Wa nay pulis, piskal ug korte sa Carcar?

Sa sinugdanan pa, nakabantay na ko sa depekto sa gi-file nga information sa kasong  murder batok sa ubang mga suspetsado pagpatay  sa anak sa mayor sa Carcar.

Tinunto gyud kaayo ang pagtaral sa ubang mga suspetsado kay  gilambigit sa information bisag wa hisguti sa testimoniya sa mga saksi.

Resulta ba kadto sa impluwensya ni Carcar City Mayor Nicepuro  Apura? O ba kaha resulta sa pagpasagad sa trabaho ni Carcar OIC City Prosecutor Richard Abangan  Sr.?

Ang klaro nga gipanglambigit sa mga saksi sa pagpusil patay kang Carl  Vinson mao ra gyud sila si Jaybhoy Lauron kinsa nadakpan na og  mi-angkon sa krimen ug ingon man  si Jethro Lapiña kinsa giingong maoy mitunol sa  armas kang Lauron.

Unsay ebidensya nga gi-apil man sila si Jewish Lapiña, Glenn Cinco alyas Impiong, James Ali Castañares, Jay Castañares, Zig Abarquez, Demosthenes Abarquez alyas Dugo, Rizal  Cayme  alyas Izal ug usa  ka  “Jetto”?

Akongnahibaw-an karong bag-o nga mitiyabaw na ang mga insosente sa krimen lakip na ang  ilang mga ginikanan ilabina nga matud pa nangisog na karon pag-ayo si  Mayor Apura.

Gani dunay nagpahibawo  kanako nga si Mayor Apura  mag-apil-apil nag conduct og checkpoints tungod kay wa gyud  makadawat  nga  ang iya  rang  pag-umangkon nga si Jaybhoy maoy responsable sa krimen.

Hinuon alang nako katungdanan man sab sa  mayor ang pagmintinar  sa kahapsay ug  kalinaw. Ang importante iyang gisubay ang  lagda sa balaud ug way abuso sa katungdanan.

Unsa ka tinuod nga  ang sunod-sunod nga patay sa Carcar  sumpay sa  kamatayon sa anak sa mayor?

Way nay pulis, piskal ug korte ang Carcar? Kun di masulbad ang mga krimen, mabalaka ko nga ang Carcar maoy pinakalabad nga component city sa probinsya.

* * *

Singkwneta y sais na lang ka adlaw gikan karong adlawa  sa  dili pa  ipatuman karong Agusto 1 sa taga Land Transportation Office ug ubang mga tinugyanan sa balaud  ang estriktong dinakpanay  sa mga mag-motor nga mag-helmet  ug way tatak nga “PS” o “ICC.”

Pero ang nakaporke langay kaayo  ug wa pa gyud  gihapon mipasalig si Department of Trade and Industry in the Visayas Director Asteria Caberte nga magsugod na pag-inspection ning semanaha sa mga karaang helmet ang  ilang mga standard personnel.

Matud  niya niadtong Lunes sa gabii atol sa akong  programa sa radio dySS nga wa pa gyud mangabot ang mga sticker gikan sa ilang  ulohang  buhatan.

Sigurado ko nga kining kalangay sa taga-DTI makapaapiki kini sa  panahon sa mga motorista hangtud nga magkamuritsing lang unya ang agi sa taga-DTI.

Si Director  Caberte miingon nga dili gyud intawon pangwarta ang ilang pagpangayo unya sa P100 nga  processing fee ug P1.25 matag  helmet kay igo ra silang  nagsunod sa kamanduan sa  DTI Manila.

Pagkakaron si Caberte miklaro nga posibleng matag tawo nga moadto sa ilang provincial office diha duol sa Plaza Independencia tugtan lang nga makadala ug 3 ka helmet.

Alang nako, mas maayong mohatag sila og konsiderasyon niadtong uban nga magdala  og daghang  helmet nga  pinadala sa  mga silingan nga nagtampo-tampo og pamlite nga gikan pa intawon sa mga lagyong lugar nga magpa-inspection.

* * *

Haum gyud kaayo si manlalaban Democrito “Mocring” Barcenas nga miendorso kang Cebu Court of Appeals Associate Justice Gabriel  Ingles nga maoy mopuli pagka-Chief Justice sa Supreme Court human namutos na si Renato Corona.

Si Justice Ingles maoy tubag sa panawagan sa uban nga nagkinahanglan kita og punong mahistrado nga dili suod ni Presidente Noynoy Aquino  unya  outsider sa Korte Suprema.

Gawas nga makamao, gawas nga ligdong ug may integridad, nagkinahanglan kita og batan-on unya himsog ang panglawas aron dili  haguka ang liderato sa judiciary nga kanunayng  gikwestyon ug  gisaway.

Maglaum ko nga mo-apply si Justice Ingles aron dili magkawang ang mga bililhong endorsement gikan sa mga tawo nga girespetohan sa katilingban.