Asa na ang SALN ug waiver sa bank secrecy law ni P-Noy?

Sama sa akong gipadayag sa unahan, nga di sa ingon nga nagnilimpiyo ang atong mga kongresista pagkonbikto kang Renato Corona apan ato silang hatagan og panahon nga mag-usab na gikan sa pagkasalawayon.

Di ko motuo nga way paghunong ang pagkadautan sa tawo sama sa istorya kaniadto ni Demas nga nagbasol sa pagpakasala unya gidala siya ni   Hesukristo sa langit gikan sila nga gipanglansang sa krus.

Wa gyuy dautan nga maghari sa kalibutan!

Nakapakpak ko nga ila nang gitangtang pagka-kongresista karong bag-o sa pagkakogresista si Philippine Benevolent Missionaries Association supreme master Ruben Ecleo Jr. human gikonbikto na sa Korte Suprema “with finality” sa duha ka mga violations sa “anti-graft and corrupt practices act.”

Maglaum ko nga gawas nga ilang giplastada karon sa publiko ang ilang gideklarar nga Statement of Assets and Liabilities and Networth (SALN) andam sab silang mosakripisyo pag-waive sa SOP nga 10 percent nga commission sa mga proyekto.

Manghinaut sab ko nga ang tanang mga senador ug kongresista ilabina kang Presidente  Noynoy  Aquino mopirma usab og waiver sa bank secrecy law aron maundang na kining mga pagtahap ug mopakita sa katawhan nga sila maoy mo-set og example.

Unsa may gikahadlukan kun wa silay gipangkurakot gikan sa kaban sa gobyerno?

* * *

Sama sa naandan, kuwang  kaayo kita sa mga magtutudo, classrooms, libro, lingkuranan ug ubang mga gamit alang sa pagbukas karong adlawa sa school year 2012-2013.

Pero bisan pa man niini naningkamot ang atong  mga kadagkuan sa Department of Education (DepEd) nga masulbad ra kining mga pagkuwang.

Di ikalimud nga daghan ang namalhin karon gikan sa mga private schools ngadto sa atong mga  pampublikong tunghaan.

Maglaum ko nga bisan og late sa pagpa-enroll  andam gihapong modawat ang mga magtutudlo ug  motingse gihapon kay mas gwapa silang tan-awon kay sa magmugtok.

Maningil ko sa ipatuman ni DepEd in Central Visayas Director Carmelita Dulangon karong adlawa nga “service with a smile” gyud ang atong mga magtutudlo aron di mahadlok ang mga tinun-an.

* * *

Wa pay klaro ang taga-Department of Trade and Industry kon DTI in Central Visayas kun kanus-a  sila magsugod sa pagpanawat alang sa  pagpang-inspection sa mga helmet niadtong mag-motor nga gituhoang lig-on ug makapasar pa sa standards nga way tatak nga “PS” o “ICC.”

Apan sigun kang Director Asteria Caberte nga akong natawgan nga posibleng sunod semana sila magsugod sa pagpanawat sa mga helmet alang sa evaluation.

Iyang gipasabot nga dunay bayranan nga P100 alang sa processing fee ug P1.25 alang sa sticker.

Matud niya nga miabot na og 40 tanan  ka mga brand sa helmet ang ilang gipapasar ug possible nga mosaka pa ang gidaghanon kay duna  pay mi-apply sa ilang ulohang buhatan.

Ang akoa ba, mas maayong  paspasan sa taga-DTI ang ilang trabaho kay dili makiangayon sa mga mag-motor kay karon nang Hulyo 30 ang full implementation.

Dili maayong paminawon nga manakop na ang taga-Land Transportation Office, kapulisan, mga traffic enforcers ug mga deputized agents  sanglit nagyaya ang taga-DTI.

* * *

Manghinaut ko nga dili mahitabo ang akong gituhoan nga “worst case scenario” nga ipatuman ang “total closure” diha sa Marcelo Fernan Bridge ug pag-ban sa mga “40 footer van” ug ubang mga dagkung sakyanan samtang ayuhon ang 88 ka mga “expansion joints” nga sugdan karong adlawa.

Niadtong Sabado sa hapon atol sa among programang “Dialogue on the Air” sa dySS Super Radyo didto sa Lapa-Lapu City Hall mitug-an si Mactan Cebu International Airport Authority General Manager Engr. Nigel Paul Villarete kinsa opisyal nga representante ni Gov. Gwen Garcia sa Mactan Cebu Bridge Management Board kon MCBMB nga mipasalig ang taga Department of Public Works and Highways nga usa ra gyud ka lane ang sirad-an samtang himuon ang repair sud sa dul-an tulo ka buwan.

Hinuon matud niya nga possibleng  mahitabo ang “worst case scenario” apan layo ra sa tinuod.

Hinuon nangandam sila niini kun mahitabo gyud sama sa pagpatuman nga ipasakay na lang sa barge ang mga bug-at nga mga karga  ug awhagon ang riding public nga mosakay na lang og ferry boat gikan sa Pier 3 Cebu City paingon diha sa luyong bahin sa simbahan sa Birhen sa Regla.

Alang ni Villarete nga giilang eksperto sa natad sa mga infrastructure projects nga dili unta mangaguba dayon ang atong mga tulay kun i-phase out ang mga PUJ, taxi ug ubang mga behikulo ug ipatuman na lang ang “mass transit system.”

Si Cordova Mayor Adelino Sitoy nabalaka  nga posibleng di matuman ang 88 ka adlaw nga  pag-repair ug hayan molungtad pa og dugay  ilabina nga panahon na sa ting-uwan nga maoy makalangay sa pagtrabaho.

Sila si Traffic Enforcement Agency of Mandaue head Major Edwin Ermac ug Lapu-Lapu City traffic czar Frank Brazil miingon nga nagsige sila og tigom alang sa proper coordination ug ilang paningkamutan nga di gyud maghuot ang dagan sa mga sakyanan.

Si Supt. Virgil Ranes Lapu-Lapu City Police deputy director for operations mitug-an ngadunay  insaktong gidaghanon sa mga pulis ang ilang ipakatap.

Alang usab ni City Administrator Teodulo Ybañez  nga ilang gipaniguro nga dili kaayo  maapektahan ang mga tinun-an ug ubang sumasakay  karong adlawa.

Si Villarete nagkanayon nga magpabiling “two-way traffic” ang karaan nga tulay samtang sa upat ka lane sa Marcelo Fernan duha gyud ka lane ang pabuksan paingon sa Lapu-Lapu aron ang  mga pasahero sa eroplano nga mopaingon sa airport dili madelatar.

Pero akong naobserbahan sa atong kaplisan ug mga traffic managers magkagidlay gyud ang dagan sa trapiko karong adlawa.