Pangwarta sa gobyerno ang new helmet law?

With all due respect sa tanang mga ahensya sa gobyerno nga maoy moimplementar sa Republic Act No. 10054 kon “An Act Mandating All Motorcycle Riders to Wear Standard Protective Motorcycle Helmets While Driving and Providing Penalties Therefor,” madudahan gyud nga himuon lang gatasan ang mga molapas niini.

Kay kun estriktohon gyud pagtuman ang balaod dakop gyud bisan pa og lig-on ug kadtong mga helmet nga nagkantidad og tag P20,000 kay way tatak nga “PS” o “ICC.”

Sigurado ko nga kining klaseha sa mga helmet mas lig-on pa sa nakapasar sa Philippine Standard sa Department of Trade and Industry.

Sa R.A. No. 10054, gikinahanglan gyud ang helmet nga may marka nga “PS” kon Philippine Standard ug “ICC” kon Import Commodity Clearance ubos sa Bureau of Product Standards sa DTI sigun sa pagpasabot ni Asst. Director Arnel Tancinco sa Land Transportation Office in Central Visayas atol sa programang “Dialogue On The Air” sa dySS Super Radyo niadtong Sabado.

Ang logic sa balaod mao nga ka-protehean gyud ang ulo sa magmotor nga di mabuak. So, buot ipasabot uwede kaayong makapasar kining mga klaseha sa helmet bisag daan na.

Sa migawas nga istorya nga pwedeng isyuhan og sticker nga may tatak nga “PS” ug “ICC” ang mga daan nga helmet nga lig-on giklaro ni Director Asteria Caberte DTI nga wa pay klaro nga manghatag og sticker ang DTI ug hangtud karon nagpaabot pa sila og instruction sa ilang ulohang buhatan.

Miingon usab si Caberte nga way mga personnel dinhi sa DTI Cebu ug Central Visayas gikan sa ilang Bureau of Product Standards ang makahiling sa mga karaang helmet.

Andam na silang mopatuman sa balaud karong Hulyo 30. Buot ipasabot dinakpanay na gyud niadtong mga magmotor nga maghelmet og way sticker nga “PS” ug “ICC”.

Sa balaod daku gyud kaayo ang penalty niadtong mogamit sa peke ug tampered nga sticker nga may markang “PS” ug “ICC” kay pamultahon gikan P10,000 ngadto sa P20,000.

Samtang kadtong madakpan nga wa magsul-ob og standard protective motorcycle helmet mobayad og P1,500 sa unang dakop, P3,000 sa ikaduhang dakop, P5,000 sa ikatulo unya P10,000 ug confiscation sa driver’s license sa ikaupat ug sa mosunod nga mga dakop.

* * *

Daghang paltos ang akong nasaksihan pagresponde sa kabomberohan, kapulisan ug mga barangay officials sa sunog niadtong Biyernes sa hapon diha sa Barangay Luz.

Una, nagkagidlay ang mga bombero pagpahimutang sa insaktong pwesto nga maoy hinungdan nga langay kaayo silang nakapatay sa kalayo. Nagpasabot nga wa sila ma-suweto sa lugar.

Ikaduha, mitugot gihapon ang atong mga bombero nga ang mga residente maoy mopatuyang pagbitbit og pagtira sa hose. Nagpasabot nga madala pa sa gulat ang mga bombero sa mga apektadong residente.

Ikatulo, akong nasaksihan nga dugay kaayo ang reinforcement sa supply sa tubig.

Ikaupat, nga gagmay na ang hose unya duna pay mga portion sa hose nga mosidlit ang tubig.

Ikalima, way crowd control nga gipatuman sa kapulisan, sa taga barangay ug sa mga friendly forces. Misamot ka hinay ang pressure sa tubig kay gitunob-tunoban pa gyud sa mga tawo ang hose.

Ikaunom, anaa man tuod ang bayanihan sa mga residente pinaagi sa pagpasa-pasa sa mga binalde nga tubig apan wa gyud magsilbe kay nakapasamot na hinoon og kahuot sa lugar.

Nakasabot ko kun nganong nainutil ang pagresponde sa mga bombero kay akong nahibaw-an kang Cebu City Fire Marshal Aderson Comar nga wa mosanong ang kapitan sa iyang awhag kaniadto nga mag-fire drill sa lugar.

Sa uwahing text ni Comar, mi-abot ug 146 ka bay ang totally burned, pito partially damaged ug mikuyanap sa lima ka mga sityo nga mao ang Santo Niño I, Santa Cruz, Abellana, Lubi ug City Central.

* * *

Kining pagkainutil ug pabaya sa atong mga local nga mga opisyales unya na mamatud-an kun dunay trahedya nga mahitabo nga mokalas sa mga inosenteng kinabuhi.

Sama sa nahitabo niadtong Martes sa gabii sa Casa Del Rio Subdivision diha sa Highway 77 barangay Talamban nga kun giatiman pa dayon ang reklamo sa mga nagpuyo tupad sa subdivision malikayan unta ang kamatayon nila ni Nestor Tapdasan ug Allan Oporto ug ang pagkaangol sa unom kay nadat-ugan ang ilang mga panimay sa nahunlak nga riprap ug retaining wall.

Naigo sa panultihon nga unya na mangoros kun moigo na ang kilat.

In fairness sa mga residente ilang gidangop sa Barangay Hall dihang ilang nakit-an ang sitwasyon nga namiligro na ang ilang pagpuyo apan way aksyon sa problema ang mga opisyales gipangulohan sa kapitan.

Maayong iapil pagkiha uban sa developer!

* * *

Giduwaan ug minaldito sa mga abogado ni kongresista ug Philippine Benevolent Missionaries Association Supreme Master Ruben Ecleo Jr. kay ilang gi-mislead ang korte sa ilang pag-file sa notice of appeal.

Ilang gipatuo nga may conformity o pagtugot ni Ecleo ang maong notice of appeal pinaagi sa pagpapirma sa dukumento.

Apan igmat pa sa Philippine Eagle ug sa iring nga maral ang mga staff ni Judge Soliver Peras kay dali kaayong nakakita nga dili iya ni Ecleo ang pirma sa notice of appeal.

Segun pa nga lahi kaayo ang mga strokes sa signature specimen ni Ecleo dihang nipyansa kini kaniadto og P1 million itandi sa giingong pirma ni Ecleo sa notice of appeal.

Gani akong nahibaw-an nga tungod niining pagpangilad sa mga bag-ong abogado ni Ecleo pinangulohan ni kanhi justice secretary Silvestre Bello III maoy hinungdan nga gibasura ang notice of appeal.

Pero kumusta man tuod ang manhunt operation sa kapulisan batok kang Ecleo? Pirmeng palpak? O inutil gyud ang tanan natong mga law enforcement agencies?