Gun for hire ang mipatay sa anak sa mayor?

Posible nga kadtong pagtimbaya ug pag-abi-abi ni Carl Vinson Apura sa mipusil-patay kaniya resulta kadto sa iyang pagkamanggihatagon.

Sa probinsya man gud nabatasan nga bisag dili nimo kaila, motimbaya  ka gyud sa tawo nga may tuyo ug mopaduol kanimo.

Sigun pa bitaw sa akong mga naistorya nga mga batan-on niadtong Domingo sa gabii, ilang gipadayag nga manghatag gyud to si Vinson og  pagkaon sa mga bata nga tan-aw  niya nga gipanggutom.

Sigun sab sa amahan nga si Mayor Nicepuro Apura nga daghan nang higayon silang magtiayon ang pangayoan ni Vinson og tagsa ka libo aron lang ipakaon sa mga bata ug mga batan-on.

Duna na koy pangan sa mga suspect sa pamilyang Apura nga  mipatay ni Vinson apan gi-validate  pa kini karon sa kapulisan.

Si Mayor Apura andam niyang  hangpon ang resulta sa imbestigasyon sa Task Force bisag  motumaw nga dunay kalambigitan sa  pulitika nga una niyang gisalikway nga usa sa mga motibo.

Ang mayor miingon nga posibleng  dunay kalambigitan ang drugas.

Apan ang labing gitutokan  karon sa pamilya mao gyud ang suya-suya o sina-sina ug frat war.

Nabalaka lang ko nga mograbe  ang patay sa Carcar tungod niining  kamatayon ni Vinson ilabina kun di kini masulbad sa kapulisan.

Unsa man gyud ka safe ang taga-Carcar karon nga ultimong  anak sa mayor wa man pasayloa?

* * *

Dunay taxi operator midangop sa among sibyaanan sa dySS Super Radyo  bahin sa giingong tinunto sa usa  ka opisyal sa Land Transportation Office in Central Visayas diha sa N. Bacalso Avenue nga in charge sa “Alarm Section.”

Ang mipersonal pagreklamo ug mibilin pa gyud og suwat nga nag-detalye sa tanan mao si Roberto Paradiang.

Iyang gireklamo mao si Sandy Samson Tibe nga alang sa reklamante  angayng palagputon dayon sa serbisyo kay matud pa usa ka “abusive and corrupt job order employee.”

Apan si LTO Asst. Director Arnel Tancinco mipahibawo kanako kagahapon nga si Tibe ilang investigator diha sa LTO.

Sigun sa taxi operator nga  niadtong Mayo 4 niadto siya sa LTO-Mandaue Office aron ipa-renew ang  iyang taxi unit nga (Christian JJ Taxi) with plate number GXS-425.

Wa ma-process ang renewal kay giingong subject sa “alarm” ang iyang unit tungod sa reklamo sa pasahero niadtong July 2011 nga matud pa dugay nang na-settled.

Gimandoan siya sa LTO Mandaue  nga ipaadto ang LTO-7 main office diha sa N. Bacalso aron ipakanselar ang nabutang sa record nga “alarm”   aron ma-renew ang registration.

Dihang iyang giadto ang LTO-7,  andam si Tibe nga mopakanselar  apan way nahimo kay absent ang in charge sa computer.

Mao nga gimandoan siya nga pabalikon pagka Mayo 7. Dihang  didto na siya gipabayad siya og P1,900. Wa siya mobayad kay way  dalang kwarta ug gipasaligan nga mobalik pagkaugma.

Gibalikan niya pagka Mayo 8 sa mga alas-10 sa buntag ug giingnan siya ni Tibe nga pabayron siya sa total nga bayranan nga P2,300.

Iyang gibayran ang maong  kantidad apan natinga siya kay  inay isyuhan siya og official  receipt giisyuhan na man hinuon siya ug Temporary Operator’s Permit (TOP).

Mao nga iyang gipasabot nga dili siya maoy driver kun dili mao gyuy operator. Giingan siya ni Tibe  nga maoy policy sa LTO.

Gimandoan siya nga pabalikon inig ka ugma (Mayo 9) aron i-renew ang sakyanan. Pagbalik niya gi-ingnan na sab siya nga pabayron og  laing P1,800 ug iyang gibayran. Basta ang tanang bayranan miabot  ug P4,100.

Dihang nangayo na siya og resibo sa iyang mga nabayran way nahatag og daghan na kaayog mga rason si Tibe.

Mao nga nakahukom siya nga  moadto kang Director Raul Aquilos og didto sa ilang confrontation nanghimakak na  si Tibe nga  midawat sa P4,100.

Apan gilabhan og kasaba ni Director Aquilos si Tibe kay nganong mikupot og kwarta nga dili  niya trabaho.

Ang nakaporke nahatagan ang reklamante og resibo dihang giadto ang cashier ni LTO administrative  officer Aden Belza unya inay P4,100 ang ma-reflect sa resibo  mikabat na lang sa P1,277.63.

Akong gitawgan si Director Aquilos kagahapon ug  mipahibawo nga miisyu na siya og relief order ni Tibe ug atua na karon  gidestino  diha sa Driver’s License Renewal Center (DLRC) sa SM Department  Store.

Mipasalig usab si Director Aquilos nga andam mohimo og pormal nga imbestigasyon ang ilang opisina batok  sa maong imbestigador nga si Tibe.

Ang reklamante nga si Paradiang moduso usab og affidavit  sa Ombudsman aron gyud iyang tinud-on si Tibe kay misamot iyang kahiubos dihang nanghulga pa kini nga ipa-impound ang iyang mga taxi  units kay daghan kunog mga connections sa kapulisan.