni Bruce Bansuan nga maoy ikaunom nga testigo sa prosecution panel sa kasong pagdagit ug pagpatay sa bata nga si Ella Joy Pique?
Gihulga? Nahadlok sa pamakak? O giatake sa hubak?
Niadtong Lunes kalit lang nga wa motunga si Bansuan alang sa padayong direct examinations ug cross examinations.
Kun ang prosecution maoy paestoryahon naadmit sa Barili District Hospital si Bansuan kay gihubak.
Apan kun mga abogado ni Bella Ruby Santos maoy pakomentaryohon moingon nga nahadlok lang gyud si Bansuan sa ilang giandam nga cross examinations.
Pero unsa man gyud ka tinuod ang akong nakuha nga impormasyon nga gihulga ang testigo?
Nganong di na man lang siya mosud sa Department of Justice witness protection program?
Unsa may arrangement sa iyang security sa taga Criminal Investigation and Detection Group in Central Visayas?
* * *
Way epekto ang gipatuman nga road sharing kagahapong adlawa gikan sa buntag hangtud pagkaudto sa dalan Gorordo ning dakbayan nga gipasiugdahan sa barangay Lahug.
Ako mismo nga miobserbar wa gyuy gamit ang road sharing kay gamay ra kaayo ang nagbisekleta ug maihap lang sa tudlo kagahapon.
Gawas pa sab disorganized kaayo kay bisag gihatagan na og bicycle lane ang mga nag-bike apan miagaw gihapon sa lane nga alang sa mga motorista.
Abi ba nako nga daghan ang mag-bike nga angayng sirad-an ang usa ka lane.
Nagbagulbol ang ubang mga motorista kay matud pa nga nag-usik-usik lang sa panahon sila si Lahug barangay captain Dodong Taborada ug City Traffic Operations Management Chairman Jack Jakosalem nga mitugot niining pundok sa mga bikers nga magpatagad.
* * *
Mao ni ang nakadaut sa Office of the Senior Citizens ning dakbayan kay di daan mopahibawo sa ilang mga sakop kun makadawat ba og hinabang sa ilang pagpang-apod-apod.
Kun nagbaha ang gipanghatagan niadtong Lunes daghan sab ang nagmahay-mahay kay wa gyud sila magdahum nga di kadawat sa tag-P3,000.
Kun mopahibawo man, pero apiki na kaayo ang mga gitugyanan.
