‘Kinsa man gud ang wa mamulitika kanila?’
Sa akong basa, di gyud mahitabo ang apelasyon ni Cebu City Mayor Michael Rama ngadto sa iyang mga kanhi kauban pinangulohan ni Kongresista Tomas Osmeña sa Bando Osmeña Pundok Kauswagan (BO-PK) nga undangon ang ilang bugno sa pulitika ug unya na inig ka duol sa 2013 nga eleksyon.
Bisan unsaon ni Mayor Rama pagpanindot sa iyang administrasyon, kanunay gyud kining sungagon nilang Osmeña tungod sa kasilag.
Natural na lang sab siguro nga motubag si Rama nilang Tomas kay alangan magpadaug na lang.
Unsa pa lay ikasulti sa katawhan ni Rama nga magpa-amang-amang sa mga isyu nga ibato.
* * *
Pagkanindot pamati-on nga mausab na sa hingpit si Dodong Joavan Fernandez.
Gawas nga nag-kuyog-kuyog na sa mga pulis sa dakbayan sa Talisay sa pagpahigayon og checkpoints, nakadakop na si Joavan og mga mangubkobay og bas ug graba sa Mananga River.
Sa akong pakighinabi ni Joavan siya miklaro nga kining iyang pag-usab wa kini magpasabot nga molansar gyud siya karong 2013.
Matud niya nga mobalik siya sa pag-eskwela aron siya makatiwas sa iyang gi-ambisyon.
Usa ko sa gitawgan ni Joavan niadtong iyang pagsalbar kang Ricky Marlon Bartolata nga taga Dumlog Talisay nga buot untang maghikog pinaagi sa paglayat sa Mananga River.
Iyang gipasabot nga di gyud intawon drama ang nahitabo niyang pag-rescue kang Bartolata.
Ang ako lang ngadto ni Dodong Joavan nga di lang niya tagdon kining mga pagsaway ngadto kaniya sa iyang mga panlimbasug nga magbag-o sa iyang kinabuhi.
Mas maayo pa nga iyang isipon kini nga hagit sa tinuod niyang kawsa sa pagminatarong na.
* * *
Unsa ka tinuod kining akong mga nadawat nga mga impormasyon nga dunay daghang mga testigo nga ubos sa Department of Justice witness protection program ang nangapasmo?
Dunay usa ka practicing lawyer ang mitug-an kanako nga pwerteng paeta sa kahimtang sa iyang testigo kay way klarong kaon ug way klarong pinuy-anan.
Si State Prosecutor Llena Ypong nga maoy gitugyanan ning maong programa dinhi sa Central Visayas mitug-an nga gimanduan siya sa ilang director sa DOJ Manila nga magpakahilom kay kuno confidential ang maong programa.
Prangka lang nga pagka-estorya kaniadto pa gyud masentro sa kontrobersiya ang witness protection program.
Gituyo ni nga confidential aron di sab mapagya ang pangurakot sa pondo niini?
Akong nahibaw-an nga mas maayo pa man gani kadtong panahon nilang Regional State Prosecutor Hernando Masangkay kay klaro pa ang programa. Pero karon wa na gyuy ayo.
Si Thelma Chiong sa Crusade Against Violence nagplano nga mopahigayon sila og rally aron ipakita ang ilang kahiubos ning maong programa ilabina nga gitangtang sa DOJ witness protection program ang lima ka mga sakop sa pamilyang Bacolod ug ang lig-on nga testigo nga si Gloria Navaja.
Matud ni Chiong nga iyang konsultahon ang iyang mga sakop nga mga biktima sa dagkung krimen alang ning maong katuyuan.
Alang ni Chiong, risgo gyud kaayo ang mga Bacolod bisan mahuman na unya ang kasong parricide ni PBMA supreme master Ruben Ecleo Jr.
Si Niño Bacolod miingon atol sa among programang “Dialogue on the Air” sa dySS Super Radyo niadtong Sabado nga Ginoo na lang gyud ang mag-igo kanila.
Si manlalaban Troy Warren Cayanan nga nagrepresentar sa Police Regional Office nagkanayon nga morekomendar siya nga hatagan og police escort ang mga Bacolod ilabina sa panahon kun dunay mga bista.
Samtang si manlalaban Llewelyn Menchavez Director sa IBP Cebu City Chapter miingon nga posibleng ipaabot nila ngadto kang President Noynoy Aquino ang isyu sa mga Bacolod alang sa pag-reinstate kanila sa programa.
* * *
Bintaha gyud nga palig-onon ang prosecution team niining kasong kidnapping with homicide batok nilang Bella Ruby Santos ug sa uyab nga Briton nga si Ian Charles Griffiths.
Si Cebu Provincial Prosecutor Pepita Jane Petralba nagplano nga magtukod og prosecution panel aron pagsiguro nga kahatagan gyud og hustsiya ang gidagit ug gipatay nga 6 anyos nga batang babaye nga si Ellah Joy Pique.
Pagkasadya kaha sa korte nga daghan kaayong mosalida. Manghinaut lang ko nga dili kini maparehas sa Ecleo case nga nagkadugay nagkahuyang ang pwersa kay gamay na lang kaayo ang mga IBP lawyers.
