Giingnang resign na lang! Konbikto lagi si Corona
Congratulations sa mayoriya sa mga senator-judges nga nibotar gyud pagkonbikto kang Supreme Court Chief Justice Renato Corona sa makasaysayanon kaayo nga promulgation sa impeachment trial kagahapong adlawa sa Article II nga culpable violation of the Constitution and betrayal of public trust.
Baynte ang miuyon sa pagkonbikto samtang tulo ra ang miboto nga “not guilty.”
Nakonbinse ang mga senador nga kalapasan gyud ang wa niya pagdeklarar sa P80 milyones ug sa $2.4 million sa iyang Statement of Assets, Liabilities and Networth (SALN) ubos sa Republic Act 6713 (Code of Conduct and Ethical Standards for Public Officials and Employees).
Unsa may kalainan ni Corona sa usa ka court interpreter sa Davao kaniadto nga gipapha sa trabaho sa Korte Suprema human napakyas pagdeklarar sa iyang SALN sa gamay niyang tindahan?
Tinuod nga usa ka political process ang impeachment trial apan lahi ang sitwasyon kagahapon kay nipatigbabaw gyud ang kamatuoran, balaod, konsensya ug krusada batok sa corruption.
Wa magsilbe ang hulga sa pundok sa Iglesia Ni Cristo nga pabor sa pag-abswelto ni Corona nga maka-muster og solid vote sa umaabot eleksyon alang sa mga senador nga subling magpapili.
Insakto kaayo ang pamahayag ni lead prosecutor Rep. Neil Tupas Jr nga kining conviction ni Corona dili sila angayng mag-celebrate.
Kay sama sa akong giingon dili sila angayng magnilimpyo sa kaugalingon kay sigurado ko nga daghan pang mga kurakot nga nagpabilin sa katungdanan.
Sila ra si senators Joker Arroyo, Miriam Defensor Santiago og Ferdinand “Bongbong” Marcos Jr. ang misupak sa pagkonbikto kang Corona.
Ang mga senador nga miuyon sa pagkonbikto mao sila si Senate President Juan Ponce Enrile, Edgardo Angara, Allan Peter Cayetano, Pia Cayetano, Franklin Drilon, Chiz Escudero, Jinggoy Estrada, Teofisto Guingona Jr, Gregorio Honasan, Panfilo “Ping” Lacson, Lito Lapid, Loren Legarda, Sergio Osmeña III, Francis “Kiko” Pangilinan, Koko Pimentel, Ralph Recto, Ramon “Bong” Revilla, Vicente Sotto III, Antonio Trillanes ug Manny Villar.
Apan si kanhi justice secretary Serafin Cuevas, lead defense counsel, miingon nga posibleng ilang babagan ang conviction pinaagi sa pag-file og petition for certiorari tungod kay dunay mga abuse of discretion ang gihimo sa Senate impeachment court.
Nagpasabot siya nga ubos sa rules on criminal procedure dili pa final ang desisyon kay duna pay 15 diyas ug nagpasabot nga dili automatic ang pagpalagpot ni Corona.
Pero kun akoy Corona di na lang ko magpakita sa Supreme Court. Baga na gyud kaayo siyag nawong kun motunob pa sa SC.
Maayo man gani nga ipa-disbar pa si Corona basi sa punto ni Sen. Kiko Pangilinan.
* * *
Di sa ingon nga milaban ko sa mga agents sa Task Force Alpha ug sa taga-Land Transportation Office (LTO) niining isyu sa anak ni Cebu City Treasurer Ofelia Oliva nga si Karen Olvido apan akong nakita nga sayop gyud si Olvido.
Ang wa niya pag-surrender sa iyang driver’s license nagpaila lang kun unsa siya kaarogante ug nagsalig sa iyang inahan kinsa usa sa mga dakung opisyal sa City Hall.
Ngan nga may deperensya ang headlight sa iyang sakyanan ug pun-an pa nga wa ma-renew ang registration sa sakyanan kinahanglang magpaubos unta siya sa iyang garbo.
Pero kadtong maong hitabo maghatag kadto og leksyon ngadto ni bisan kinsa nga mga tigpatuman sa balaod nga kinahanglang magbaton gyud kanunay og insaktong pamatasan ug courtesy sa ilang pangsitahon.
Unya mosugyot lang ko ngadto sa taga-Task Force Alpha, Land Transportation Office ug kapulisan nga kinahanglang adto gyud sa hayag nga lugar pangdalhon ang ilang pangdakpon.
Kay magduda ta kun adto sa ngit-ngit pangdalhon.
* * *
Daghan pa ang wa kaayo makasabot sa bag-ong gipatuman nga curriculum sa Department of Education nga K1 to 12 alang sa mga tinun-an nga dugangan ug laing duha ka tuig ang ilang pagtungha.
Si OIC Director Carmelita Dulangon sa Department of Education in Central Visayas miklaro nga ang mag-2nd year, 3rd year ug 4th year high school karong tuiga dili na maigo sa K1 to 12.
Ang maigo kadto rang anaa sa pre-elementary level, tanang grade level sa elementary ug ang 1st year high school nga maoy pagatawgon na karon nga grade 7.
Alang niadtong wa pa kaayo makasabot sa bag-ong curriculum magsugod ang bata sa Kinder I.
Human sa Kinder, sugod siya sa Grade 1 hangtud sa Grade 6 sa elementary.
Pagkahuman niya og kuha ug diploma sa elementary, mosulod na siya sa Grade 7 nga maoy atong naandan nga 1st year hangtud sa Grade 10 nga maoy naandan nato nga 4th year ug niining bahina makakuha siya og diploma nga gitawag og junior high school.
Ang Grade 11 ug Grade 12 maoy dugang leksiyon sa estudyante alang sa mga elective subjects nga mahug nga kat-onon sa bata ang mga panginabuhi nga maoy iyang kampante ug inig ka human sa duha ka tuig, makakuha siya ug diploma nga senior high school.
Apan akong gipaabot Director Dulangon akong punto nga kun pwede maka-diretso na sa kolehiyo kadtong mga tinun-an nga qualified na gikan nga nakakuha na ug junior diploma ilabina sa mga bata nga ang target nga profession mao ang pang-white collar job.
Kay in fairness sa ubang mga bata nga gikan sa mga private learning institutions nag-agi na og upat ka tuig sa wa pa mag-grade I.
Mao nga manghinaut ko nga bisag way makuhang senior high school diploma pwede nang dawaton sa kolehiyo ilabina nga maayo ang iyang academic record.
